ကျော်ဇော/People’s Spring
တနင်္သာရီတိုင်း၊ လောင်းလုံးမြို့နယ်တွင် နှစ်ရက်အတွင်း ထိတွေ့တိုက်ပွဲ သုံးကြိမ်ဖြစ်ပွားပြီး စစ်ကောင်စီတပ်ဘက်မှ ထိခိုက်သေဆုံးမှုများကြောင်း လောင်းလုံးမြို့နယ်ပြည်သူ့ကာကွယ်ရေးတပ်ဖွဲ့ (LLPDF)မှ တာဝန်ရှိသူတစ်ဦးက ပြောသည်။
ထိတွေ့တိုက်ပွဲများမှာ အောက်တိုဘာ ၁၆ရက်က ရင်းဘုတ်ကျေးရွာအနီး တစ်ကြိမ်၊ ဂေါ့အင်းအဝင်နားတစ်ကြိမ်နှင့် အောက်တိုဘာ ၁၇ရက်တွင် ရေဖြူတောကျောင်းအနီး တစ်ကြိမ် အသီးသီးဖြစ်ပွားခဲ့ခြင်း ဖြစ်သည်။
Public Service Announcement
“ထိတွေ့တိုက်ပွဲကတော့ မိနစ် ၃၀၊ ၄၅ မိနစ် လောက်ရှိမယ်။ ဒါပေမဲ့ တိုက်ခိုက်မှုကတော့ တနေကုန်ဖြစ်နေတာလို့ ပြောရမယ်”ဟု LLPDF မှ တာဝန်ရှိသူတစ်ဦးက ထိတွေ့မှုအခြေအနေကို ပြောသည်။
အထက်ပါ ထိတွေ့တိုက်ပွဲများတွင် စစ်ကောင်စီဘက်မှ ၁၇ ဦးထပ်မနည်းသေဆုံးနိုင်ပြီး ထိခိုက် ဒဏ်ရာရသူများလည်းရှိကာ တော်လှန်ရေးတပ်ဖွဲ့များဘက်မှ ထိခိုက်မှုတစုံတရာ မရှိခဲ့ကြောင်း ၎င်းက ဆက်ပြောသည်။
ထို့အပြင် ကျေးရွာများသို့ စစ်ကြောင်းဝင်ရောက် ချိန်တွင် အင်အား ၁၃၀ခန့်ပါသော စစ်ကောင်စီစစ်ကြောင်းသည် ယမန်နေ့(အောက်တိုဘာ၂၀)က လောင်းလုံးမြို့ပေါ်သို့ပြန်ဆုတ်သွားချိန်တွင် အင်အား ၈၀ ခန့်သာတွေ့ရကြောင်း စုံစမ်းသိရသည်။
လက်ရှိတွင် စစ်ကောင်စီတပ်ဘက်မှ ထိတွေ့တိုက်ပွဲဖြစ်ပွားသည့်နေရာများသို့ ဒရုန်းဖြင့်လာရောက် ဗုံးကြဲတိုက်ခိုက်ခြင်းများလုပ် ဆောင်လျှက်ရှိသော်လည်း မြေပြင်စစ်ကြောင်းထိုးတိုက်ခိုက်ခြင်းများ မရှိသေးပေ။
လောင်းလုံးမြို့နယ်တွင် အောက်တိုဘာ ၁၁ ရက်ကလည်း သန်းခေါင်းစာရင်းကောက်ယူရေးလုံခြုံရေးယူရန် မြို့နယ်မီးသတ်ရုံးသို့ရောက်ရှိနေသည့် စစ်ကောင်စီတပ်သားများကို ဖက်ဒရယ်ဓူဝံကြယ်တပ်ဖွဲ့(FPF)က ဒရုန်းဖြင့် ဗုံးကြဲတိုက်ခိုက်ခဲ့သေးသည်။
