မတ်-၂၆၊ ၂၀၂၅။ ရဲခေါင်/People’s Spring
ပြည်ပနိုင်ငံများသို့ သွားရောက်အလုပ်လုပ်ကိုင်ရန် အလုပ်သမားများ စာမေးပွဲဖြေ၊ စာချုပ်ချုပ်ဆိုသည့် နေရာဖြစ်သော ရန်ကုန်မြို့၊မြောက်ဒဂုံမြို့နယ်ရှိ ပင်လုံခန်းမတွင် ယနေ့(မတ်လ ၂၆ ရက်) နံနက်က ဗုံးပေါက်ကွဲမှုဖြစ်ပွားခဲ့ကြောင်း သိရသည်။
မြောက်ဒဂုံမြို့နယ်၊ မင်းရဲကျော်စွာလမ်းနှင့် ဗိုလ်မင်းရောင်လမ်းထောင့်ရှိ စစ်ကောင်စီ၏ အလုပ်သမားညွှန်ကြားမှုဦးစီးဌာန၊ ရွှေ့ပြောင်းအလုပ်သမားဌာန ပင်လုံခန်းမ၏ အရှေ့မျက်နှာစာ အုတ်တံတိုင်းနှင့်ကပ်လျက် နေရာတွင် ဗုံးပေါက်ကွဲခဲ့ခြင်းဟု စုံစမ်းသိရသည်။
“ပြည်ပရောက်အလုပ်သမားတွေ စာချုပ်ချုပ်တဲ့နေရာ၊ တချို့စာမေးပွဲဖြေရတာတွေလည်း လုပ်တယ်။အဲဒီက စကစ ဝန်ထမ်းတွေက ဖိအားပေးလာလို့။ မင်းတို့ကို ဒီလိုလုပ်လို့ရတယ်ဆိုတာ ပြတာ။ အခုက တအားကို ဖိအားပေးနေတာ။ အပေါ်လည်း အခွန်ကောက်နေတာလည်း လုပ်တယ်။ ထိုင်းမှာ အလုပ်သမားတွေက သူတို့ကြောင့် အတော်ကြပ်နေတာ။ ဒီထက်ဆိုးလာရင် ထပ်ပြီးကြမ်းတာနဲ့ လုပ်မယ်”ဟု ထိုင်းရောက်မြန်မာလုပ်သားများအရေး ကူညီပေးနေသူတစ်ဦးက ပြောသည်။
Public Service Announcement
ပေါက်ကွဲမှုဖြစ်ရာ အနီးရှိ ဗိုလ်မင်းရောင်အိမ်ယာတွင် နေထိုင်သူတစ်ဦးက “ဗုံးပေါက်တာ ဖြစ်ဖြစ်ချင်းတော့မသိဘူး။မနက် မှ စစ်ကားနဲ့ ရဲတွေ ပတ်နေတာတွေ့ရလို့မှသိတာ။ရုံးရှေ့ မှာ ကွဲတာလို့ လောလောဆယ် ကြားရတယ်”ဟု ပြောသည်။
ဗုံးပေါက်ကွဲမှုကြောင့် ထိခိုက်ပျက်စီးမှု ရှိ၊မရှိကို လူထုနွေဦးက စုံစမ်းနေဆဲ ဖြစ်သည်။
မြောက်ဒဂုံမြို့နယ်ရှိ ပင်လုံခန်းမသည် အစိုးရချင်းချိတ်ဆက်၍ ပြည်ပသွားရောက်အလုပ်လုပ်ကိုင်မည့်သူများ စာမေးပွဲဖြေဆိုရပြီး OWIC(ပြည်ပအလုပ်သမားသက်သေခံကတ်) လက်မှတ်ထုတ်ပေးသည့် နေရာတစ်ခုလည်း ဖြစ်သည်။
ယခုလ တတိယပတ်ကစ၍ ပြည်ပနိုင်ငံများသို့ သွားရောက်အလုပ်လုပ်ကိုင်ခွင့်ပြုမည့် လူအရေအတွက်နှင့် အလုပ်ခေါ်စာ(Demand Latter)ကို စစ်ကောင်စီက ကန့်သတ်ထားသည်။
ထို့အပြင် ဗီဇာစည်းမျဉ်းစည်းကမ်း တင်းကြပ်မှုအပါအဝင်၊ မြန်မာနိုင်ငံမှ ပြည်ပနိုင်ငံများသို့ PJ အလုပ်အကိုင်နိုင်ငံကူးလက်မှတ်ဖြင့် ထွက်ခွာမည့်သူအားလုံးသည် မတ်လ ၁၇ ရက်ကစ၍ စစ်ကောင် စီ၏ ခွင့်ပြုချက်မရှိဘဲ ပြည်ပနိုင်ငံများသို့ ထွက်ခွာခွင့်မရှိတော့ပေ။
စစ်ကောင်စီသည် အသက် ၁၈ နှစ် ၃၅ နှစ်ကြား လူငယ်များကို ပြည်ပထွက်ခွာမှု ပိတ်ပင်ခြင်း၊ပြည်ပရောက်ရှိသူများစစ်မှုထမ်းရန် ဖိအားပေးနေခြင်းနှင့် မြန်မာလုပ်သားများ၏ လုပ်ခလစာ၏ လေးပုံတစ်ပုံကို မဖြစ်မနေလွှဲပြောင်းရန်လည်း ထိန်းချုပ်ထားသည်။
