ဟာနာဆန်/People’s Spring
မကွေးတိုင်း၊ ပခုက္ကူခရိုင်၊ ကမ္မမြို့နယ်ရှိ သာကြီးတောင်ရဲကင်းစခန်းအား တိုက်ခိုက်ရာ စစ်ကောင်စီတပ်ဖွဲ့ဝင် ၅ ဦးသေဆုံးပြီး စစ်သုံ့ပန်းအဖြစ် သုံးဦးဖမ်းမိကာ လက်နက်ခဲယမ်းများ ရရှိခဲ့ကြောင်း မြိုင်မြို့နယ်ပြည်သူ့ကာကွယ်ရေးအဖွဲ့(ပကဖ)၏ တာဝန်ရှိသူက ပြောသည်။
Public Service Announcement
သြဂုတ် ၂၀ရက် နံနက် ၄နာရီခန့်က ပခုက္ကူခရိုင်၊ ကမ္မမြို့နယ်၊ သာကြီးတောင်ရဲကင်းစခန်း ဝင်ရောက်တိုက်ခိုက်ရာ နံနက် ၁၁နာရီအချိန်တွင် စခန်းအား စီးနင်းနိုင်ခဲ့ကြောင်း မြိုင်ပကဖ၏ တာဝန်ရှိသူက ပြောသည်။
တိုက်ပွဲအတွင်း စစ်ကောင်စီတပ်ဖွဲ့ဝင် ငါးဦးသေဆုံးပြီး နှစ်ဦးမှာအလံဖြူထောင်အညံ့ခံကာ တစ်ဦးကို ဖမ်းဆီးရမိခဲ့ကြောင်း မြိုင်ပကဖက ဆိုသည်။
“စခန်းက သိမ်းလိုက်နိုင်တယ်ဗျ။ ဒါပေမယ့်ဒီကောင်တွေက စခန်းမှာမရှိတော့ဘူး။ ဘေးမှာရှိတဲ့တောတွေက အရမ်းကောင်းတာဆိုတော့ ဒီကောင်တွေက တောင်တောင်လျှိုမြောင်တွေထဲပဲနေကြတာ။ လေကြောင်း လာတာနဲ့ ကျွန်တော်တို့ရဲဘော်တွေ ဆုတ်ခဲ့တော့တာ။ ငါးကောင်မျက်မြင်သေတာ။ အလောင်းတွေတွေ့ခဲ့တယ်။ နှစ်ကောင်က အလံဖြူထောင်တာ။ တစ်ကောင်ကတော့ တိုက်ပွဲပြီးခါမှ ဖမ်းမိသွားတာ။”ဟု တိုက်ပွဲတွင်ပါဝင်သူ မြိုင်ပကဖရဲဘော်တစ်ဦးက ပြောသည်။
ထို့အပြင် G3 ၂ လက်၊ BA94 ၄ လက် ၊ MA13 ၁ လက် ၊ ဒရုန်းပစ်သေနတ် ၁ လက် ၊ ကျည်မျိုးစုံ ၁၀၀၀ ကျော် ၊ မိုင်းအမျိုးမျိုး နှင့် ကျပ်သိန်း ၆၀ ကျော်တို့ကို သိမ်းဆည်းရမိခဲ့ကြောင်း မြိုင်ပကဖက အသိပေးသည်။
ဆက်လက်၍ အထိနာနေသော စစ်ကောင်စီတပ်အား လိုက်လံချေမှုန်းသော်လည်းလေကြောင်းပစ်ကူများကြောင့် ပြန်လည်ဆုတ်ခွာခဲ့ကြောင်း သိရသည်။
အဆိုပါ စစ်ဆင်ရေးကို မြိုင်ပကဖ၊ ပေါက်ပကဖ( တပ်ပေါင်းစု) ၊ FRF တပ်ဖွဲ့ ၊ BGF တပ်ဖွဲ့ ၊ ပကဖတပ်ပေါင်းစု အမှတ်(၁) တပ်ရင်း ၊ ကမ္မတပ်ပေါင်းစုတို့က ပူးပေါင်းတိုက်ခိုက်ခဲ့ခြင်းဖြစ်သည်။
မြိုင်ပကဖနှင့် မဟာမိတ်အဖွဲ့များသည် သြဂုတ် ၇ရက်ကလည်း ကိုင်းတောမရဲစခန်း၊ သြဂုတ် ၈ ရက်က ဝက်ပုတ်ပျူစောထီးစခန်းများအား သိမ်းပိုက်နိုင်ခဲ့သည်။
