ကျော်ဇော/People’s Spring
တနင်္သာရီတိုင်း၊ ပုလောမြို့နယ်တွင် ကျေးရွာများသို့ စစ်ကြောင်းထိုးဝင်ရောက်စဥ် စစ်ကောင်စီတပ်က ပြည်သူတစ်ဦးကို လက်ပြန်ကြိုးတုပ်ကာ သတ်ဖြတ်သွားကြောင်း ဒေသခံပြည်သူများနှင့် တော်လှန် ရေးတပ်ဖွဲ့များထံမှ စုံစမ်းသိရသည်။
စစ်ကောင်စီတပ်စစ်ကြောင်း ထိုးဝင်ရောက်ခဲ့သော ကျေးရွာများအနက် ဇရပ်ဆိပ်ကျေးရွာအနီး၌ ပုလောမြို့နယ်ပြည်သူ့ကာကွယ်ရေးတပ်ဖွဲ့ (PPDF)ရဲဘော်များက နိုဝင်ဘာ ၂၃ ရက်တွင် နယ်မြေရှင်းလင်းရေးလုပ်ဆောင်စဥ် သတ်ဖြတ်မြေမြှပ်ခံထားရသည့် ရုပ်အလောင်းအား တူးဖော်တွေ့ရှိခဲ့ခြင်း ဖြစ်သည်။
“အလောင်းက သေချာမမြှုပ်ခဲ့တော့ အနံ့ ထွက်တယ်။ တူးကြည့်ရာကနေ တွေ့တာခင်ဗျ။ မျက်နှာက အတော်ပျက်စီးနေလို့ ဘယ်သူ ဘယ်ဝါဆိုတာ လက်ရှိအထိ မသိရဘူး။ အ လောင်းကိုတော့ သင်္ဂြုလ်လိုက်ပါပြီ”ဟု ပုလောမြို့နယ်ပြည်သူ့ကာကွယ်ရေးတပ်ဖွဲ့ (PPDF)မှ တာဝန်ရှိသူတစ်ဦးက လူထုနွေဦးသို့ ပြောသည်။
Public Service Announcement
လူထုနွေဦးမှ လက်ခံရရှိထားသော ရုပ်သံမှတ် တမ်းအရ စစ်ကောင်စီတပ်သားများသည် ၎င်းတို့သတ်ဖြတ်ခဲ့သည့် အမျိုးသားအား လက်ပြန်ကြိုးတုပ်၍ မှောက်လျှက်အနေအ ထားဖြင့် မြေကျင်းတခု၌ မြှပ်နှံထားသည်ကို တွေ့ရသည်။
ထို့အပြင် သေဆုံးနေသည့်အမျိုးသား၏ ခန္ဓာ ကိုယ်၌ဝတ်ဆင်ထားသော အဝတ်အစားများမှာ ညစ်ထေးစုပ်ပြဲနေသည့်အပြင် မျက်နှာမှာလည်း ပုတ်သိုးပျက်စီးနေခြင်းကြောင့် အသတ်ခံရသူ မည်သူမည်ဝါဖြစ်သည်ဆိုခြင်းကို အတိအကျ မသိရသေးပေ။
“ဇရပ်ဆိပ်ရွာသားပဲ ဖြစ်ဖို့များတယ်ခင်ဗျ”ဟု ပုလောမြို့နယ် ပြည်သူ့ကာကွယ်ရေးတပ်ဖွဲ့ (PPDF)မှ တာဝန်ရှိသူတစ်ဦးက ထင်မြင်ချက်ပေးသည်။
အလားတူ ဒေသခံပြည်သူတစ်ဦး၏အပြောအရ ဝတ်ဆင်ထားသည့် အဝတ်အစားပုံစံနှင့် လူပျောက်စာရင်းများ တိုက်ဆိုင်စစ်ဆေးမှုအရ ဒေသခံရွာသားတစ်ဦးဖြစ်နိုင်သည်ဟု ၎င်းက ထင်မြင်ချက်ပေးသော်လည်း အမည်အား ထုတ်ဖော်ပြောဆိုခြင်း မရှိပေ။
စစ်ကောင်စီတပ်များသည် ဒေသခံတစ်ဦးအားသတ်ဖြတ်မှုလုပ်ဆောင်ခဲ့သည့် ဇရပ်ဆိပ် ကျေးရွာဘက်သို့ ပြီးခဲ့သည့် အောက်တိုဘာကတည်းက ရောက်ရှိလာခြင်းဖြစ်ပြီး ယခုနိုဝင်ဘာ ၁၁ ရက်တွင် ပြန်ဆုတ်သွားခြင်း ဖြစ်သည်။
ထိုစဥ်က ဇရပ်ဆိပ်ရွာမှ ပြည်သူ ၁၀ဦးခန့်ကို စစ်ကောင်စီတပ်က ဖမ်းဆီးစစ်ဆေးမှုများရှိခဲ့ရာ ပြည်သူအချို့ပြန်လည်လွတ်မြောက်ခဲ့သော်လည်း ပျောက်ဆုံးသူအချို့လည်းရှိခဲ့သည်ဟု ဒေသခံများက ဆိုသည်။
လက်ရှိတွင် စစ်ကောင်စီတပ်သားအများစု ပြန်လည်ဆုတ်ခွာသွားပြီဖြစ်သော်လည်း နောက်ချန်အင်အားအချို့မှာ ဇရပ်ဆိပ်ရွာဘုန်းကြီးကျောင်း၌ ဆက်လက်တပ်စွဲထားသည်။
