ဇေအောင်/People’s Spring
မန္တလေးတိုင်း၊ စဥ့်ကူးမြို့နယ်ရှိ ရွာသာယာရွာရှိ ပျူစခန်းအား ဒေသကာကွယ်ရေးအဖွဲ့များက တိုက်ခိုက်သိမ်းပိုက်လိုက်ကြောင်း သတင်းရရှိသည်။
ဇူလိုင် ၂၅ ရက် နံနက်ပိုင်းက စဥ့်ကူးမြို့နယ်တွင် ကျန်ရှိနေသော ရွာသာယာရွာပျူစခန်းအား ဒေသကာကွယ်ရေးအဖွဲ့များက ဝင်ရောက်တိုက်ခိုက်ရာ တိုက်ပွဲပြင်းထန်ခဲ့ပြီး စခန်းသိမ်းနိုင်ခဲ့ကြောင်း ဒေသကာကွယ်ရေးအဖွဲ့များက ပြောသည်။
အရှင်ဖမ်းဆီးရမိသူများလည်းရှိပြီး PDFဘက်ကလည်း ထိခိုက်ကျဆုံးမှုရှိကြောင်း ကာကွယ်ရေးရဲဘော်အချို့က ပြောသည်။
Public Service Announcement
“တချို့ပျူတွေကတော့ စက်လှေတွေနဲ့ စစ်ကိုင်းဘက်ခြမ်း ရှိမ်းမကားစခန်းကို ဆုတ်ပြေးသွားကြတယ်။”ဟု ဒေသခံတစ်ဦးကပြောသည်။
ရွာသာယာပျူရွာသည် စဥ့်ကူးနယ်အတွင်း ပျူအင်အားကောင်းသည့်ရွာဖြစ်ပြီး စဥ့်ကူးမြို့နယ်သာမက စစ်ကိုင်းတိုင်းဘက်ရှိပြည်သူများကိုပါ လက်နက်ကြီးဖြင့်ပစ်ခတ်ခြင်း၊ ရွာမီးရှို့ခြင်း၊ ဖမ်းဆီးသတ်ဖြတ်ခြင်းများ ပြုလုပ်ခဲ့သည်ဟု ဒေသခံများက ပြောသည်။
စဉ့်ကူးမြို့အပါအဝင် ယင်းမြို့နယ်အတွင်းရှိ စစ်ကောင်စီ စခန်းများအားလုံးအား မန္တလေး PDFနှင့် ပူးပေါင်းတပ်များက ဇူလိုင်(၁၇)ရက်နေ့တွင် အပြီးသတ် သိမ်းပိုက်ရရှိခဲ့သည်။
စစ်ကောင်စီဘက်ကလည်း စဥ့်ကူးမြို့နယ်အား ကျောက်မြောင်းဘက်ခြမ်းမှလက်နက်ကြီးများ ပစ်ခတ်တိုက်ခိုက်နေ၍ ဒေသခံများထွက်ပြေးတိမ်းရှောင်နေရသည်။
