ဇေအောင်/People’s Spring
မန္တလေးတိုင်း၊ ငါန်းဇွန်မြို့နယ်တွင် ရာသီဥတုအအေးဒဏ်ကြောင့် အအေးမိဖျားနာပြီး တစ်လအတွင်း ကလေးငယ်တစ်ဦးအပါအဝင် စစ်ဘေးရှောင် ပြည်သူ ၆ဦး သေဆုံးခဲ့ကြောင်း သတင်းရရှိသည်။
ငါန်းဇွန်မြို့နယ်တွင် ယခုနိုဝင်ဘာအတွင်း မိုးတောင်ရွာမှ အသက်(၅၀)ကျော် အဘွားအိုတစ် ဦး၊ အသက်(၇၀)ကျော်အဘွားအိုတစ်ဦးနှင့် အသက်(၃၅)နှစ်အရွယ် အမျိုးသားတစ်ဦး၊ ငါန်းမြာရွာမှ တစ်နှစ်ခွဲအရွယ် ကလေးငယ်အပါအဝင် စစ်ရှောင်သားအဖနှစ်ဦး စုစုပေါင်း ၅ဦးသည် စစ်ရှောင်ရင်း အအေးမိဖျားနာကာ သေဆုံးသွားခဲ့ကြောင်း အားမာန်သစ်ပြည်သူ့တော်လှန်ရေးအဖွဲ့မှ ကိုဇော်ဖြိုးက ပြောသည်။
ထို့အပြင် ယမန်နေ့ (နိုဝင်ဘာ ၂၅ ရက်)ညနေ ၅ နာရီခွဲခန့်ကလည်း ငါန်းဇွန်မြို့နယ်၊ ငါန်းမြာရွာမှ အသက်(၉ဝ)အရွယ် စစ်ဘေးရှောင် ဦးသန်းအောင်ဆိုသူသည် အအေးမိဖျားနာပြီး ထပ်မံဆုံးပါးသွားခဲ့ကြောင်း ၎င်းက ပြောသည်။
Public Service Announcement
“စစ်ရှောင်တွေက မြစ်ဘေးမှာနေရတာပဲ။ နောက်ပြီးမနက်ပိုင်းနှင်းကျတာနဲ့ ငယ်ရွယ်တဲ့သူတွေတောင်မှ သိပ်ဒဏ်မခံနိုင်ဘူး။”ဟု အားမာန်သစ်ပြည်သူ့တော်လှန်ရေးအဖွဲ့မှ ကိုဇော်ဖြိုးက ပြောသည်။
ထို့အပြင် အအေးမိ၍ ဖျားနာနေသော စစ်ရှောင်ပြည်သူအများအပြားလည်း ရှိနေကြောင်း သိရသည်။
စစ်ဘေးရှောင်ပြည်သူ ၄၀၀ခန့်ရှိနေပြီး ဆေးဝါး၊အနွေးထည်၊စောင်များ၊ စားနပ်ရိက္ခါများ အရေးပေါ် လိုအပ်နေကြောင်း ဒေသခံများက ပြောသည်။
အညာဒေသတွင် နိုဝင်ဘာလလယ်ပိုင်းမှစတင်ကာ အအေးဒဏ်ပိုမိုရင်ဆိုင်လာရပြီး မန္တလေးတိုင်း မြင်းခြံ၊ ငါန်းဇွန်၊ မတ္တရာမြို့နယ် များရှိ စစ်ရှောင်များအပြင် စစ်ကိုင်းတိုင်းနှင့် မကွေးတိုင်းရှိ စစ်ရှောင်ပြည်သူများမှာလည်း အနွေးထည်၊ စောင်နှင့်အမိုးအကာများ ပိုမိုလိုအပ်နေကြောင်း သတင်းရရှိသည်။
