အိမ်သွင်/People’s Spring
ကရင်ပြည်နယ်၊ ဖာပွန်မြို့နယ်ရှိ စစ်ကောင်စီတပ်၏ တောင်သုံးလုံးစခန်းနှင့်ဆင်စွယ်စခန်းတို့ကို KNLA၊ PDF၊ BPLA နှင့် FFD ပူးပေါင်းတပ်များက သိမ်းပိုက်လိုက်ပြီးလက်နက်ခဲယမ်းအများအပြားရရှိခဲ့သည်။
ပူးပေါင်းတပ်ဖွဲ့သည် KNU တပ်မဟာ(၅)နယ်မြေ၊ဒွယ်လိုးမြို့နယ်ရှိ စစ်ကောင်စီတောင်သုံးလုံးစခန်းကို ဒီဇင်ဘာလ၃ ရက် နေ့တွင် စတင်ထိုးစစ်ဆင်တိုက်ခိုက်ပြီး ဒီဇင်ဘာ၁၁ရက်နေ့ နံနက်(၅)နာရီအချိန်တွင် အပြီးသတ်သိမ်းပိုက်နိုင်ခဲ့ကြောင်း BPLA က ထုတ်ပြန်သည်။ အဆိုပါစခန်းသိမ်းတိုက်ပွဲတွင် ၁၂၀(မမ)၊ ၈၁(မမ)၊ ၆၀(မမ)လက်နက်ကြီးများအပါအဝင် လက်နက်ခဲယမ်းအများအပြားကို သိမ်းဆည်းရရှိခဲ့ကြောင်း အသိပေးထားသည်။
ဆင်စွယ်တပ်စခန်းကိုဒီဇင်ဘာလ ၄ ရက်နေ့တွင် စတင် တိုက်ခိုက်ခဲ့ပြီး ဒီဇင်ဘာလ ၉ရက်တွင် သိမ်းယူခဲ့ခြင်းဟု သတင်းရရှိသည်။စခန်းသိမ်းတိုက်ပွဲနှစ်ခုမှ စစ်သုံ့ပန်း ၃၅ဦးထက်မနည်း ဖမ်းမိထားကြောင်း PDF တစ်ဦးကပြောသည်။သို့သော်လည်း စစ်သုံ့ပန်းဖမ်းဆီးရရှိမှုအခြေအနေကိုPeople’s Springက အသေးစိတ်အတည်မပြုနိုင်သေးပေ။
Public Service Announcement
ဆင်စွယ်စခန်းနှင့်တောင်သုံးလုံးစခန်းက်ို ပူးပေါင်းတပ်များက အပြီးသတ်ရှင်းလင်းခဲ့ကြောင်းတောင်ပိုင်းတိုင်း စစ်ဒေသ၊ အမှတ်(၂) စစ်ဒေသခွဲမှူး ရဲဘော်တင်ဦးကလည်းဖေစ်ဘွခ်မှတဆင့် အသိပေးထားသည်။
အဆိုပါစစ်ဆင်ရေးကို ကရင်အမျိုးသားလွတ်မြောက်ရေးတပ်မတော်(KNLA)၊ ပြည်သူ့ကာကွယ်ရေးတပ်မတော်(PDF)၊ ဗမာပြည်သူ့လွတ်မြောက်ရေးတပ်တော်(BPLA)နှင့် Force for Federal Democracy(FFD)တို့ ပူးပေါင်းတိုက်ခိုက်ခဲ့ခြင်းဖြစ်သည်။
ထို့အပြင် နိုဝင်ဘာလ ၉ရက်ကလည်း ဖာပွန်မြို့နယ်မှ ကူးဆိပ်တံတားလုံးခြုံရေးစခန်းအား ပူးပေါင်းတပ်များက တိုက်ခိုက်သိမ်းပိုက်ခဲ့သည်။ စစ်ကောင်စီဘက်မှရှစ်ဦးသေဆုံးပြီးလက်နက်ကြီးနှစ်လက်၊ မောင်းပြန်ရိုင်ဖယ်သုံးလက်၊ကျည်ဖူး(၂၇)လုံး၊ ၆၀မမကျည်ဖူး(၂၂)လုံး၊ ဒရုန်းဖျက်ဂျယ်မာသုံးခုနှင့်မောင်းပြန်ရိုင်ဖယ်ကျည်တောင့်၂၀၀၀ကျော်သိမ်းဆည်းရမိခဲ့သည်ဟု KNU ကသတင်းထုတ်ပြန်ခဲ့သည်။
အလားတူအောက်တိုဘာလ ၃၀ရက်ကလည်းဖာပွန်ခရိုင်အတွင်း နှစ်ပေါင်း၃၀ကျော်ကြာတပ်စွဲထားသည့် စစ်ကောင်စီ၏ ခေါပုတ်စခန်းကို ပူးပေါင်းတပ်များကတိုက်ခိုက်သိမ်းယူခဲ့သည်။ အဆိုပါတိုက်ပွဲ၌ စစ်ကောင်စီဘက်မှဆယ်ဦးထက်မနက်သေဆုံးခဲ့ပြီး ထွက်ပြေးသွားသည့်တပ်ဖွဲ့ဝင်များကိုလိုက်လံတိုက်ခိုက်စဉ် ၁၄ဦး သေဆုံးပြီး ဗိုလ်ကြီးသုံးဦးအပါအဝင်စစ်သုံ့ပန်း၁၇ဦး လက်နက်များနှင့်ဖမ်းမိကြောင်း BPLA က ထုတ်ပြန်ခဲ့သည်။
