▪︎”စစ်ရေးအခြေအနေအသေးစိတ်ကိုတော့ ကျတော်တို့သိခွင့်မရှိဘူး။ စကစ အလောင်းတွေကတော့ ထင်းတွေ ကားပေါ်ကနေချသလိုပဲ ပုံနေတာ”-ထောက်ပို့PDF တစ််ဦး
▪︎စစ်ကောင်စီက ၅ ရက်အတွင်းလေကြောင်းမှ ၁၂ ကြိမ်တိုက်ခိုက်၊ စစ်တပ်ကဖမ်းဆီးထားသောလူငယ် ၃ဦးလေကြောင်းတိုက်ခိုက်မှုအတွင်းထွက်ပြေးလွတ်မြောက်
စစ်ကိုင်းတိုင်း၊ ထီးချိုင့်မြို့နယ်၌ ၁၀၂၇ စစ်ဆင်ရေးစတင်ခဲ့သည့် အောက်တိုဘာလ ၂၇ရက်မှစ၍ ငါးရက်ဆက် တိုက်ပွဲပြင်းထန်ခဲ့ပြီး စစ်ကောင်စီဘက်တွင် အကျအဆုံးများပြားခဲ့ကြောင်းပြည်သူ့ကာကွယ်ရေးတပ်ဖွဲ့ဝင်အချို့ကပြောသည်။
“စစ်ရေးအခြေအနေအသေးစိတ်ကိုတော့ ကျတော်တို့သိခွင့်မရှိဘူး။ စကစ အလောင်းတွေကတော့ ထင်းတွေ ကားပေါ်ကနေချသလိုပဲ ပုံနေတာ” ဟု ထီးချိုင့်မြို့နယ် ပြည်သူ့ကာကွယ်ရေးတပ်ဖွဲ့ ထောက်ပို့ရဲဘော်တစ်ဦးက People’s Spring ပြောသည်။
ထီးချိုင့်မြို့နယ်တွင် ပြီးခဲ့သည့် ဩဂုတ်လမှစ၍ တိုက်ပွဲများ မကြာခဏဖြစ်ခဲ့ပြီး မြောက်ပိုင်းမဟာမိတ်ညီနောင်သုံးဖွဲ့၏ ၁၀၂၇ စစ်ဆင်ရေးစတင်သည့် အောက်တိုဘာလ ၂၇ရက်၌ KIA ၊ AA နှင့် PDF ပူးပေါင်းတပ်ဖွဲ့က ထီးချိုင့်၍လည်း တိုက်ပွဲဖော်ဆောင်ခဲ့သည်။ ထူးခြားချက်မှာ အောက်တိုဘာလတွင် ရက္ခိုင်တပ်တော်-AA တပ်ဖွဲ့ဝင်များပါ အင်အားအများအပြားရောက်ရှိလာပြီး စစ်ကောင်စီတပ်ကို တိုက်ခိုက်ခဲ့ခြင်းဖြစ်ကြောင်း ဒေသခံအချို့ကပြောသည်။
၁၀၂၇ စစ်ဆင်ရေးသည် ရှမ်းပြည်နယ်မြောက်ပိုင်းတွင်သာမက စစ်ကိုင်းတိုင်းထီးချိုင့်မြို့နယ်တွင်လည်း စစ်ဆင်ရေးဖော်ဆောင်နေကြောင်းမြောက်ပိုင်းမဟာမိတ်ညီနောင်သုံးဖွဲ့ က ထုတ်ပြန်ထားသည်။
Public Service Announcement
တိုက်ပွဲသည် ထီးချိုင့်မြို့နယ်၊ မင်းဝံတောင်ရိုးနှင့် မော်ကွန်းတောင်အနီးတဝိုက်၌ ဖြစ်ခဲ့ပြီး စစ်ကောင်စီက အောက်တိုဘာလ ၂၇က်မှ စတင်၍ နေ့စဉ် လေကြောင်းမှ တိုက်ခိုက်ခဲ့သည်။
” ၂၇ရက် ကနေ ၃၁ ရက်အထိ လေကြောင်းတိုက်တာ။ မြေပြင်စစ်ကြောင်းမှာက သက်စောင့်ကျည်လောင်ပဲရှိတော့တယ်လို့ သိရတယ်။ ဒါကြောင့်လေကြာင်းပဲသူတို့ အားကိုးရတော့တာ” ဟု PDF ရဲဘော်တစ်ဦးက ပြောသည်။
မင်းဝံတောင်ရိုးနှင့် မော်ကွန်းတောင်အနီးတဝိုက်ကို လေကြောင်းတိုက်ခိုက်မှုများ အဓိက ပြုလုပ်ခဲ့ပြီး အောက်တိုဘာလ ၃၀ရက် ညနေပိုင်းတွင် ထီးချိုင့်မြို့၊ ၅ ရပ်ကွက်၊ သုသာန်အနီးသို့ ရဟတ်ယာဉ်ဖြင့် ဗုံးကြဲတိုက်ခိုက်သွားခဲ့သည်။ ငါးရက်အတွင်း လေကြောင်းတိုက်ခိုက်မှု ၁၂ ကြိမ်ပြုလုပ်ခဲ့ပြီး နေအိမ်ပျက်စီးမှုအချို့ရှိသော်လည်း အရပ်သား ထိခိုက်မှုမရှိကြောင်း ဒေသခံများကပြောသည်။ သို့သော် နိုဝင်ဘာ ၁ ရက်တွင် တိုက်ပွဲမဖြစ်ဘဲ ငြိမ်သက်သွားကြောင်းဒေသခံအချို့ကပြောသည်။
ထို့အပြင်စစ်ကောင်စီစစ်ကြောင်းက ဖမ်းဆီးထားသော အရပ်သား သုံးဦးသည် အောက်တိုဘာ ၃၀ ရက်က လေကြောင်းတိုက်ခိုက်ခံနေရစဉ်အတွင်း ထွက်ပြေးလွတ်မြောက်သွားကြောင်း သိရသည်။
“သုံးယောက်စလုံး လူငယ်တွေ။ စခတွေက ဖမ်းထားတာ နှစ်ရက်ရှိပြီ။ လေကြောင်းက လာပစ်ချိန် ဝရုန်းသုန်းကားဖြစ်နေတာကို အခွင့်ကောင်းယူပြီး ထွက်ပြေးလာတာ။ သေနတ်နဲ့ လှမ်းပစ်လို့ တစ်ယောက် ကျည်ထိပေမယ့် လွတ်အောင် ပြေးလာနိုင်တယ်”ဟု ပြည်သူ့ကာကွယ်ရေးရဲဘော်တစ်ဦးကပြောသည်။
သို့သော်၁၀၂၇ စစ်ဆင်ရေးဖြင့် ထီးချိုင့်မြို့နယ်တွင်လည်း စစ်ဆင်ရေးဖော်ဆောင်နေပြီး တိုက်ပွဲများပြင်းထန်နေကြောင်း မြောက်ပိုင်းမဟာမိတ်ညီနောင်သုံးဖွဲ့ကထုတ်ပြန်ထားသော်လည်း တိုက်ပွဲရလဒ်ကို မထုတ်ပြန်သေးပေ။
