နိုင်ပကောင်း/People’s Spring
ကရင်ပြည်နယ်၊ ဖာပွန် မှာ နှစ် ၃၀ ကျော်ကြာ တပ်စွဲထားတဲ့ စစ်ကောင်စီ တပ်ရဲ့ ခေါပုတ်စခန်းကျ သွားပြီးနောက် ဆုတ်ခွာထွက်ပြေးသူတွေကို လိုက်လံတိုက်ခိုက်ရာမှာ စစ်သား ၁၆ ဦးရဲ့ ရုပ်အလောင်းရ ရှိထားတယ်လို့ KNU တပ်မဟာ (၅) ပြောရေး ဆိုခွင့်ရှိသူ ဗိုလ်မှုးကြီး စောကလယ်ဒိုက ပြောပါတယ်။
၁၉၉၂ ခုနှစ်ကစတင်ပြီး ဖာပွန်မြို့အရှေ့မြောက်ဘက်မှာ နေရာယူတပ်စွဲထားတဲ့ ခေါပုပ်စခန်းကို ပြီးခဲ့တဲ့ ရက်ပိုင်းအောက်တိုဘာလ ၂၉ ရက်က KNU နဲ့ ပူးပေါင်းတပ်တွေက တိုက်ခိုက်သိမ်းယူခဲ့တာပါ။
စခန်းသိမ်းခံရချိန် ထွက်ပြေးသွားတဲ့ စစ်ကောင်စီတပ်ဖွဲ့ဝင်တွေကို လိုက်လံတိုက်ခိုက်ရာမှာ မနေ့ နိုဝင်ဘာလ ၃ ရက်က တိုက်ပွဲ တွေ ပြင်းထန်ခဲ့ပြီး စစ်သား ၁၆ ဦးရဲ့ ရုပ်အလောင်းရတယ်လို့ ဗိုလ်မှူးကြီးစောကလယ်ဒိုက ပြောပါတယ်။
Public Service Announcement
တိုက်ပွဲအတွင်း ဖမ်းဆီးရမိသူ စစ်ကောင်စီတပ်ဖွဲ့ဝင်ဦးရေကတော့ ၁၇ ဦးရှိတယ်လို့ ဗိုလ်မှူးကြီးစောကလယ်ဒိုက အသိပေးပါတယ်။
ခေါပုပ်စခန်းတွေက ဆုတ်ခွာထွက်ပြေးတဲ့စစ်ကောင်စီတပ်ဖွဲ့ဝင်တွေ ဟာ ၁၀ မိုင်ခန့်အကွာမှာရှိတဲ့ ဖာပွန်မြို့ အခြေချ စစ်ဗျုဟာဆီ သွား ရောက်ပူးပေါင်းဖို့ ကြိုးပမ်းနေပေမယ့် KNU တပ်မဟာ (၅) နဲ့ ပူးပေါင်းတပ်တွေရဲ့ ပိတ်ဆို့ တိုက်ခိုက်တာခံနေရတာပါ။
“သူတို့(စစ်ကောင်စီတပ်)က (ဖာပွန်)မြို့ထဲကိုဝင်ဖို့ ကြိုးစားလာတယ်၊ မြို့ထဲမှာကျတော့ စကစ စစ်တပ်လည်း မရှိတော့ဘူးဆိုတော့ သူတို့ကဝင်သွားတာလည်း အဲ့ဒီ တော်လှန်ရေးပူးပေါင်းတပ်တွေဖွဲ့နဲ့ သွားတိုးတာပေါ့နော်၊ သွားတိုးတော့ မနေ့က တိုက်ပွဲအကြီးအကျယ်ဖြစ်တာပေါ့” လို့ ဗိုလ်မှူးကြီးစောကလယ်ဒိုကဆိုပါတယ်။
ခေါပုပ်စခန်းမှာ စစ်ကောင်စီတပ်ဖွဲ့ဝင်အင်အား ၁၀၀ ခန့်ရှိပြီး ပြီးခဲ့တဲ့ လပိုင်းတွေအတွင်း ထိုင်း – မြန်မာ နယ်စပ်သံလွင်မြစ် အနီးက စခန်းတွေ ကနေ ဆုတ်ခွာလာတဲ့ အင်အားတွေပါ ပေါင်းစည်းထားတဲ့ စခန်းဖြစ်ပါတယ်။
ဖာပွန်ခရိုင်ထဲမှာ အာဏာမသိမ်းခင်က စစ်တပ် တပ်စခန်း ၇၀ ခန့် ရှိပြီး လက်ရှိမှာတော့ တပ်စခန်း ၁၀ ခုကျော်သာ ကျန်ရှိတော့တယ်လို့ KNU တပ်မဟာ (၅) ရဲ့စာရင်းအရသိရပါတယ်။
ဒါပေမယ့် ဖာပွန်မှာ အဓိကကျတဲ့ အခြေချ စစ်ဗျုဟာ ကျန်ရှိနေဆဲဖြစ်ပြီး KNU နဲ့ ပူးပေါင်းတပ်တွေက ကာလရှည်ကြာ ဝန်းရံပိတ်ဆို့ ထားပါတယ်။
စစ်ကောင်စီဘက်တော့ ဖာပွန်ဒေသ မှာ တပ်စခန်းတွေ ရုတ်သိမ်းတာ၊ လက်လွှတ်ဆုံးရှုံးရတာတွေနဲ့ပတ်သက်ပြီး သတင်းထုတ်ပြန် တာမတွေ့ရပါဘူး။
