သတိုး/People’s Spring
မန္တလေးမြို့ရှိ စစ်ကောင်စီ၏ အလယ်ပိုင်းတိုင်းစစ်ဌာနချုပ်(လပခ) တိုက်ခိုက်မှုအတွင်း ဒုတပ်ရင်းမှူးအပါအဝင် ခြောက်ဦးသေဆုံးကြောင်း ပြောက်ကျားအဖွဲ့ Brave Warriors Myanmar (BWM) အဖွဲ့၏တာဝန်ရှိသူက ပြောသည်။
လပခကို စက်တင်ဘာ ၂၉ ရက် နံနက် ၂ နာရီခွဲတွင် BWM၏ စီမံမှုဖြင့် Shadow Mandalay အဖွဲ့က ၁၀၇ မမ ရှော့တိုက်ဒုန်းများဖြင့် ပစ်ခတ်တိုက်ခိုက်ခဲ့ခြင်းဖြစ်ပြီး ရှော့တိုက်ဒုန်း ၆ လုံးအနက် လပခအတွင်းသို့ လေးလုံးကျရောက်ခဲ့သည်ဟု ဆိုသည်။
Public Service Announcement
“ ၂ လုံးက ဘားတိုက်ထိပြီးဘားတိုက်မှာ စခ ၆ ဦးသေတယ်။သေတဲ့ ၆ယောက်ထဲမှာ လပခထဲက ဒုတပ်ရင်းမှူးတစ်ယောက်ပါသွားတယ်လို့ သိရတယ်။ ၂၀ ဒဏ်ရာ ရပြီး အဲထဲမှာ ၄ဦးက အရေးပေါ်ဆေးရုံ ပို့ရ။ ဘားတိုက်အဆောက်အဦး ၂လုံး က လုံးဝပျက်စီး သွားတယ်။ ရှော့ဒုန်းအစတွေ စင်လို့ တခြားအဆောက်အအုံလေးလုံး နံရံပွင့်တာအမိုးလန်တာတွေဖြစ်တယ်” ဟု အထက်ပါတာဝန်ရှိသူက ပြောသည်။
အခြားရှော့တိုက်ဒုန်း နှစ်လုံးမှာ လပခကွင်းထဲကျပြီး စစ်ဆင်ရေးကားများ ထိခိုက်ပျက်စီးသည်ဟု ၎င်းက ဆိုသည်။
အဆိုပါထိခိုက်မှုများနှင့်ပတ်သက်၍ လူထုနွေဦးအနေဖြင့် သီးခြားအတည်ပြုနိုင်ခြင်းမရှိပေ။
BWM သည် မဟာမိတ်များဖြင့် ပူးပေါင်း၍ လပခကို ပြီးခဲ့သည့် နှစ် ဒီဇင်ဘာတွင် တစ်ကြိမ် ၊ စက်တင်ဘာတွင် ၃ ရက်နှင့် ၂၉ ရက်တွင် တစ်ကြိမ်စီ စုစုပေါင်း သုံးကြိမ်တိုက်ခိုက်ခဲ့ခြင်းဖြစ်သည်။
စက်တင်ဘာ ၃ ရက်တိုက်ခိုက်မှုတွင်လည်း ဗိုလ်မှူးကြီး အဆင့်တစ်ဦးအပါအဝင် ခုနစ်ဦးသေဆုံးပြီး တရုတ်နိုင်ငံနှင့်ပူးပေါင်းလုပ်ဆောင်နေသည့် ဒရုန်းစင်တာလည်းပျက်စီးခဲ့ကြောင်း BWM ကထုတ်ပြန်ထားသည်။
“ BWM အဖွဲ့သည် ရန်သူစစ်ရှုံးကောင်စီ၏ လေတပ်များအပြင် တော်လှန်ရေးအတွက် သက်ရောက်မှုကြီးမားသည့် အခြား စစ်ရေးပစ်မှတ်ကြီးများကိုလည်း ရှာဖွေဖော်ထုတ် တိုက်ခိုက်လျက်ရှိရာ၊ တိုင်းစစ်ဌာနချုပ်များသည် သက်ဆိုင်ရာဒေသ အလိုက် ရန်သူ့တပ်ရင်းတပ်ဖွဲ့များ၏အမိန့်ပေးစနစ်အတွက် ပင်မစစ်ရေးဗဟိုချက်များဖြစ်နေသောကြောင့် ရန်သူ၏ Chain of Command ကိုဖြတ်တောက်ဖြိုခွဲရန် ရည်ရွယ်၍ ယခုလိုတိုင်းစစ်ဌာနချုပ်များကို ရွေးချယ် တိုက်ခိုက်ရခြင်းဖြစ်သည်။” BWM ၏ ထုတ်ပြန်ချက်၌ ဖော်ပြထားသည်။
