မိထက်/People’s Spring
ပဲခူးတိုင်းအရှေ့ပိုင်း၊ ထန်းတပင်မြို့နယ်၊ ဇရပ်ကြီးမြို့အနီးတွင် တိုက်ပွဲဆက်ဖြစ်ပွားနေသောကြောင့် တိမ်းရှောင်လာသော ဒေသခံ ၆၀၀ခန့်မှာ တောင်ငူနှင့်ထန်းတပင်မြို့ပေါ်ရှိ ယာယီစစ်ဘေးရှောင်စခန်း၌ ရောက်ရှိနေသည်။
ဇရပ်ကြီးမြို့နယ်၊ ကင်မွန်းခြုံနှင့် ရှမ်းစုကျေးရွာတို့တွင် ဩဂုတ် ၉ရက်ကစ၍ တိုက်ပွဲဖြစ်ပွားခဲ့ပြီး ယနေ့(ဩဂုတ် ၁၁ရက်)တွင်လည်း စစ်ရေးတင်းမာနေကြောင်း ထန်းတပင်မြို့ခံများကပြောသည်။
Public Service Announcement
” မနေ့က နည်းနည်း ငြိမ်တယ်။ ဒီနေ့ ပြန်ချကြတယ်။ စစ်တပ်ကလက်နက်ကြီးပစ်တယ်။ အရပ်သား ထိခိုက်သေဆုံးမှုလည်းရှိပါတယ်”ဟု ဒေသခံတစ်ဦးက ပြောသည်။
တိုက်ပွဲဖြစ်ပွားရာဒေသမှ ထွက်ပြေးလာသောစစ်ဘေးရှောင်များသည် တောင်ငူနှင့်ထန်းတပင်မြို့မှ ယာယီစစ်ဘေးရှောင်စခန်းများ၌ ခိုလှုံနေကြရသည်။ စုစုပေါင်း စစ်ဘေးရှောင်ဦးရေ နှစ်ထောင်ခန့်ရှိနေပြီဟု သတင်းရရှိသည်။
” ဘာမှမသယ်နိုင်ဘဲ ပြေးလွှားလာကြရတော့ လိုအပ်ချက်တွေ အများကြီးရှိနေပါတယ်။ ဒီတခါတိုက်ပွဲကကြာနိုင်တယ်လို့ ထင်တယ်။ အကူအညီတွေပေးဖို့ မေတ္တာရပ်ခံပါတယ်”ဟု စစ်ဘေးရှောင်များအားကူညီနေသူတစ်ဦးက ပြောသည်။
ဇရပ်ကြီးမြို့တွင် ခြေလျင်တပ်ရင်း (ခလရ-၂၇) နှင့် စစ်ကောင်စီတပ်စွဲထားသည့် စခန်းများရှိနေသည်။ ပြီးခဲ့သည့် ဖေဖော်ဝါရီက ကရင်အမျိုးသားလွတ်မြောက်ရေးတပ်မတော် (KNLA) ၊ ဗမာပြည်သူ့လွတ်မြောက်ရေးတပ်တော် (BPLA) နှင့် ပြည်သူ့ကာကွယ်ရေးတပ်မတော် (PDF) ပူးပေါင်းတပ်များက တိုက်ခိုက်ခဲ့ဖူးသည်။
ထိုစဉ်က တိုက်ပွဲအလွန်ပြင်းထန်ခဲ့သဖြင့် ရွာပေါင်း ၃၀ကျော်မှ ထောင်နှင့်ချီသော ဒေသခံများ ဘေးလွတ်ရာသို့ တစ်လခန့်ကြာ ထွက်ပြေးတိမ်းရှောင်ခဲ့ကြရသည်။ တိုက်ပွဲအတွင်း စစ်ကောင်စီက လေကြောင်းနှင့် လက်နက်ကြီးတိုက်ခိုက်မှုကြောင့် အမျိုးသမီးသုံးဦးအပါအဝင် အရပ်သား ၉ ဦး သေဆုံးကာ ၅၀ ကျော် ထိခိုက်ဒဏ်ရာရရှိခဲ့သည်။
KNUအနေဖြင့် တပ်မဟာ(၁)၊ တပ်မဟာ(၃)နှင့် တပ်မဟာ(၅) ပူးပေါင်းပြီး စစ်တောင်းမြစ်ဝှမ်းဒေသ၌တိုက်ပွဲဖော်ဆောင်မည်ဟု သတင်းရကြောင်း စစ်ခေါင်းဆောင်မင်းအောင်လှိုင်က ဩဂုတ် ပထမပတ်တွင်ပြောကြားထားရာ တပ်မဟာသုံးခုသာကွက်ပြီး စစ်ရေးဖော်ဆောင်မည် မဟုတ်ဘဲ KNU၌ ရှိနေသည့် တပ်မဟာ ခုနစ်ခုစလုံးက စစ်အာဏာရှင်စနစ် အပြီးတိုင် ချုပ်ငြိမ်းရေးတိုက်ဖျက်သွားမည်ဟု KNU ပြောရေးဆိုခွင့်ရှိသူ ပဒိုစောတောနီးက အသိပေးထားသည်။
