ထားမြတ်/People’s Spring
ရှမ်းပြည်နယ်မြောက်ပိုင်း၊ နောင်ချိုမြို့နယ်နှင့် မိုးမိတ်မြို့နယ်တွင် တအာင်းတပ်မတော် (TNLA)နှင့် စစ်ကောင်စီတပ်တို့ ယနေ့ တိုက်ပွဲဆက်ဖြစ်ခဲ့ကြောင်း TNLAက ထုတ်ပြန်သည်။
၁၀၂၇ စစ်ဆင်ရေးအပိုင်း (၂) ၃၁ ရက်မြောက်ဖြစ်သည့် ဇူလိုင် ၂၅ စစ်ရေးအခြေအနေကို TNLAက အသိပေးထုတ်ပြန်ခြင်းဖြစ်သည်။
Public Service Announcement
နောင်ချိုမြို့နယ် ရေဖြူရွာသို့ စစ်အင်အားဖြည့်တင်းလာသည့် စစ်ကောင်စီတပ်နှင့် ယနေ့ မွန်းလွဲပိုင်းတွင် ရင်ဆိုင်တိုက်ပွဲဖြစ်ခဲ့သည်ဟု TNLAက ဆိုသည်။ တိုက်ပွဲအတွင်း ထိခိုက်ကျဆုံး ရှိမရှိ အခြေအနေဖော်ပြထားခြင်းမရှိပေ။
မိုးမိတ်မြို့တွင်လည်း ယနေ့ ညနေပိုင်း၌ စစ်ကောင်စီ၏ လက်ကျန် ဗျူဟာကုန်းစခန်းကို TNLAက တိုက်ခိုက်ခဲ့ကြောင်း၊ စစ်ကောင်စီကလည်း ဗျူဟာကုန်းအတွင်းY12 လေယာဉ်ဖြင့် လက်နက်ခဲယမ်းများ တစ်ကြိမ် လာရောက်ကြဲချခဲ့ကြောင်း ဖော်ပြထားသည်။
TNLAသည် မိုးမိတ်ရှိ စစ်ကောင်စီဗျူဟာကုန်းကို ဇူလိုင် ၂၄ရက်က စတင်ထိုးစစ်ဆင်ခဲ့ခြင်းဖြစ်သည်။
လက်ရှိစစ်ရေးအခြေအနေမှာ မိုးမိတ်မြို့ကို တော်လှန်ရေးတပ်များက ထိန်းချုပ်ထားပြီးဗျူဟာကုန်းကိုသာ ဆက်လက်ထိုးစစ်ဆင်နေခြင်းဖြစ်ကြောင်း TNLA နှင့်အတူတိုက်ပွဲဝင်နေသည့် ပြည်သူ့လွတ်မြောက်ရေးတပ်မတော်(PLA) သတင်းပြန်ကြားရေးတာဝန်ရှိသူက ယနေ့ ညနေပိုင်း၌ ပြောပြသည်။
TNLA နှင့်မဟာမိတ်များသည် ဇွန်လ ၂၅ရက်မှစ၍ ၁၀၂၇ စစ်ဆင်ရေးအပိုင်း(၂)ကို စတင်ဖော်ဆောင်ခဲ့ရာ တစ်လအတွင်း နောင်ချို၊ မိုးကုတ် မြို့နယ်များရှိ စစ်ကောင်စီတပ်စခန်းအားလုံးကို သိမ်းပိုက်ထားသည်။
ထို့ပြင် ကျောက်မဲနှင့် မိုးမိတ်မြို့များကိုလည်း ဝင်ရောက်နေရာယူ စိုးမိုထိန်းချုပ်ထားနိုင်ပြီဖြစ်သည်။
