PDF Zoland ရဲဘော် တစ်ဦးကျဆုံး
ချင်းပြည်နယ် တီးတိန်မြို့နယ်ရှိ ကနေဒီတောင် စစ်ကောင်စီတပ်စခန်းကို ပြည်သူ့ကာကွယ်ရေးတပ်မတော်(PDF)-Zoland က ယနေ့နံနက်တွင် တိုက်ခိုက်သိမ်းပိုက်ခဲ့ရာ စစ်ကောင်စီတပ် သေဆုံးမှုရှိခဲ့ပြီး လက်နက်ခဲယမ်းများ ရရှိခဲ့ကြောင်း အသိပေးထုတ်ပြန်သည်။
နိုဝင်ဘာ ၂၁ရက် နံနက် ၄နာရီတွင် ကနေဒီတောင်ရှိ စစ်ကောင်စီတပ်စခန်းကို စတင်တိုက်ခိုက်ခဲ့ရာ ၄နာရီအကြာတွင် စခန်းသိမ်းပိုက်နိုင်ခဲ့သည်ဟု အသိပေးသည်။
တိုက်ပွဲအတွင်း စစ်ကောင်စီတပ်သား အနည်းဆုံးနှစ်ဦး သေဆုံးပြီး၊ တစ်ဦးအား အရှင်ဖမ်းဆီးရမိခဲ့ကြောင်း ထုတ်ပြန်သည်။ PDF Zoland မှ ရဲဘော်တစ်ဦး ကျဆုံးခဲ့သည်ဟုလည်း ဖော်ပြသည်။
“ ရဲဘော် Pau Tawng။ မင်းကတော့ ထွက်ခွါသွားပြီ။ ဒါပေမဲ့ မင်းအသက်နဲ့လဲပြီးတိုက်ယူခဲ့တဲ့ မြေဟာ လှပစွာရှိနေမယ်။ မင်းအသွေးနဲ့လဲခဲ့တဲ့ အောင်ပွဲ ပြည်သူတွေရဲ့အပြုံးက အမြဲတမ်းရှင်သန်နေမယ်။ မင်းရဲ့ ရဲရင့်မှုအမြတ်ဆုံး စွန့်လွှတ်ပေးဆပ်မှုတွေဟာ သမိုင်းမှာ ထာဝရ ကျန်ရစ်မယ်။ ငါတို့နာကျင်ဝမ်းနည်းရတယ်။ ဒါပေမဲ့ ငါတို့ဂုဏ်ယူတယ် ရဲဘော်။ ရဲဘော် Pau Tawng အား ညှိုးငယ်စွာအလေးပြုပါတယ်”ဟု PDF Zoland က ကျဆုံးရဲဘော်အတွက် စာရေးသားထုတ်ပြန်သည်။
Public Service Announcement
တပ်စခန်းရှိ ကျန်စစ်ကောင်စီတပ်ဖွဲ့ဝင်များ ထွက်ပြေးသွား၍ လိုက်လံဖမ်းဆီးလျက်ရှိကြောင်း ဖော်ပြထားပြီး ကနေဒီတိုက်ပွဲမှ လက်နက်ကြီး အချို့နှင့်ကျည်မြောက်များစွာ သိမ်းဆည်းရရှိခဲ့သည်ဟု အသိပေးသည်။
စစ်ကောင်စီတပ်ကလည်း နေ့လယ် ၁၂နာရီခန့်တွင် တိုက်ခိုက်ရေးရဟတ်ယာဉ်ဖြင့် လေကြောင်း တိုက်ခိုက်ခဲ့ရာ ကာကွယ်ရေးရဲဘော်များ လုံခြုံရာသို့ တိမ်းရှောင်ခဲ့သည်ဟု ထုတ်ပြန်သည်။
