ကျော်ဇော/People’s Spring
ပဲခူးတိုင်း၊ ပေါင်းတည်မြို့နယ်ရှိ အထိုင်စခန်းသို့ အင်အားဖြည့်ရန်လာသော စစ်ကောင်စီတပ်သားများအား ကြားဖြတ်တိုက် ခိုက်ခဲ့ကြောင်း ပြည်ခရိုင် PDF တပ်ရင်း ၃၆၀၁(PPDF)မှ ဆက်သွယ်ရေးနှင့် ပြန် ကြားရေးတာဝန်ခံက ပြောသည်။
သြဂုတ် ၁၅ ရက် နံနက် ၁၁ နာရီ ၄၀မိနစ်ခန့်က ပေါင်းတည်နယ်၊ သစ်ပုတ်တာဝါတိုင်စခန်းသို့ အင်အားဖြည့်ရန်လာသော စစ်ကောင်စီတပ်သား ၂၆ ဦးအား ညောင်နီပင်ရွာနှင့် သစ်ပုတ်ကျေးရွာကြား၌ တပ်ရင်း ၃၆၀၁၊ ၃၆၀၂ နှင့် ၃၈၀၁ တို့မှ တပ်ခွဲများပူးပေါင်း၍ ပစ်ခတ်တိုက်ခိုက်ခဲ့ခြင်း ဖြစ်သည်။
Public Service Announcement
“မှတ်တိုင်ရွာဘက်ကနေလာပြီး အင်အားဖြည့်တာ။ အဲဒီမှာက စကစ လက်အောက်ခံ ခမရ (၁၀)တပ်အထိုင်ရှိတယ်”ဟု အင်အားဖြည့်ရန်လာသော စစ်ကောင်စီတပ်သားများ၏ အခြေအနေကို တပ်ရင်း ၃၆၀၁မှ ပြန်ကြားရေးတာဝန်ခံက ပြောသည်။
တိုက်ခိုက်မှုမှာ အချိန်(၆)နာရီခန့်ကြာ မြင့်ပြီး စစ်ကောင်စီတပ်သား ၁၄ဦးသေဆုံး၍ ခြောက်ဦးဒဏ်ရာရရှိသွားကြောင်း တပ်ရင်း ၃၆၀၁က အသိပေးသည်။
အလားတူ စစ်ကောင်စီတပ်ဖွဲ့ဝင်များဘက်မှလည်း လက်နက်ကြီး၊ လက်နက်ငယ်များဖြင့်ပြန်လည်ခုခံတိုက်ခိုက်ခဲ့သော်လည်း ပြည်သူ့ကာကွယ်ရေးတပ်ဖွဲ့ဝင်များ အထိခိုက်အန္တရာယ်မရှိ အောင်မြင်စွာလုပ်ဆောင်နိုင်ခဲ့သည်ဟု ဆိုသည်။
ထို့နောက် စစ်ကောင်စီတပ်သည် သေဆုံးနှင့် ဒဏ်ရာရသူများအား ကားဖြင့်သယ်ထုတ်၍ ရွှေတောင် ကုတင်(၁၀၀)စစ်ဆေးရုံသို့ ပို့ဆောင်လိုက်ကြောင်း စုံစမ်းသိရသည်။
ပြည်ခရိုင် ပေါက်ခေါင်းမြို့နယ်တွင်လည်း သြဂုတ် ၁၅ ရက်တွင် နေအိမ်များ မီးရှို့ဖျက်ဆီးပြီးပြန်လာသော အင်အား ၅၀ ခန့်ပါ စစ်ကောင်စီတပ်ကိုဂွေးတောက်ရွာအနီး၌ တပ်ရင်း ၃၆၀၁၊ တပ်ခွဲ (၁)မှ ပဒေသာမိုင်းများဖြင့်(၃)ကြိမ် ဖောက်ခွဲတိုက်ခိုက်ခဲ့သေးသည်။
