Connect with us

Hi, what are you looking for?

LuduNwayOo

သတင်း

တီးတိန်မြို့ရှိ စစ်ကောင်စီတပ်စွဲရာ နေရာအချို့ကို ချင်းညီနောင်သိမ်းပိုက်

စစ်ကောင်စီအနေဖြင့် စစ်ရှောင်ပြည်သူများကို ဖမ်းဆီးပြီး PDF ဇိုလဲန်းတပ်ဖွဲ့ဝင်ကို ဖမ်းဆီးရမိသည်ဟု ဝါဒဖြန့်ခြင်းလည်း ရှိနိုင်ကြောင်း သတင်းရင်းမြစ်က ပြောသည်။

(တီးတိန်မြို့နယ်ရှိ နေအိမ်များ စစ်ကောင်စီတပ်က မီးရှို့ဖျက်ဆီးနေစဉ်နှင့် တိုက်ပွဲကြောင့် ဘေးလွတ်ရာရှောင်နေကြသော ပြည်သူများ။ ဓာတ်ပုံ - ချင်းသတင်းရင်းမြစ်)
(တီးတိန်မြို့နယ်ရှိ နေအိမ်များ စစ်ကောင်စီတပ်က မီးရှို့ဖျက်ဆီးနေစဉ်နှင့် တိုက်ပွဲကြောင့် ဘေးလွတ်ရာရှောင်နေကြသော ပြည်သူများ။ ဓာတ်ပုံ - ချင်းသတင်းရင်းမြစ်)

▪️စစ်ကောင်စီတပ်ဖွဲ့ဝင် ၉ဦး ဖမ်းမိထား၊ စစ်ကောင်စီက မြို့ပေါ် နေအိမ်များ မီးလိုက်ရှို့နေ

ထားမြတ်/People’s Spring

ချင်းပြည်နယ် တီးတိန်မြို့ရှိ စစ်ကောင်စီတပ်စွဲရာနေရာများကို ချင်းညီနောင် ပူးပေါင်းတပ်ဖွဲ့က ထိုးစစ်ဆင်တိုက်ခိုက်လျက်ရှိရာ တိုက်ပွဲပြင်းထန်ခဲ့ပြီး စစ်ကောင်စီတပ်ဖွဲ့ဝင်များကို ဖမ်းဆီးရရှိခဲ့ကြောင်း ချင်းညီနောင်အဖွဲ့ဝင် ပြည်သူ့ကာကွယ်ရေးတပ်(PDF)-ဇိုလဲန်း (Zoland) တာဝန်ရှိသူက ပြောသည်။

မေလ ၂၆ရက် ညပိုင်းကစပြီး ထိုးစစ်ဆင်ခဲ့ခြင်းဖြစ်ပြီး စစ်ကောင်စီတပ်စွဲရာ နေရာ ၂ခုကို သိမ်းပိုက်ရရှိထားပြီးဖြစ်သည်ဟု ဆိုသည်။

“စကစ စခန်းချတဲ့ နေရာ နတလနဲ့ တာဝါတိုင်ကုန်း စခန်း ချင်းညီနောင်အဖွဲ့တွေ သိမ်းပိုက်။ ရန်သူ့ဘက်က သုံ့ပန်း ၉ယောက်ရထားတယ်။ စကစ ဘက်က မြို့ပေါ်မှာ အိမ်တွေမီးလိုက်ရှို့နေတယ်”ဟု PDF ဇိုလဲန်း တာဝန်ရှိသူက ပြောသည်။

Public Service Announcement

Public Service Announcement

ထို့ပြင် တီးတိန်ရဲစခန်းကို ချင်းညီနောင်တပ်ဖွဲ့များက သိမ်းပိုက်နိုင်ပြီး ရဲအချို့ အရှင်ဖမ်းမိဟု ချင်းသတင်းရင်းမြစ်က ပြောပြသည်။

