တော်လှန်ရေးအင်အားစုများသည် စစ်ကောင်စီတပ်စခန်းများ တည်ရှိရာနေရာများတွင် တော်လှန်ရေးလုပ်ငန်းများကို အရှိန်အဟုန်မြင့်၍ ဆက်လက်ပြုလုပ်သွားမည်ဖြစ်ရာ ပြည်သူများအနေဖြင့် တော်လှန်ရေးအင်အားစုများမှ ထုတ်ပြန်သော ထုတ်ပြန်ချက်များကို အစဉ်တစိုက်သတိပြုကြရန် ပအိုဝ်းအမျိုးသားကာကွယ်ရေးတပ်ဖွဲ့(PNDF) က ထုတ်ပြန်လိုက်ပြီး ပူးပေါင်းပါဝင်ပေးကြရန်လည်း တိုက်တွန်းထားသည်။
PNDFသည် ရှမ်းတောင်နှင့် ကရင်နီနယ်စပ်ဒေသများ၌ ကရင်နီတော်လှန်ရေးတပ်များနှင့် ပူးပေါင်း တိုက်ပွဲဝင်နေသည့် တပ်ဖွဲ့ဖြစ်သည်။
PNDF အမှတ်(၁၀၁၁)တပ်ရင်းသည် KA၊ KNDF၊ KNPLF၊ DMO Local PDF၊ Loikaw PDF၊ မြို့ပြပြောက်ကြားတပ်ဦး(URF)၊နှင့် ရှမ်းတောင် ဗျူဟာ(၂)တပ်ရင်းများဖြစ်သော အမှတ်(၁၀၀၃) တပ်ရင်း ၊အမှတ် (၁၀၀၅)တပ်ရင်း ရှမ်းတောင်(SSPDF)၊ အမှတ် ၁၀၀၈ တပ်ရင်း (SSRY) ၊ အမှတ် ၁၀၀၉ တပ်ရင်း (IPDF) တို့နှင့်အတူ လက်တွဲပြီး လွိုင်ကော်မြို့၊လွိုင်လင်လေးခရိုင် ရှေ့တန်းအမှတ်(၅၃၀)ခြေမြန်တပ်ရင်း၊နွားလဝိုးစစ်ဆင်ရေးစခန်းအား တိုက်ခိုက်မှုတွင် ပါဝင်သည်။
နိုဝင်ဘာ ဒုတိယ ပတ်အတွင်းက အဆိုပါ တပ်စခန်းကို တိုက်ခိုက်ခဲ့ရာ ၂ရက်ကြာ တိုက်ပွဲပြင်းထန်ခဲ့ပြီး စစ်ကောင်စီတပ်စခန်းကို သိမ်းပိုက်နိုင်ခဲ့သည်ဟုဆိုသည်။
Public Service Announcement
စစ်ကောင်စီတပ်သားများသည် (၂)ရက်ကြာ တော်လှန်ရေးပူးပေါင်းတပ် စစ်ကြောင်းအားခုခံကာကွယ်ခဲ့ပြီး နိုဝင်ဘာ ၁၄ရက်တွင် လက်နက်ခဲယမ်းများကိုစွန့်ကာ ထွက်ပြေးတိမ်းရှောင်ခဲ့ကြောင်း PDFက ထုတ်ပြန်သည်။
စစ်ကောင်စီဘက်မှ လက်နက်ကြီးနှင့် လေယာဉ် ပစ်ခတ်မှုများကြောင့် ရန်သူ၏ စခန်းအနီးရှိ လူနေအိမ်အချို့ ထိခိုက်ပျက်စီးခဲ့ပြီး ပူးပေါင်း စစ်ကြောင်းမှလည်း ရဲဘော်အချို့ ထိခိုက်ဒဏ်ရာများ ရရှိခဲ့သည်။
