▪︎လက်နက်ခဲယမ်းများစွာသိမ်းဆည်ရရှိကြောင်းစစ်ရေးရင်ူမြစ်ပြော၊မြဝတီမြို့နယ်တွင် စစ်ကောင်စီတပ်စခန်းမကျန်တော့ပေ
မြဝတီမြို့စောင့်တပ် ခလရ ( ၂၇၅) တပ်ရင်းမှစစ်ကောင်စီတပ်ဖွဲ့ဝင်များ စခန်းအား ယမန်နေ့ (ဧပြီ ၁၀ )ညတွင် စွန့်ခွာထွက်ပြေးသွားပြီဖြစ်ပြီး တော်လှန်ရေးတပ်ဖွဲများစခန်းကိုသိမ်းဆည်းနိုင်ပြီဖြစ်ကြောင်း ကရင်စစ်ရေးသတင်းရင်းမြစ်အချို့က အတည်ပြုပြောကြားသည်။
ခလရ (၂၇၅ ) မှစစ်ကောင်စီတပ်ဖွဲ့ဝင်များမှာ စခန်းတိုက်ခိုက်ခံရပြီး တစ်ရက်ခွဲခန့်အကြာတွင် ဧပြီ ၁၀ ရက် ည ၁၀ နာရီဝန်းကျင်တွင်စခန်းကို စွန့်ခွာထွက်ပြေးသွားကြခြင်းဖြစ်ကြောင်း စစ်ရေးရင်းမြစ် နှစ်ခုကပြောကြားသည်။
KNLA ဦးဆောင်သော တော်လှန်ရေးပူးပေါင်းတပ်က ခလရ ( ၂၇၅ ) ကိုဧပြီ ၉ ရက်မှစတင်ထိုးစစ်ဆင်တိုက်ခိုက်ခဲ့ပြီး ဧပြီ ၉ ရက်ညတွင် တစ်ညလုံးနီးပါးတိုက်ပွဲပြင်းထန်ခဲ့ကြောင်း ဒေသခံနှင့်စစ်ရေးရင်းမြစ်များကပြောသည်။ ဧပြီ ၁၀ ရက်တွင်လည်းတစ်နေကုန်နီးပါး တိုက်ပွဲဖြစ်ခဲ့ပြီး ယမန်နေ့( ဧပြီ၁၀ ရက်) ည ၈ နာရီနောက်ပိုင်းမှစ၍ ပစ်ခတ်သံများမကြားရတော့ကြောင်းဒေသခံအချို့ကပြောသည်။
Public Service Announcement
“၈ နာရီ နောက်ပိုင်းကစပြီး ပစ်ခတ်သံတွေ မကြားရတော့တာ”ဟုဒေသခံတစ်ဦးကပြောသည်။
ည ၁၀ နာရီ နောက်ပိုင်းတွင် တော်လှန်ရေးတပ်ဖွဲ့များက ခလရ (၂၇၅)အတွင်းဝင်ရောက်ရာတွင် စခန်းတွင် စစ်ကောင်စီတပ်ဖွဲ့ဝင်များ စွန့်ခွာထွက်ပြေးသွားပြီး မရှိတော့ခြင်းဖြစ်ကြောင်းKNU နီးစပ်သော စစ်ရေးရင်းမြစ်ကပြောသည်။
“ည၁၀ နာရီကျော်မှ ည ဆုတ်သွားတာလို့ အတည်ပြုတယ်”ဟု KNU နှင့်နီးစပ်သောစစ်ရေးရင်းမြစ်ကအတည်ပြုသည်။
“ပစ္စည်းတွေ (လက်နက်ခဲယမ်းများ)အများကြီးရတယ်လို့သိရတယ်”ဟုအခြားစစ်ရေးရင်းမြစ်ကပြောသည်။
ထိုကြောင့်မြဝတီမြို့နယ်တွင်စစ်ကောင်စီတပ်မကျန်တော့ဘဲ KNLA ဦးဆောင်သောတော်လှန်ရေးတပ်များက ထိန်းချုပ်လိုက်ပြီဖြစ်သည်။
စစ်ကောင်စီတပ်များဆုတ်ခွာသွားပြီးနောက် BGF ကယမန်နေ့(ဧပြီ ၁၀)ညတွင် ဝင်ရောက်နေရာယူထားကြောင်းလည်း စစ်ရေးရင်းမြစ်ကပြောပြီး ယနေ့မနက်အခြေအနေကို People’s Spring က စုံစမ်းနေဆဲဖြစ်သည်။
