စစ်ကိုင်းတိုင်း၊ မြောင်မြို့နယ်ရှိ ခေါင်းခွဲကျေးရွာအား မီးရှို့ဖျက်ဆီးခဲ့သည့် စစ်ကောင်စီတပ်အား တိုက်ခိုက်ခဲ့ကြောင်း မြောင်ဗိုလ်တောက်ထွန်း (MBTT) အထူးတပ်ဖွဲ့ခေါင်းဆောင် ဗိုလ်တောက်ထွန်းက ပြောသည်။
ယမန်နေ့( အောက်တိုဘာ၁၂ ရက်) ညနေ ၅နာရီ ခန့်က မြောင်မြို့နယ် ကျောက်ရစ်ကျေးရွာမှ လာသော စစ်ကောင်စီတပ်စစ်ကြောင်းသည် ခေါင်းခွဲကျေးရွာ နေအိမ်များအား မီးရှိို့ဖျက်ဆီးခဲ့ကြောင်း မြောင်မြို့နယ်ပြည်သူ့ကာကွယ်ရေးနှင့် လုံခြုံရေးအဖွဲ့ (CDSOM)မှ ကိုနွေဦး(မြောင်)က ပြောသည်။
“လက်တလောစာရင်းအရ နွား ၅ကောင်မီးကျွမ်းသေဆုံးခဲ့တာကိုတွေ့ခဲ့ရပြီး အိမ်အရေအတွက်ကိုတော့ မသိရသေးပါဘူး။”ဟု ကိုနွေဦး(မြောင်)က ပြောသည်။
ခေါင်းခွဲကျေးရွာအား ည ၈ နာရီခွဲကျော်အထိ မီးငြှိမ်းသတ်ခဲ့ရကြောင်း ဒေသခံများက ပြောသည်။
Public Service Announcement
အဆိုပါ စစ်ကြောင်းအား ဒေသကာကွယ်ရေးအဖွဲ့များက နှစ်ကြိမ်မိုင်းဆွဲတိုက်ခိုက်ခဲ့ခြင်း ဖြစ်သည်။
တိုက်ခိုက်မှုကြောင့် စစ်ကောင်စီတပ်သား နှစ်ဦးသေဆုံးပြီး ထိခိုက်ဒဏ်ရာရသူများပြားကြောင်း ဗိုလ်တောက်ထွန်းက ပြောသည်။
ထို့အပြင် ရေစကြိုမြို့နယ်တွင်လည်း စစ်ကောင်စီစစ်ကြောင်းအား ဒရုန်းဖြင့် တိုက်ခိုက်ခဲ့ရာထိခိုက်မှုမသိရသေးကြောင်း CDSOM မှ ကိုနွေဦး(မြောင်)က ပြောသည်။
“ခန့်မှန်းအင်အား ငါးဆယ်လောက်ပါတယ်။ နှစ်ပွိုင့်လုံးထိတာ။ ရွာထဲရောက်မှ သေကြတာ “ဟု MBTT အထူးတပ်ဖွဲ့ခေါင်းဆောင် ဗိုလ်တောက်ထွန်းက ပြောသည်။
သို့သော် စစ်ကောင်စီတပ်၏ ထိခိုက်သေဆုံးမှုအား လူထုနွေဦးက သီးခြားအတည်ပြုနိုင်ခြင်း မရှိသေးပေ။
