ကျော်ဇော/People’s Spring
တနင်္သာရီမြို့နယ်တွင် စစ်ကောင်စီ၏ ခမရ(၅၅၇)တပ်ရင်း၊ မြို့ဝင်ဂိတ်နှင့် စခန်းတစ်ခုကို တော်လှန်ရေးပူးပေါင်းတပ်များ ဝင်ရောက်တိုက်ခိုက်ခဲ့ကြောင်း မြိတ်ခရိုင်၊ ပြည်သူ့ကာကွယ်ရေးတပ်ပူးပေါင်းစစ်ကြောင်း(၂)မှ တာဝန်ရှိသူတစ်ဦးက ပြောသည်။
ဩဂုတ် ၂၄ ရက် နံနက် ၈နာရီခွဲအချိန် တနင်္သာရီမြို့နယ် အောက်ကင်းရွာအခြေစိုက် စစ်ကောင်စီတပ်ရင်း ခမရ(၅၅၇)ကို တော်လှန်ရေးပူးပေါင်းအဖွဲ့မှ သွားရောက်တိုက်ခိုက်ခဲ့ရာ ပြန်လှန်ပစ်ခတ်မှု ၁၅မိနစ်ခန့်ကြာမြှင့်ပြီး စစ်ကောင်စီတပ်ဘက်မှ အရာရှိတစ်ဦးနှင့် တပ်ကြပ် ကြီးတစ်ဦး ထိခိုက်မှုရှိကြောင်း ၎င်းက ပြော သည်။
Public Service Announcement
အလားတူ ယင်းနေ့ နံနက် ၉ နာရီခန့်နှင့် ညနေ ၃နာရီခွဲအချိန်များတွင် တနင်္သာရီမြို့အဝင် တံ တားစစ်ဆေးရေးဂိတ်နှင့် ဗိုလ်ချုပ်ကြေးရုပ်အရှေ့ တောင်ပေါ်ရှိစစ်ကောင်စီစခန်းတို့ကို ပူးပေါင်းအဖွဲ့မှ ထပ်မံတိုက်ခိုက်ခဲ့သည်။
“မြို့ဝင်တံတားဂိတ်နဲ့ တောင်ပေါ်စခန်းက အင်အား ၃၀လောက်စီရှိတယ်။ တပ်ရင်း (၅၅၇)မှာတော့ အင်အား ၈၀လောက်ရှိမှာပေါ့”ဟု မြိတ်ခရိုင်၊ ပြည်သူ့ကာကွယ်ရေးပူးပေါင်းစစ်ကြောင်း(၂)မှ တာဝန်ရှိသူတစ်ဦးက ပြောသည်။
အထက်ပါတိုက်ခိုက်မှုသုံးကြိမ်တွင် စစ်ကောင်စီဘက်မှ ငါးဦးထိခိုက်မှုရှိပြီး တစ်ဦးသေဆုံးခဲ့ကြောင်း ၎င်းက ဆက်ပြောသည်။
“တိုက်ခိုက်ပြီးနောက်ပိုင်းမှာတော့ လုံခြုံရေးတွေအတင်းအကျပ်ချထား”ဟု စစ်ကြောင်း (၂)မှတာဝန်ရှိသူက ရှင်းပြသည်။
တိုက်ခိုက်မှုများကို မြိတ်ခရိုင်ပြည်သူ့ကာ ကွယ်ရေးပူးပေါင်းစစ်ကြောင်း(၁)နှင့်(၂)မှဦးဆောင်ကာ တော်လှန်ရေးတပ်ဖွဲ့များ ပူးပေါင်းဖော်ဆောင်ခဲ့ခြင်း ဖြစ်သည်။
ဩဂုတ် ၂၂ ရက် နေ့လယ်နှင့် ညနေပိုင်းတို့တွင် စစ်ကောင်စီမှ K-8W Jet Fighter အသုံးပြု၍ တနင်္သာရီမြို့နယ်ရှိ ဆင်ခေါင်းရွာ ဘုရားတောင်ကိုနှင့် ဘန်လောကျေးရွာတို့ကို လေကြောင်းမှ ဗုံးကြဲတိုက်ခိုက်ခဲ့သေးသည်။
