'/%3E%3C/svg%3E){kind=small}
ဟာနာဆန်/People’s Spring
မကွေးတိုင်း၊ ချောက်မြို့နယ်တိုက်ပွဲအတွင်း PDF ရဲဘော် သုံးဦးကျဆုံးပြီး စစ်ကောင်စီလေကြောင်းတိုက်ခိုက်မှုကြောင့် ပြည်သူနှစ်ဦး သေဆုံးကြောင်း မကွေးခရိုင်ကွပ်ကဲရေးရုံးက သတင်းထုတ်ပြန်သည်။
အောက်တိုဘာ ၂၇ရက် နေ့လည်ပိုင်းက ချောက်မြို့နယ်၊ ကုန်းကြီးပျူစောထီးကျေးရွာမှ လာသော အင်အား ၁၅၀ခန့်ပါ စစ်ကောင်စီစစ်ကြောင်းနှင့် ပြည်သူ့ကာကွယ်ရေးတပ်မတော် (PDF)၊ မကွေးခရိုင် အမှတ်(၁)တပ်ရင်း၊ မကွေးခရိုင် အမှတ်(၂)တပ်ရင်း၊ မြို့နယ် ပကဖ၊ Local PDFများသည် နေ့လယ် ၂နာရီမှ ၄နာရီအထိတိုက်ပွဲ ဖြစ်ပွားခဲ့သည်။
တိုက်ပွဲအတွင်း မကွေးလေတပ်မှ ဂျက်ဖိုက်တာဖြင့် သုံးကြိမ် လေကြောင်းတိုက်ခိုက်ခဲ့ပြီး ကျေးရွာနေပြည်သူများ ခိုလှုံနေသော ကျေးရွာဘုန်းကြီးကျောင်းပေါ်သို့ ကျရောက်ပေါက်ကွဲခဲ့ကြောင်း၊ ပေါက်ကွဲမှုကြောင့် ပြည်သူ၂ဦး သေဆုံးပြီး ထိခိုက်ဒဏ်ရာရသူ များပြားကြောင်း မကွေးခရိုင်ကွပ်ကဲရေးရုံးက အသိပေးသည်။
Public Service Announcement
တိုက်ပွဲအတွင်း စစ်ကောင်စီတပ်သားများ ထိခိုက်သေဆုံးမှုများပြီး FAW ကားဖြင့် သယ်ယူသွားကြောင်း မကွေးခရိုင်ကွပ်ကဲရေးရုံးက ဆိုသည်။
ပြည်သူ့ကာကွယ်ရေးတပ်မတော်ဘက်ကလည်း မကွေးခရိုင် အမှတ်(၂)တပ်ရင်းမှ ရဲဘော် တစ်ဦးနှင့် ညီနောင်တပ်ဖွဲ့မှ ရဲဘော် နှစ်ဦးကျဆုံးခဲ့ကြောင်း မကွေးခရိုင်ကွပ်ကဲရေးရုံးက ထပ်မံအသိပေးသည်။
“ရွာမဘက်မှာ တကျော့ပြန်ပြီး ထိတွေ့တိုက်ပွဲ ဖြစ်ခဲ့တာ။ တိုက်လေယာဥ်တွေနဲ့လာပြီးတော့ ဗုံးကြဲတယ်။ ရွာမကို မီးရှို့တာလည်း အိမ်ခြေ ၁၅ အိမ်လောက် ပြာကျသွားတယ်။ ရွာမဘုန်းကြီးကျောင်းလည်း ထိခိုက်ပျက်စီးသွားတယ်။ လေယာဥ်တွေနဲ့ဗုံးလာကြဲတော့ ပျက်စီးတာ။”ဟု Chauk Guerilla Force တပ်ဖွဲ့မှ ရဲဘော်တစ်ဦးက ပြောသည်။
ကျဆုံး PDFတပ်ဖွဲ့ဝင် သုံးဦးတွင် ချောက်မြို့နယ်အခြေစိုက် အာဠာဝကပြောက်ကျားတပ်ဖွဲ့ခေါင်းဆောင် ဗိုလ်ပေတလည်း ပါဝင်ကြောင်း ဒေသကာကွယ်ရေးအဖွဲ့များက အတည်ပြုသည်။ ထို့အပြင် ရဲဘော် ၇ဦးလည်း ထိခိုက်ဒဏ်ရာရရှိခဲ့ကြောင်း ဒေသကာကွယ်ရေးအဖွဲ့များက ပြောသည်။
အဆိုပါ စစ်ကောင်စီတပ်စစ်ကြောင်းအား အောက်တိုဘာ ၂၅ရက်ကတည်းက ကာကွယ်ရေးအဖွဲ့များက ကြားဖြတ်တိုက်ခိုက်မှု ၃ ကြိမ်ရှိခဲ့ပြီး စစ်ကောင်စီက နှစ်ကြိမ် လေကြောင်းတိုက်ခိုက်ခဲ့သည်။
ထို့အပြင် စစ်ကောင်စီစစ်ကြောင်းက မီးရှို့ဖျက်ဆီး၍ နရွဲတောရွာနှင့် ရွာမကျေးရွာတို့မှ နေအိမ် ၅၀ကျော် မီးလောင်ပြာကျခဲ့သည်။
အဆိုပါစစ်ကြောင်းတွင် ချောက်မြို့နယ်အခြေစိုက် ခလရ(၁၃)ခြေလျင်တပ်ရင်းအပြင် ဝါဇီတပ်၊ ပုပ္ပါးတပ်တို့မှ စစ်သားများလည်း ပါဝင်နိုင်ကြောင်း ဒေသကာကွယ်ရေးအဖွဲ့များက ခန့်မှန်းထားသည်။
