ရန်ကုန်တွင် မိုးသည်းပြီးရေကြီးရေလျှံ​နေ၊​ရွှေတိဂုံဘုရား​စောင်းတန်းပါ​ရေလျှံ

ရန်ကုန်မြို့တွင် အောက်တိုဘာ ၂၄ ရက်​နေ့ကသုံးနာရီကျော်ကြာ မိုးသည်းထန်စွာရွာသွန်းမှုကြောင့် မြို့နယ်အများစု၌ ရေကြီးရေလျှံမှုများဖြစ်ပေါ်ခဲ့သည်။

မိုးသည်းထန်စွာရွာသွန်းမှုကြောင့် ရွှေတိဂုံဘုရား တောင်ဘက်‌စောင်းတန်းနှင့်အ​ရှေ့ဘက်​စောင်းတန်းတို့တွင် ရင်ပြင်တော်ပေါ်မှ ရေတံခွန်ကဲ့သို့ ​ ​ရေများစီးကာရေလျှံခဲ့​ကြောင်း မျက်မြင်​တွေ့ရှိသူများက​ပြောသည်။

ယင်းကဲ့သို့စောင်းတန်းမှရေများဆင်းလာခြင်းသည် ဘုရားပေါ်ရှိရေမြောင်းများကို သေသေချာချာရှင်းလင်းထားခြင်းမရှိ​တော့သောကြောင့် ဖြစ်ကြောင်း ရွှေတိဂုံဘုရားအနီးဈေးရောင်းသူတစ်ဦးကပြောသည်။

“ အဲဒီ့ဘက်က အနိမ့်ဖြစ်တာကြောင့်လည်းပါတယ်။ ‌ရေတွေကစုပြီး အဲဒီ့ဘက်ကိုစီးတာ ” ဟု ၎င်းကပြောသည်။

Public Service Announcement

‌နေ့လည် ၁နာရီကျော်တွင် မိုးစတင်ရွာခဲ့ပြီး ညနေ ၄ နာရီကျော်အထိ မိုးအဆက်မပြတ် ရွာခဲ့ခြင်းဖြစ်ကြောင်း ဒေသခံများကပြောသည်။

“ တောင်ဥက္ကလာဘက်မှာ ရေတွေတတ်လာတာ ကားထဲကိုပါရေ‌တွေဝင်လို့ ဘယ်လိုမှမောင်းလို့မရတော့တာ ” ဟု တက္ကစီယာဉ်မောင်းတစ်ဦးက မိုးရွာချိန်က တွေ့ကြုံခဲ့ရသည့်အကြောင်းကိုပြောသည်။

ရန်ကုန်မြို့၏ မြို့နယ်တော်တော်များများ၏ လမ်းမများ၌ ရေကျော်မှုဖြစ်ခဲ့သည့် အကြောင်းကို ဖေ့စ်ဘွတ်ခ်အသုံးပြုသူများက ဓာတ်ပုံများ ဗီဒီယိုများနှင့်အတူ တင်ထားသည်ကိုတွေ့ရသည်။

“ သ‌င်္ဘောစီးပြီးပြန်လာတာ ၊ တာမွေ Ocean ကမ်းခြေ” ဟု Ei Thinzar Chaeng အကောင့်တွင် တာမွေအိုးရှင်းဈေးဝယ်စင်တာရှေ့လမ်းမပေါ်၌ ရေကြီးရေလျှံမှူဖြစ်နေသည်ကို ဗီဒီယိုဖိုင်နှင့်အတူ တင်ထားသည်။

ထို့ပြင် စမ်းချောင်းမြို့နယ်အတွင်း၌လည်း ရေကြီးရေလျှံမှုများဖြစ်ပေါ်ခဲ့ကြောင်း ဒေသခံများက​ဖေစ်ဘွခ်တွင်တင်ထားကြသည်ကိုတွေ့ရသည်။

ကားလမ်းများပါ ရေကြီးရေလျှံမှု​ကြောင့် ယာဉ်ကြောပိတ်ဆို့မှုများဆိုးဆိုးရွားရွားဖြစ်ခဲ့ကြောင်း ခရီးသွားများကပြောသည်။

ရန်ကုန်သာမက ကရင်ပြည်နယ်၊မ​ကွေးတိုင်း၊မန္တ​လေးတိုင်း စ​သော​ဒေသများတွင်လည်းယခုရက်ပိုင်း မိုးသည်းထန်စွာရွာသွန်း​နေ​ကြောင်း​ဒေသခံအချို့က ​ပြောသည်။

အိန္ဒိယ မိုးလေဝသဌာနက ဘင်္ဂလားပင်လယ်အော်အ​ရှေ့​မြောက်ပိုင်းတွင် အင်အားကောင်းသည့် Hamoon( ဟမွန်း) မုန်တိုင်းဖြစ်ပေါ်​နေပြီ မုန်တိုင်းမှာ ဘဂ်လား​​ဒေရှ်ကမ်းရိုးတန်းကို ဦးတည်တိုက်ခတ်မည်ဟု ခန့်မှန်းထားသည်။ မုန်တိုင်း၏ အဝန်းအဝိုင်းအတွင်းရခိုင်ပြည်နယ် ၊ ချင်းပြည်နယ်တို့မှ ​​ဒေသအချို့ပါဝင်​နေသည်ကို​တွေ့ရသည်။ ထိုမုန်တိုင်းအရှိန်​ကြောင့်ရခိုင်ပြည်နယ်၊ချင်းပြည်

နယ်၊ စစ်ကိုင်းတိုင်း၊ကချင်ပြည်နယ်အပါအဝင် နိုင်ငံတစ်ဝန်းမိုးရွာသွန်းနိုင်ပြီး​ဒေသအချို့ မိုးကြီးနိုင်​ကြောင်းသိရသည်။