ကဖေး/People’s Spring
တအာင်းတပ်မတော်(TNLA)ထိန်းချုပ်ထားသည့် ရှမ်းပြည်နယ်မြောက်ပိုင်း၊ကျောက်မဲမြို့နယ်ကို စစ်ကောင်စီက လေကြောင်းမှ ဗုံးကြဲတိုက်ခိုက်ခဲ့ကြောင်း သတင်းရရှိသည်။
ကျောက်မဲမြို့မြောက်ဘက် (၂)မိုင်ခန့်အကွာရှိ TNLA သိမ်းပိုက်ထားသော စစ်ကောင်စီ၏ ခြေမြန်တပ်ရင်း အမှတ်(၅၀၁၊ ၅၀၂)ကို ယနေ့ (မတ်လ ၃ရက်) နေ့လယ် ၁နာရီခန့်တွင် ပေါင်၅၀၀ ဗုံးကြဲခြင်းဟု ဒေသခံတစ်ဦးက ပြောသည်။
” လေကြောင်းကင်းထောက်တာ နေ့တိုင်းလိုလိုမြင်နေရတယ်။ ဒီနေ့တော့ ဗုံးကြဲတော့တာပဲ။ ထိခိုက်မှုတွေကတော့ ကျနော်တို့မသိနိုင်ဘူး။ ဖုန်လိုင်းလည်းမကောင်းဘူး”ဟု ဒေသခံတစ်ဦးက ပြောသည်။
Public Service Announcement
လက်တလောမေးမြန်းမှုအရ အဆောက်အဦးပျက်စီးသွားသော်လည်း လူထိခိုက်မှုမရှိခဲ့ကြောင်း သိရှိရသည်။
စစ်ကောင်စီသည် ဇန်နဝါရီ ၂၅ ရက်နှင့် ဇန်နဝါရီ ၂၇ ရက်ကလည်း ကျောက်မဲမြို့ ပြည်သူ့ဆေးရုံ၊ မြို့တော်ခန်းမအပါအဝင် မြို့ပေါ်နေရာများကို လေကြောင်းတိုက်ခိုက်ခဲ့ရာ ကျန်းမာရေးဝန်ထမ်းနှစ်ဦးအပါအဝင် ငါးဦးသေဆုံးခဲ့ပြီး၂၀ ဦးထက်မနည်းဒဏ်ရာရခဲ့သည်။
TNLA သည် ၁၀၂၇ စစ်ဆင်ရေးတွင် ရှမ်းပြည်နယ်မြောက်ပိုင်းမှ ကျောက်မဲမြို့၊ သီပေါ၊နမ့်ဆန်၊ မိုင်းလုံ၊ မိုးမိတ်၊ မန်တုံ၊နမ္မတူ၊ ကွတ်ခိုင်၊ နောင်ချို၊နမ့်ခမ်း၊မိုင်းငေါ့မြို့နှင့် မန္တလေးတိုင်းမှ မိုးကုတ်မြို့တို့ကို သိမ်းယူထားသည်။
ကျောက်မဲမြို့ကိုသိမ်းယူပြီးနောက်ပိုင်း အဆိုးရွားဆုံး လေကြောင်းတိုက်ခိုက်မှုမှာ ၂၀၂၄ နိုဝင်ဘာ ၃၀ရက်က ထုံးဘိုရပ်ကွက် အင်ကြင်းတောင်ပေါ်ရှိ သီလရှင်ကျောင်းကို တိုက်ခိုက်မှုဖြစ်သည်။ ကျောင်းထိုင်ဆရာလေးအပါအဝင် ၁၀ဦးထက်မနည်း သေဆုံးခဲ့သည်။
ကျောက်မဲမြို့ကို စစ်ကောင်စီက လေကြောင်းမှမကြာခဏ တိုက်ခိုက်နေ၍ ဒေသခံများ အင်တာနက်နှင့် ဖုန်းလိုင်းဆက်သွယ်ရေးလိုင်းအသုံးပြုမှုကို TNLAက ဇန်နဝါရီ၂၈ရက်မှစတင်၍ ပိတ်ပင်ထားသည်။