ကရင်နယ်ခြားစောင့်တပ်(BGF)သည်ယခင်ကစစ်ကောင်စီတပ်လက်အောက်ခံဖြစ်သော်လည်း ၂၀၂၄ ဇန်နဝါရီ လမှစ၍စစ်တပ်ထံမှ လစာနှင့်ထောက်ပံ့မှုမယူတော့ဘဲသီးခြားရပ်တည်ကြောင်းကြေညာထားသည်။ထိုနောက် BGF အမည်မှ ကရင်အမျိုးသားတပ်မတော် (Karen National Army-KNA) အဖြစ်ပြောင်းလဲဖွဲ့စည်းမည်ဟုတာဝန်ရှိသူများကမီဒီယာသို့ပြောကြားထားသည်။
စခန်းသိမ်းတိုက်ပွဲတွင် စစ်ကောင်စီတပ်သေဆုံးထိ့ခိုက်မှုအခြေအနေ ၊လက်နက်ခဲယမ်းများ သိမ်းဆည်းနိုင်မှုအခြေအနေ အသေးစိပ်ကိုမူ မသိရသေးပေ။
မြဝတီတိုက်ပွဲသတင်းကို မဲဆောက်မြို့မှ တိုက်ရိုက် တင်ဆက်နေသောထိုင်းသတင်းဌာန The Reporters ကလည်း ယနေ့နံနက် ၆ နာရီကျော်တွင် ခလရ ၂၇၅ ကို ပူးပေါင်းတပ်များအောင်မြင်စွာသိမ်းပိုက်နိုင်ပြီဖြစ်ကြောင်း ဖော်ပြသည်။မြန်မာ-ထိုင်းနှစ်နိုင်ငံနယ်စပ်ကုန်သွယ်ရေးအတွက် အဓိကမြို့ဖြစ်သော မြဝတီမြို့ တိုက်ပွဲသတင်းများကို ထိုင်းသတင်းဌာနများက စိတ်ဝင်တစား ဖြင့်အနီးကပ်စောင့်ကြည့် သတင်းရယူဖော်ပြကြသည်ကိုလည်းတွေ့ရသည်။
KNLA ၊ PDF နှင့်ပူးပေါင်းတပ်များမှာ ဧပြီ ၅ ရက်တွင် သဃ်န်းညီနောင် ဗျူဟာနှင့် ခလရ ၃၅၇ ကိုတိုက်ခိုက်သိမ်းပိုက်ခဲ့သည်။ မြဝတီမြို့အနီးနောက်ဆုံးကျန်သော ခလရ ၂၇၅ ကို ဧပြီ ၆ ရက်မှစ၍ အလံဖြူထောင်လက်နက်ချရန် ပြောသော်လည်းလက်နက်မချ၍ ဧပြီ ၉ ရက်တွင်စတင်တိုက်ခိုက်ခဲ့ခြင်းဖြစ်သည်။
စစ်ကောင်စီက ခလရ (၂၇၅)ကိုစစ်ကူရန်အတွက် စစ်ကောင်စီ၏ အမှတ်(၅၅)ခြေမြန်တပ်မဌာနချုပ်မှ သံချပ်ကာကား ရှစ်စီး နှင့် ကားအစီးရေ ၂၂စီး စုစုပေါင်းယာဥ်အစီး ၃၀ဖြင့် ခန့်မှန်းအင်အား ၃၀၀ခန့်ပါရှိသော ယာဥ်တန်းအား မော်လမြိုင်မြို့မှတစ်ဆင့် ဧပြီ ၉ ရက်တွင် စေလွှတ်ခဲ့ရာ ယမန်နေ့ညနေတွင် တော်လှန်ရေးအဖွဲ့များက ဂျိုင်းတံတားတွင် စတင် တိုက်ခိုက်ခဲ့သည်။ ၎င်းတိုကူရန်လာသော ခလရ ၂၇၅မှာကျသွားပြီဖြစ်ပြီး အဆိုပါစစ်ကူကားတန်းမှာ ယနေ့မနက်တွင် မည်သည့်နေရာရောက်ပြီကိုမသိရသေးပေ။
အဆိုပါကားတန်းကို ဆီကြိုးတိုက်ခိုက်ရန် အသင့်ပြင်ထားကြောင်းလည်းကျားဖြူစစ်ကြောင်းမှ ဒုစစ်ကြောင်းမှူး ဗိုလ်မှူးကျော်ဟိန်းက လူထုနွေဦးသို့ ပြောသည်။
(နောက်ဆက်တွဲသတင်းများကိုဆက်လက်ဖော်ပြပါမည်)
