ဆိုင်းမင်း/People’s Spring
မန္တလေးနန်းတွင်းက တိုင်းစစ်ဌာနချုပ်ဆီ ရှော့တိုက်ဒုံးနဲ့ပစ်မှတ်ထားတိုက်ခိုက်ခံရပြီးနောက် ဧရာဝတီမြစ်ကြောင်းတလျှောက် ရွာတွေကို စစ်ကောင်စီက စစ်ကြောင်းထိုးရာမှာ ဒေသခံတွေကို လမ်းပြအဖြစ် ဖမ်းဆီးခေါ်ဆောင်သွားတာရှိတယ်လို့ စုံစမ်းသိရပါတယ်။
တိုင်းစစ်ဌာနချုပ် ရှော့တိုက်ဒုံးနဲ့ပစ်ခတ်ခံရတဲ့ စက်တင်ဘာလ ၃ ရက်မှာပဲ မန္တလေးမြို့နဲ့ ၅ မိုင်ခန့်အကွာက ဧရာဝတီမြစ်ကြောင်းတလျှောက် ရွာတွေကို စစ်ကောင်စီက စစ်ကြောင်းထိုးခဲ့တာပါ။
Public Service Announcement
နန်းတွင်းဆီ ရှော့တိုက်ဒုံးနဲ့ပစ်ခတ်တဲ့နေရာဟာ ဧရာဝတီမြစ်ရိုးက ရွာတွေ ဖြစ်တယ်လို့ စစ်ကောင်စီဘက်က ယူဆထားတာလည်းဖြစ်ပါတယ်။
စက်တင်ဘာလ ၃ ရက်ကစတင်ပြီး ဧရာဝတီမြစ်အရှေ့ဘက်ကမ်း မန္တလေးတိုင်းထဲက အာလောင် ၊ နန်းတော်ကျွန်း ၊ ဉဒေါင်း ၊ သပြေသာ ၊ ပုဂံတပ် ၊ သမင်ခြံတောင်/မြောက်၊ စွန်းလွန်းရွာတွေကို ခြေလျင်စစ်ကြောင်းထိုးနေတာလို့်သိရပါတယ်။
” သူတို့ရွာစဥ်ပတ်နေတာ၊ ဒေသခံတွေကိုဖမ်းပြီး သူတို့သွားမယ့်လမ်းရဲ့ ရှေ့ကနေ လမ်းပြအနေနဲ့လျှောက်ခိုင်း လမ်းတဝက်လောက်မှပြန်လွှတ်ပေးတာ” လို့ ဒေသခံတစ်ဦးကပြောပါတယ်။
စစ်ကောင်စီစစ်ကြောင်းဟာ အင်အား ၄၀ ခန့်ပါပြီး အာလောင်နဲ့ နန်းတော်ကျွန်းကျေးရွာကြားရှိ စွန်းလွန်းကျေးရွာမှာ အထိုင်ချထားတယ်လို့ သိရပါတယ်။
စက်တင်ဘာလ ၅ ရက်အထိ စစ်ကြောင်းထိုးနေဆဲ ဖြစ်ပြီး ဒေသခံတွေကို စစ်ဆေး မေးမြန်းတာတွေ ပြုလုပ်တယ်လို့ သိရပါတယ်။
စစ်ကောင်စီဝါဒဖြန့် တယ်လီဂရမ်အချို့မှာတော့ ရှော့တိုက်ဒုံးပစ်ခတ်မှုမှာပါဝင်သူအချို့ကို ဖမ်းမိထားတယ်လို့ ဝါဒဖြန့်နေကြပေမယ့် သီးခြားအတည်မပြုနိုင်သေးပါဘူး။
