ကချင်ပြည်နယ် ရွှေကူမြို့နယ် မြို့လှမြို့နယ်ခွဲအတွင်းရှိ စစ်ကောင်စီတပ်စခန်းတစ်ခုကို ကချင်လွတ်လပ်ရေးတပ်မတော်(KIA)က ယနေ့နံနက်တွင် တိုက်ခိုက် သိမ်းပိုက်လိုက်ကြောင်း စစ်ရေးသတင်းရင်းမြစ်က ပြောသည်။
ဒီဇင်ဘာ ၁ရက် နံနက် ၆နာရီတွင် စစ်ကောင်စီ၏ ခလရ(၁၀)၊ ခလရ(၇၇) ပူးပေါင်းတပ်စခန်းကို တိုက်ခိုက်ခဲ့ခြင်းဖြစ်ပြီး ၂နာရီခန့်အကြာတွင် စခန်းသိမ်းနိုင်ခဲ့သည်ဟု ဆိုသည်။
“ဒီမနက် KIA သိမ်းတာ ရွှေကူမြို့နယ် မြို့လှ မြို့နယ်ခွဲ အမှတ်ကြီးကုန်း ရွှေငြိမ်းချမ်းစခန်းခလရ ၁၀နဲ့ ၇၇ ပူးပေါင်းစခန်းကို သိမ်းပိုက်လိုက်တယ်” ဟု စစ်ရေးသတင်းရင်းမြစ်က ပြောသည်။
အဆိုပါဒေသသည် KIA တပ်ရင်း(၅)က လှုပ်ရှားနယ်မြေဖြစ်သည်ဟု ဆိုသည်။
Public Service Announcement
စခန်သိမ်းတိုက်ပွဲအတွင်း ထိခိုက်ကျဆုံး အခြေအနေနှင့် လက်နက်ခဲယမ်းရရှိမှု အခြေအနေများကို ဆက်သွယ်မေးမြန်းထားဆဲဖြစ်သည်။
KIAသည် အောက်တိုဘာ ၁၈ရက်မှစ၍ ကချင်နှင့် ရှမ်းမြောက်ဒေသ စစ်ကောင်စီတပ်စခန်းများကို စခန်းသိမ်းတိုက်ခိုက်မှုများ မကြာခဏ လုပ်ဆောင်နေခြင်းဖြစ်ပြီး ရွှေကူမြို့နယ်ရှိ စစ်ကောင်စီစခန်း အချို့ကို သိမ်းပိုက်ထားနိုင်ခဲ့သည်။
(ကချင်လွတ်လပ်ရေးတပ်မတော်(KIA)မှ ရဲဘော်များအား ရှေ့တန်းတနေရာ၌ တွေ့ရစဉ်)
ကနဦးဖော်ပြခဲ့သော သတင်းတွင် မိုးညှင်းမြို့နယ်ဟု မှားယွင်းဖော်ပြမိခဲ့သည့်အတွက် စာဖတ်သူများအား အနူးအညွတ်တောင်းပန်အပ်ပါသည်။
