ကျော်ဇော/People’s Spring
မကွေးတိုင်း၊ တောင်တွင်းကြီးမြို့နယ်၊ ပရပ်ကြယ်တိုက်နယ်တွင် စစ်ကောင်စီခန့်အုပ်ချုပ်ရေးမှူးတစ်ဦးအား ပစ်ခတ်ရှင်းလင်းခဲ့ကြောင်း Magway Guerrilla Warfare(မကွေးပြောက် ကျားတပ်ဖွဲ့)မှ တာဝန်ရှိသူတစ်ဦးက လူထုနွေဦးသို့ ပြောသည်။
ဇန်နဝါရီ ၂၀ ရက် နံနက် ၁၀နာရီခန့်က ပရပ်ကြယ်တိုက်နယ်၊ မိအုအောင်းအုပ်စုအုပ်ချုပ်ရေးမှူး သိန်းစိုးဆိုသူအား ၎င်း၏ နေအိမ်သို့သွားရောက်၍ သေနတ်ဖြင့် နှစ်ချက်ပစ်ခတ်ခဲ့ရာ သေဆုံးသွားကြောင်း မကွေးပြောက်ကျားတပ်ဖွဲ့က အသိပေးသည်။
ပစ်ခတ်ခံရ၍ သေဆုံးသွားသော အုပ်ချုပ်ရေးမှူးသိန်းစိုးသည် ပြည်သူလူထုထံမှ စစ်မှုထမ်းကိစ္စအတွက် ငွေကြေးများ အတင်းအဓမ္မကောက်ခံခြင်း၊ လျှပ်စစ်မီတာခများကို မတန်တဆ ကောက်ခံနေခြင်းများကြောင့် ယခုကဲ့သို့ ပစ်ခတ်ခဲ့ခြင်းဟု မကွေးပြောက်ကျားတပ်ဖွဲ့က ထုတ်ပြန်သည်။
Public Service Announcement
“အိမ်မှာ မိသားစုဝင်တွေ ရှိနေပါတယ်။ အပြစ်မရှိတဲ့အတွက် ဘာမှမလုပ်ခဲ့ပါဘူး”ဟု အုပ်ချုပ်ရေးမှူးသိန်းစိုးအား ပစ်ခတ်မှုနှင့်စပ်လျဥ်းပြီး မကွေးပြောက်ကျားတပ်ဖွဲ့မှ တာဝန်ရှိသူတစ်ဦးက လူထုနွေဦးသို့ ပြောသည်။
မိအုအောင်းကျေးရွာအုပ်ချုပ်ရေးမှူး သိန်းစိုးအား နေအိမ်၌ ဝင်ရောင်ပစ်ခတ်စဥ် နေအိမ်အတွင်း မိသားစုဝင်ခုနစ်ဦးရှိနေပြီး ဖြစ်စဥ်နှင့် သက်ဆိုင်ခြင်းမရှိသည့် ကျန်မိသားစုဝင်များကို ပစ်ခတ်ခြင်းအပြင် တစ်စုံတစ်ရာလုပ်ဆောင်ခဲ့ခြင်းမရှိကြောင်း အထက်ပါတာဝန်ရှိသူက ဆက်ပြောသည်။
မကွေးပြောက်ကျားတပ်ဖွဲ့အနေဖြင့် စစ်ကောင်စီအလိုကျ လုပ်ဆောင်နေသော သတင်းပေးဒလန်များ၊ အုပ်ချုပ်ရေးမှူးများ၊ ဌာနဆိုင်ရာဝန်ထမ်းများမှ ပြည်သူလူထုအပေါ် မတရားမှုများဆက်လက်လုပ်ကိုင်နေပါက တွေ့သည့်နေရာ၌ ပစ်ခတ်ရှင်းလင်းသွားမည်ဖြစ်ပြီး ပြည်သူများအနေနှင့်လည်း စစ်ကောင်စီနှင့် ဝေးဝေးနေ၍ ပါဝင်ကူညီပေးကြရန် တိုက်တွန်းထားသည်။
