ဟာနာဆန်/People’s Spring
မကွေးတိုင်း၊ ပွင့်ဖြူမြို့နယ် ပုသိမ် – မုံရွာလမ်းပိုင်းရှိ စစ်ကောင်စီ၏ မဲဇလီ-ဆည်တော်ကြိုးတံတားစစ်ဆေးရေးဂိတ်အား ဝင်ရောက်တိုက်ခိုက်ရာ စစ်သား ၂ဦး သေဆုံးပြီး လက်နက်ခဲယမ်းအချို့ ရရှိခဲ့ကြောင်း ပြည်သူ့ကာကွယ်ရေးတပ် မင်းဘူးခရိုင် အမှတ်(၇)တပ်ရင်း သတင်းနှင့်ပြန်ကြားရေးအဖွဲ့ဝင်တစ်ဦးက ပြောသည်။
နိုဝင်ဘာ ၂၇ ရက် နံနက် ၆ နာရီခွဲခန့်က မင်းဘူးခရိုင်၊ ပွင့်ဖြူမြို့နယ်၊ မဲဇလီ-ဆည်တော် ကြိုးတံတား ဆည်တော်ဘက်ခြမ်းကို တော်လှန်ရေးတပ်ဖွဲ့များက ပစ်ခတ်တိုက်ခိုက်ခဲ့ခြင်းဖြစ်သည်။
တိုက်ခိုက်စဥ် အဆိုပါဂိတ်ရှိ စစ်ကောင်စီတပ်သား ၃ ဦးသာရှိပြီး မိနစ် ၂၀ခန့်တိုက်ခိုက်ပြီးနောက် စစ်သားတစ်ဦးသေဆုံးကာ နှစ်ဦးထွက်ပြေးသွားခဲ့သည်။ ထို့နောက် ထွက်ပြေးသူနှစ်ဦးကိုပါ လိုက်လံပစ်ခတ်ရာ တစ်ဦးထပ်မံသေဆုံးကြောင်း မင်းဘူးခရိုင် အမှတ်(၇)တပ်ရင်း သတင်းနှင့်ပြန်ကြားရေးအဖွဲ့ဝင်က ပြောသည်။
Public Service Announcement
“ သူတို့က မဲဇလီစခန်းဘက်ကို ပြေးတာ။တံတားရဲ့ မဲဇလီဘက်ခြမ်းကို။ သေဆုံးတစ်ဦးကို အကာကွယ်ယူပြီးပြန်ပစ်တာ” ဟု ၎င်းက ပြောသည်။
ထို့အပြင် နေ့လယ် ၁နာရီခွဲခန့်တွင် စစ်ကောင်စီတပ်သားအလောင်းများအား လာကောက်သည့် အင်အား ၂၀ခန့်ပါ စစ်ကောင်စီတပ်အား အဆိုပါ တံတားဂိတ်မှာပင် အဝေးထိန်းမိုင်းဖြင့် ဖောက်ခွဲတိုက်ခိုက်ရာ စစ်သားနှစ်ဦး ထပ်မံသေဆုံးကြောင်း မင်းဘူးခရိုင် အမှတ်(၇)တပ်ရင်းက အသိပေးသည်။
အဆိုပါဂိတ်သည် မဲဇလီစခန်းနှင့် (၃)ဖာလုံခန့်အကွာတွင်တည်ရှိပြီး ပထမဆုံးအကြိမ်တိုက်ခိုက်ခဲ့ခြင်းဖြစ်ကြောင်း သိရသည်။
သေဆုံးစစ်သားထံမှ G2 သေနတ်တစ်လက်၊ ကျည်များနှင့် လက်ကိုင်ဖုန်း နှစ်လုံးအပါအဝင် စစ်အသုံးအဆောင်ပစ္စည်းများ သိမ်းဆည်းရမိကြောင်း မင်းဘူးခရိုင် အမှတ်(၇)တပ်ရင်းက ထပ်မံအသိပေးသည်။
အဆိုပါတိုက်ခိုက်မှုကို မင်းဘူးခရိုင်အမှတ်(၇)တပ်ရင်း၊ မကွေးတိုင်း ပကဖ၊ ရွေ့လျားစစ်ကြောင်း (Yenanthar Column)နှင့် ပြည်သူ့ကာကွယ်ရေးအဖွဲ့-ပွင့်ဖြူတို့က ပူးပေါင်းတိုက်ခိုက်ခဲ့ခြင်းဖြစ်သည်။
အောက်တိုဘာ ၂၁ ရက်ကလည်း ပွင့်ဖြူမြို့နယ်၊ မဲဇလီကျေးရွာအနီး စစ်ဆေးရေးဂိတ်တွင် မိုင်းကွဲပြီး စစ်သား နှစ်ဦး သေဆုံးခဲ့သေးသည်။
ပြီးခဲ့သည့် ရက်ပိုင်းအတွင်းက ပွင့်ဖြူနှင့် စေတုတ္တရာမြို့နယ်အစပ်ကို စစ်တပ်က စစ်ကြောင်းထိုးပြီး ဒေသခံပြည်သူ တစ်ဦးအား သတ်ဖြတ်သွားခဲ့သည်။
