သပိတ်ကျင်းရှိ စစ်ကောင်စီခံစစ်တွင်းငယ်ရွာမှ တော်လှန်ရေးတပ်များ ဆုတ်ခွာပေးရ၊ ခုနစ်မိုင်နှင့် ကျောက်ကြီးတွင် တိုက်ပွဲပြင်းထန်နေ

ဒီးဒီ/People’s Spring

တော်လှန်ရေးတပ်များသိမ်းပိုက်ထားသော သပိတ်ကျင်းမြို့နှင့် (၂၆)ခန့်ကွာဝေးသော တွင်းငယ်ကျေးရွာမှ တော်လှန်ရေးတပ်များ ဆုတ်ခွားပေးရပြီး ခုနစ်မိုင်နှင့် ကျောက်ကြီးကျေးရွာတွင် တိုက်ပွဲပြင်းထန်နေ​ကြောင်းပြည်သူ့လွတ်မြောက်ရေးတပ်မတော် (PLA)ပြောရေးဆိုခွင့်ရှိသူက People’s Springသို့ ပြောသည်။

သပိတ်ကျင်းမြို့သိမ်းတိုက်ပွဲမှ ထွက်ပြေးလာကြသော စစ်ကောင်စီတပ်သားများသည် မြို့နှင့် (၂၆)ခန့်ကွာဝေးသော တွင်းငယ်ကျေးရွာရှိ အမှတ် (၁၃)တပ်မတော်တန်းမြင့်လေ့ကျင့်ရေးကျောင်း (တတက-၁၃)၌ စုဝေးပြီး ခံစစ်ပြင်ဆင်ခဲ့ကြသည်ဟု PLA ပြောရေးဆိုခွင့်ရှိသူက ပြောသည်။

ထို့နောက် စစ်ကောင်စီတပ်က ပြီးခဲ့သည့် နိုဝင်ဘာ ၁၅ရက်ကစပြီး ထိုးစစ်ဆင်လာ၍ တိုက်ပွဲရက်ရှည်ဖြစ်ပွားပြီးနောက် တွင်းငယ်ရွာမှ တော်လှန်ရေးတပ်များမှာ ယမန်နေ့( ဒီဇင်ဘာ ၄ရက်)တွင် ဆုတ်ခွာခဲ့ရသည်ဟု PLA က ပြောသည်။

Public Service Announcement

တွင်းငယ်ကျေးရွာရှိ ရဲကင်းစခန်းအား မန္တလေးတိုင်း တာဝန်ခံရုံးကွပ်ကဲ၍ အမှတ် (၅၀၉)တပ်ရင်း၊ ကချင်လွတ်လပ်ရေးတပ်မတော်(KIA)၊KPDF၊ ABSDF ကျောင်းသားတပ်နှင့် သပိတ်ကျင်းမြို့နယ် ပကဖတို့က ဇူလိုင်၂၇ရက်တွင် တိုက်ခိုက်သိမ်းပိုက်ခဲ့ကြောင်း အမှတ်(၁)စစ်ဒေသရုံးက ထုတ်ပြန်ထားသည်။

ထို့အပြင် တွင်းငယ်ကျေးရွာကို PLA က ဩဂုတ် ၁၇ ရက်တွင် သိမ်းပိုက်ခဲ့သည်ဟု အသိပေးထားသည်။ ထို့နောက် အဆိုပါကျေးရွာရှိ အမှတ် (၁၃)တပ်မတော်တန်းမြင့်လေ့ကျင့်ရေးကျောင်းကို ပိတ်ဆို့ထားခဲ့သည်ဟု PLA ပြောရေးဆိုခွင့်ရှိသူက ပြောသည်။

” နိုဝင်ဘာ ၁၅မှာ စကစ စထိုးတယ်။ အင်းအာ ၂၀၀ကျော်နဲ့ ထိုးလာတယ်။ ဒရုန်း၊ လက်နက်ကြီး အလွန်သုံးလာတာ။ မနေ့က( ဒီဇင်ဘာ ၄ရက်)က ဆုတ်ခွာပေးရတယ်”ဟု PLA ပြောရေးဆိုခွင့်ရှိသူက ပြောသည်။ သို့သော် တော်လှန်ရေးတပ်များမှာ တွင်းငယ်ကျေးရွာ ဧရိယာအတွင်း၌ပင် ရှိနေသေးသည်ဟု ၎င်းက ဆက်ပြောသည်။

တွင်းငယ်ကျေးရွာသည် မန္တလေး − မြစ်ကြီးနားလမ်းပိုင်းပေါ်တွင် တည်ရှိပြီး အိမ်ခြေတစ်ထောင်ကျော်ရှိသည်။

ထို့အပြင် သပိတ်ကျင်းမြို့နှင့် (၇)မိုင်သာကွာဝေးသော ခုနစ်မိုင်ကျေးရွာတွင် တိုက်ပွဲပြင်းထန်နေသည်ဟု ဆိုသည်။

ခုနစ်မိုင်ကျေးရွာတွင် စစ်ကောင်စီ၏ လျှပ်စစ်အင်ဂျင်နီယာတပ်စခန်းရှိသည်။ အဆိုပါ နေရာ၌ တိုက်ပွဲပြင်းထန်နေခြင်းဟု PLA က ဆိုသည်။ ခုနစ်မိုင်ကျေးရွာတိုက်ပွဲကို မိုးကုတ်ဗျူဟာက ဦးဆောင်တိုက်ခိုက်နေသည်ဟု ဆိုသည်။

” ခုနစ်မိုင်မှာ တိုက်ပွဲက အတော်လေးပြင်းနေတယ်”ဟု PLA ပြောရေးဆိုခွင့်ရှိသူက ပြောသည်။

ထို့အပြင် တွင်းငယ်ကျေးရွာနှင့် (၁၃)မိုင်သာကွာဝေးသော ကျောက်ကြီးကျေးရွာတွင်လည်း တိုက်ပွဲြဖစ်နေသည်ဟု ၎င်းက ဆက်ပြောသည်။

” ကျောက်ကြီးမှာ ကျနော်တို့ တိုက်နေတာ”ဟု PLA ပြောရေးဆိုခွင့်ရှိသူက ပြောသည်။

မန္တလေးမြို့နှင့် မိုင်(၈၀)ခန့်အကွာရှိ ရွှေလုပ်ကွက်များကြောင့် နာမည်ကြီးသည့် သပိတ်ကျင်းမြို့ကို တော်လှန်ရေးတပ်ဖွဲ့များက ၉ ရက်ကြာတိုက်ခိုက်ပြီးနောက် ပြီးခဲ့သည့် သြဂုတ် ၂၅ရက်တွင် အပြီးသတ် သိမ်းပိုက်ခဲ့ကြောင်း အမျိုးသားညီညွတ်ရေးအစိုးရက အသိပေးထားသည်

ဧရာဝတီမြစ်ဘေးတွင်တည်ရှိသော သပိတ်ကျင်းမြို့ကို တော်လှန်ရေးတပ်ဖွဲ့များက သြဂုတ် ၁၇ ရက်က စတင်တိုက်ခိုက်ခဲ့ခြင်း ဖြစ်သည်။

မြို့သိမ်းတိုက်ပွဲတွင် စစ်ကောင်စီတပ်မှ ဒုတိယဗိုလ်မှူးကြီး စိုးမင်းသူကို ဖမ်းဆီးရမိခဲ့ပြီး လက်နက်ခဲယမ်းများ သိမ်းဆည်းရမိကြောင်း (၁)စစ်ဒေသက အသိပေးထားသည်။