စစ်ကိုင်းတိုင်း၊ မြောင်နှင့် မကွေးတိုင်း၊ ရေစကြိုမြို့နယ်အစပ် ရေလယ်ကျွန်းဒေသရှိ ပန်းညိုကျေးရွာအား စစ်ကောင်စီတပ်က ယနေ့(မတ်လ ၁၂ ရက်) ညနေပိုင်းတွင် မီးရှို့နေကြောင်း မြောင်မြို့နယ်ပြည်သူ့လုံခြုံရေးနှင့်ပြည်သူ့ကာကွယ်ရေးအဖွဲ့ (CDSOM)တာဝန်ခံ ကိုနွေဦးက လူထုနွေဦးသို့ ပြောသည်။
စစ်ကောင်စီတပ်သည် ရေကြောင်းနှင့် ကုန်ကြောင်း စစ်အင်အားအများအပြားဖြင့် ပန်းညိုကျေးရွာအား ယမန်နေ့ညပိုင်းတွင် ဝင်ရောက်ခဲ့ပြီးနောက် ယနေ့ ညနေ ၄နာရီခန့်ကစ၍ ရွာလုံးကျွတ်နီးပါးမီးရှို့နေခြင်းဟု အသိပေးသည်။
“အခု စစ်ကြောင်းထိုးမှုမှာ နှစ်ကြိမ်ဝင်ဖို့ကြိုးစားတာ နှစ်ကြိမ်လုံး အထိအခိုက်တွေနဲ့ပြန် ပြန်ဆုတ်ရတော့ ရေကြောင်းကပါ လာကူနေတာ”ဟု ကိုနွေဦးက စစ်ကောင်စီတပ်၏ စစ်ကြောင်းထိုးမီးရှို့နေမှုအပေါ် ရှင်းပြသည်။
Public Service Announcement
စစ်တပ်အာဏာသိမ်းပြီးနောက်ပိုင်းတွင် အိမ်ခြေ ၄၀၀ကျော်ရှိသည့် ပန်းညိုကျေးရွာကို စစ်ကောင်စီတပ်က ၂၀၂၂ နှင့် ၂၀၂၃ တို့တွင် နှစ်ကြိမ်မီးရှို့ခဲ့ဖူးပြီး အိမ်ခြေ ၂၀၀ ကျော် မီးရှို့ ခံခဲ့ရသည်။
“အခုက စစ်တပ်အင်အားမှာ ရေတပ်က ၆၀ကျော်၊ ကုန်းက ၁၅၀ ကျော်ပါတယ်။ရွာခံတွေကတော့ ၁၀ ရက်နေ့ကတည်းက ရွှေ့ပြောင်းထားရတယ်”ဟု မြောင်မြို့နယ်ကာကွယ်ရေးအဖွဲ့ဝင်တစ်ဦးက ပြောသည်။
မြောင်မြို့နယ် ပန်းညိုကျေးရွာဘက်သို့ မြေပြင်မှစစ်ကြောင်းထိုးလာမှုအရ ရေစကြိုမြို့နယ် သာခေါင်ကျေးရွာဘက်မှဖြစ်ပြီး အဆိုပါကျေးရွာတွင် စစ်ကောင်စီတပ်၏ နောက်ချန်အင်အား ကျန်နိုင်သေးကြောင်းလည်း ၎င်းက အသိပေးသည်။
ထို့ကြောင့် စစ်ရှောင်နေရသော ဒေသခံများအနေဖြင့် စစ်ကောင်စီတပ်များ လုံးဝမရှိတော့ကြောင်း ကာကွယ်ရေးအဖွဲ့များထံမှ သတင်းအချက်အလက်ယူပြီးမှသာ ကျေးရွာအတွင်း ဝင်ရောက်ရန် CDSOM က တိုက်တွန်းထားသည်။
ဖေဖော်ဝါရီ ၂၆ရက်ကစ၍ စစ်ကောင်စီ၏ စစ်ကြောင်းကြောင့် ရေစကြိုနယ်မြို့နယ်မှ မြေစွန်း၊ဆင်ခြေယာ၊မာလကာခြံ၊ရွှေလှန်၊ရွာသစ်ရွာ၊သာခေါင်ကြီး၊ဇရပ်နီ၊သာခေါင်လေး နှင့် ဖြုံဘူးကျေးရွာ တို့မှ ဒေသခံများမှာ စစ်ရှောင်ခဲ့ရသည်။
ထို့အပြင် မြောင်မြို့နယ်မှ နနွင်းကိုင်း၊ဆူးလေးကုန်း၊ မြစ်သာ၊ ဆင်လှောင်၊ သုခဒီပ၊ မြစ်ဆုံ၊ငါးရံ့အိုး၊ မင်းလှနှင့် ပန်းညိကျေးရွာတို့မှ ဒေသခံပြည်သူ ၂၀,၀၀၀ထက်မနည်း စစ်ရှောင်နေရကြောင်း သိရသည်။
