လက်နက်နှင့်ခဲယမ်းအချို့ရ
စစ်ကိုင်းတိုင်း၊ ကနီမြို့နယ်၊ ဆယ်ရွာချောင်ဒေသရှိ စစ်ကောင်စီ၏ တာဝါတိုင်တပ်စခန်းတစ်ခုအား နှစ်ရက်ဆက် တိုက်ခိုက်ခဲ့ပြီးနောက် စခန်းအား သိမ်းပိုက်နိုင်ခဲ့ကြောင်း ဒေသတွင်းတော်လှန်ရေးအင်အားစုများက ပြောသည်။
ကနီမြို့နယ်၊ ဆယ်ရွာချောင်ဒေသ၊ လာပို့ကျေးရွာအနီးရှိ ဆက်သွယ်ရေးတာဝါတိုင်စခန်းအား နိုဝင်ဘာ ၂၂ ရက် ၆ နာရီခန့်မှစတင်ကာ တိုက်ခိုက်ခဲ့သည်။
နံနက် ၁၀နာရီခန့်တွင် ကျည်ထောက်ပို့မရ၍ နားသည့်အချိန် နံနက် ၁၁နာရီခန့်တွင် လေကြောင်းတိုက်ခိုက်မှုပြုလုပ်ခဲ့ကြောင်း ဒေသတွင်းရဲဘော်အချို့က ပြောသည်။
စစ်ကောင်စီက နိုဝင်ဘာ ၂၂ ရက်တွင် သုံးကြိမ်၊ နိုဝင်ဘာ ၂၃ ရက်တွင်တစ်ကြိမ် နှစ်ကြိမ် ပစ်ခတ်ခဲ့ကြောင်း သိရသည်။
Public Service Announcement
ယမန်နေ့(နိုဝင်ဘာ၂၃ ရက်)နံနက်ပိုင်းတွင် စခန်းအား ထပ်မံသွားရောက်တိုက်ခိုက်ခဲ့ပြီး နံနက်၉ နာရီ ၄၅ မိနစ်ခန့်တွင် အပြီးအပြတ်သိမ်းပိုက်ကာ စခန်းအား မီးရှို့နိုင်ခဲ့ကြောင်း ဒေသတွင်းတော်လှန်ရေးရဲဘော်တစ်ဦးက ပြောသည်။
“ထောက်ပို့တပ်ပုံစံမျိုး၊ ဆက်သွယ်ရေးကုန်းပေါ့။ လှိုဏ်ခေါင်းတွေရှိတယ်။ အရှည်ကြီးပဲ။ ပထမရက်မှာတင် ဂျက်ဖိုက်တာနဲ့ပစ်တယ်။ ဗုံးသီး၂လုံးချတယ်။ ဂန်းငယ်နဲ့ပစ်တယ်။ ထိခိုက်မှုတွေမရှိဘူး။ ရဲဘော်တွေက စခန်းကုန်းတက်တဲ့အချိန်မှာကျတာ။ တေ့ပစ်ခံရတာ။ စခန်းသိမ်းနိုင်ခဲ့တယ်။ မီးလည်း ရှို့နိုင်ခဲ့တယ်။”ဟု ဒေသတွင်း ပြည်သူ့ရဲဘော်တစ်ဦးက ပြောသည်။
စစ်ကောင်စီတပ် ထိခိုက်သေဆုံးမှုအများအပြားရှိပြီး PDFဘက်က ပြည်သူ့ရဲဘော် သုံးဦးကျဆုံးကာ ခြောက်ဦး ထိခိုက်ဒဏ်ရာရရှိခဲ့ကြောင်း ဒေသတွင်းသတင်းရင်းမြစ်များက ပြောသည်။
ထို့အပြင် စခန်းသိမ်းပိုက်မှုမှ MA4 တစ်လက်နှင့် RPG လက်နက်ကြီးကျည် ၁၃ဖူး၊ (၄၀) မမကျည် ၃၀ ကျော်၊ (၆၀) မမ ကျည်အများအပြား၊ ကျည် ပီအံအိတ်တစ်အိတ် ရရှိခဲ့ကြောင်း သိရသည်။
တိုက်ခိုက်မှုကို ယင်းမာပင်ခရိုင် PDF တပ်ရင်း(၁)နှင့် တပ်ရင်း(၂)တို့ ဦးဆောင်ပြီး ဒေသကာကွယ်ရေးတပ်များနှင့် ပူးပေါင်းကာ တိုက်ခိုက်ခဲ့ခြင်းဖြစ်သည်။
အဆိုပါ တာဝါတိုင်ကုန်းစခန်းသည် စစ်ကောင်စီတပ်အတွက် မဟာဗျူဟာကျသည့် ဆက်သွယ်ရေးကုန်းဖြစ်ပြီး ဂျပန်ခေတ် ဥမင်လှိုဏ်ခေါင်းများရှိကြောင်း ဒေသတွင်း တက်ကြွလှုပ်ရှားသူ ကိုပြည့်အောင်နိုင်(ကနီ)က ဆိုသည်။
