အိမ်သွင်/People’s Spring
တော်လှန်ရေးအင်အားစုများ ထိန်းချုပ်ထားသည့် ယောဒေသ၊ ဂန့်ဂေါမြို့နယ် ဇဟောကျေးရွာအထက်တန်းကျောင်း မီးရှို့ဖျက်ဆီးခံရကြောင်း ဒေသခံများက ပြောသည်။
ဇဟောကျေးရွာရှိ အထက်တန်းကျောင်းသည် ဒီဇင်ဘာ၂၉ ရက် ည ၁၁နာရီခွဲခန့်တွင် မီးစတင်လောင်ကျွမ်းခဲ့ခြင်းဖြစ်ပြီး ကျောင်းဆောင်တစ်ခုလုံး ပြာကျသွားခဲ့သည်ဟု ဒေသခံများက ပြောသည်။ အဆိုပါဖြစ်စဉ်သည် မီးရှို့ခံရခြင်းဖြစ်ကြောင်း ဒေသခံများက သုံးသပ်သည်။
” ဓာတ်ဆီလောင်းပြီးရှို့သလိုပဲ။ ဒီရွာက ကာကွယ်ရေးတပ်ဖွဲ့တွေက ထိန်းထားတာဟုတ်တယ်။ ဒါပေမယ့် အစိမ်း(ကြံ့ခိုင်ရေးပါတီဝင်)တွေလည်း အရမ်းများတယ်။ အာဏာသိမ်းတာကို ထောက်ခံတုန်းက ဦးလှဆွေ(ဘူးလက်လှဆွေ)က အဲဒီရွာကနေ လက်သီးလက်မောင်းတန်းပြီးထွက်ခဲ့တာ။ အခု ကျောင်းမီးရှို့ခံရတာတော့ တော်တော်လေးအခြေအနေဆိုးတယ်”ဟု ဒေသခံတစ်ဦးက ပြောသည်။
Public Service Announcement
ဇဟောကျေးရွာသည် အမျိုးသားညီညွတ်ရေးအစိုးရ(NUG) အုပ်ချုပ်ရေးယန္တရားလည်ပတ်နေသည့်ကျေးရွာဖြစ်သည်။ ယခု မီးရှို့ဖျက်ဆီးခံရမှုအတွက် ပြည်သူ့အုပ်ချုပ်ရေးအဖွဲ့တာဝန်ရှိသူများ၊ ပြည်သူ့လုံခြုံရေးအဖွဲ့တာဝန်ရှိသူများအနေဖြင့် ဒေသခံလူထုအား ရှင်းရှင်းလင်းလင်းအသိပေးရန်နှင့် မီးရှို့သူကို ဖော်ထုတ်ဖမ်းဆီးရန် ဒေသခံများက တောင်းဆိုနေသည်။
ဂန့်ဂေါမြို့ခံအမျိုးသမီးတစ်ဦးကလည်း ” ဒါက ပအဖရော၊ ပကဖရော၊ ပလဖပါ တာဝန်ရှိတယ်။ ကျောင်းဆောင် တစ်ဆောင်မီးရှို့ဖျက်ဆီးခံရတာက ရွာအတွက်အရမ်းအထိနာတယ်”ဟု ပြောသည်။
ဂန့်ဂေါမြို့နယ်ပြည်သူ့အုပ်ချုပ်ရေးအဖွဲ့ထံ ဆက်သွယ်မေးမြန်းရန် ဖုန်းအကြိမ်ကြိမ်ခေါ်ဆိုသော်လည်း ပြန်လည်ဖြေဆိုခြင်းမရှိပေ။