အဆိုပါ ဖြစ်စဉ်နှင့်ပတ်သက်ပြီး အတည်ပြုနိုင်ရန် ဆက်လက်စုံစမ်းနေဆဲဖြစ်သည်။

” တိုက်ပွဲတော့ ဆက်လက်ရှိနေဆဲ။ တီးတိန်ရဲစခန်းတော့ ရတယ်ပြောတယ်။ ပြီးရင် စကစ ရဲတွေရော ဖမ်းဆီးရတာတွေလည်း ရှိတယ်လို့ သိရတယ်။ PDF Zoland တော်လှန်ရေးတပ်ဖွဲ့ဝင်တစ်ယောက် ကျဆုံးတယ်။ ကျနော်တို့ဘက်က ဒဏ်ရာရသူတွေများတယ်ပေါ့။ အတိအကျတော့ ပြောလို့မရသေးဘူး။ ကျနော်တို့ဘက်က မြို့အဝင် တစ်နေရာမှာ စကစတွေက PDF Zoland သုံးယောက်ကို ဖမ်းဆီးခဲ့တယ်လို့ သတင်းလည်းရတယ်။ ဒါပေမဲ့ အဲဒါက ဆက်လက်စုံစမ်းနေဆဲ” ဟု ချင်းသတင်းရင်းမြစ်က ပြောသည်။

စစ်ကောင်စီအနေဖြင့် စစ်ရှောင်ပြည်သူများကို ဖမ်းဆီးပြီး PDF ဇိုလဲန်းတပ်ဖွဲ့ဝင်ကို ဖမ်းဆီးရမိသည်ဟု ဝါဒဖြန့်ခြင်းလည်း ရှိနိုင်ကြောင်း သတင်းရင်းမြစ်က ပြောသည်။

စစ်ကောင်စီတပ်သည် တီးတိန်မြို့တိုက်ခိုက်ခံရမည့် သတင်းကိုကြိုရထား၍ မေလ ၂၆ရက် နံနက်ကတည်းက တီးတိန်မြို့နယ်ရှိ ကျေးရွာအချို့ကို လေကြောင်းတိုက်ခိုက်ခဲ့ရာ အရပ်သား အချို့ သေဆုံးထိခိုက်ရှိခဲ့သည်။

ချင်းညီနောင်အဖွဲ့ဝင် တပ်ဖွဲ့များမှာ PDF ဇိုလဲန်း၊ ချင်းအမျိုးသားကာကွယ်ရေးတပ်(CNO/CNDF)၊ CDF မင်းတပ်၊ မရာတပ်ဖွဲ့ MDF၊ CDF ကန်ပက်လက်၊ CDF မတူပီ တပ်မဟာ(၁) တို့ဖြစ်ပြီး စစ်ရေး၊ နိုင်ငံရေး အတူပူးပေါင်းဆောင်ရွက်ရန် သဘောတူထားကြသည်။

ဆက်စပ်သတင်းများ

သတင်း

ဆန်ဈေးနှုန်းမြင့်တက်လာခြင်းကြောင့် ဆိုကာ စစ်​ကောင်စီက ဆန်စပါးလုပ်ငန်းရှင် ခေါ်ယူစစ်ဆေး​နေခြင်းဖြစ်သည်ဟု ဆန်လုပ်ငန်းရှင်တစ်ဦးကပြောသည်။

သတင်း

တရုတ်နိုင်ငံသားလေးဦးကို တာချီလိတ်မြို့မရဲစခန်း၌ ဖမ်းဆီးထားသည်။ ဖမ်းမိသည့် တိရိစ္ဆာန်များကို မည်သည့်နေရာသို့ပို့မည်ကို မသိရသေးပေ။ အမှုကို လူစားထိုးရေး ကြိုးပမ်းမှုများရှိနေကြောင်းလည်း ဒေသခံအချို့ကပြောသည်။

သတင်း

နောင်ဝိုးရွာအနီးတွင်လည်း ထိတွေ့တိုက်ပွဲပြင်းထန်နေပြီး နှစ်ဖက်ထိခိုက်မှုရှိကြောင်းလည်း ပင်လောင်းအခြေစိုက်စစ်ရေးသတင်းရင်းမြစ်က ဆိုသည်။

သတင်း

စစ်ကောင်စီတပ်သည် TNLAနှင့် အပစ်ရပ်စဲထားသော်လည်း TNLA တပ်စခန်း ရှိရာသို့ လေကြောင်း၊ လက်နက်ကြီး တိုက်ခိုက်မှုများ မကြာခဏ ပြုလုပ်လျက်ရှိသည်။