ပခုက္ကူနှင့် ပေါက်မြို့ကိုဆက်သွယ်ထားသည့် ပခုက္ကူ – ကမ္မ – ရေပြာလမ်းပိုင်းကို ယနေ့ (နိုဝင်ဘာ ၇ရက်)မှစတင်ပြီး ကူးသန်းခွင့်ပိတ်လိုက်ကြောင်း ကမ္မဒေသတော်လှန်ရေး တပ်ပေါင်းစုအဖွဲ့က ထုတ်ပြန်လိုက်သည်။
ဒေသန္တရလုံခြုံရေးအခြေအနေအရ မည့်သည့်လူပုဂ္ဂိုလ်နှင့် ယာဉ်တို့ ကူးသန်းခွင့်မပြုပဲ လုံးဝပိတ်ပင်လိုက်ခြင်းဖြစ်သည်ဟု အဆိုပါတပ်ပေါင်းစုအဖွဲ့က ထုတ်ပြန်လိုက်သည်။
“ရိက္ခာနဲ့ လက်နက်တွေ ပေါက် – ရေပြာလမ်းပိုင်းကို သုံးမယ်သတင်းရထားလို့ ပိတ်တာပါ”ဟု ဒေသခံကာကွယ်ရေးတပ်ဖွဲ့ဝင်တစ်ဦးက ပြောသည်။
ပေါက်မြို့နယ် အနောက်ပိုင်း အမှတ်(၂၄)ကာကွယ်ရေးပစ္စည်းစက်ရုံမှ စစ်ကောင်စီတပ် ယာ်တန်းထွက်လာပြီးနောက် ပေါက်မြို့နယ်ကို ဦးတည်နေကြောင်း မျက်မြင်သက်သေများက ပြောသည်။
Public Service Announcement
လက်ရှိ ပေါက်မြို့ပေါ်တွင် စစ်ကောင်စီက ကားများပြင်ဆင်နေသည်ဟု မကြာခင်ရက်ပိုင်းအတွင်း စစ်ကောင်စီက ယာဥ်တန်းဖြတ်သန်းမည်ဟု ခန့်မှန်းကြောင်း ကာကွယ်ရေးတပ်ဖွဲ့ဝင်များက ပြောသည်။
အရေးပေါ်ကိစ္စနှင့်ကျန်းမာရေးကိစ္စများရှိပါက သက်ဆိုင်ရာ ရပ်ရွာ၊မြို့နယ်နှင့် ခရိုင်ပြည်သူ့ကာကွယ်ရေးအဖွဲ့(ပကဖ)များထံ ချိတ်ဆက်အကြောင်းကြား၍ သေန္တရ ညွန်ကြားချက်ဖြင့်သွားလာရမည်ဟုလည်း အဆိုပါတော်လှန်ရေးတပ်ပေါင်းစုအဖွဲ့က ဆိုသည်။
ယခုကြေညာချက်သည် နောက်ထက်ကြေညာချက် တစုံတရာမထုတ်ပြန်မချင်း အသက်ဝင်မည်ဖြစ်ပြီး မလိုက်နာဘဲ ဖြတ်သန်းပါက နောက်ဆက်တွဲဖြစ်ရပ်များကို တာဝန်ယူမည်မဟုတ်ကြောင်း အဆိုပါအဖွဲ့က အသိပေးထားသည်။
စစ်ကောင်စီတပ်က ပေါက်မြို့နယ်မြောက်ပိုင်းတွင် အင်အား ၂၀၀ကျော်ဖြင့် စစ်ကြောင်းထိုးနေပြီး ဒေသခံကာကွယ်ရေးတပ်များနှင့် ထိတွေ့တိုက်ပွဲများဖြစ်ပွားနေသည်။
