ဧပြီ-၁၉၊၂၀၂၅။ဟန်နွေ/People’s Spring
ကရင်ပြည်နယ်နေရာအနှံ့တွင်တိုက်ပွဲများ ပြင်းထန်စွာ ဖြစ်ပွားနေကြောင်း ကရင်အမျိုးသားအစည်းအရုံး(KNU)က ယနေ့ မွန်းလွဲပိုင်း၌ ထုတ်ပြန်ခဲ့ပြီးလေကြောင်းရန်အပါအဝင်စစ်ကောင်စီ၏ ပစ်မှတ်ထားတိုက်ခိုက်မှုမခံရရေး သတိပြု နေထိုင်ကြရန်ပန်ကြားသည်။
လက်ရှိတွင် ကရင်ဒေသ၌ တိုက်ပွဲပြင်းထန်စွာ ဖြစ်ပွားလျက်ရှိရာ စစ်ကောင်စီတပ်များအနေဖြင့် အရပ်သားပြည်သူလူထုများအားပစ်မှတ်ထားပြီး စာသင်ကျောင်းများ၊ ဘုန်းကြီးကျောင်းများ၊ ဘုရားကျောင်းများ နှင့် စစ်ရှောင် ပြည်သူလူထုများ နေထိုင်ရာ နေရာ ဒေသများအတွင်းသို လက်နက်ကြီးများပစ်ခတ်ခြင်း၊ လေယာဉ်များတို့ဖြင့်ဗုံးကြဲ လျက်ရှိဟု ဖော်ပြသည်။
သတင်းမီဒီယာများ ၊ဒေသတွင်းတက်ကြွလုပ်ရှားသူများအနေဖြင့် သတင်းရယူ တင်ဆက်ရာတွင် ပြည်သူ လူထုများ ပုန်းရှောင် နေထိုင်သော နေရာများအား အာဏာသိမ်းစစ်ကောင်စီတပ်မှအလွယ် တကူရှာဖွေပြီး လေကြောင်းတိုက်ခိုက်မှုများ လက်နက်ကြီးတိုက်ခိုက်မှုများ မပြုလုပ်နိုင်ရန်အတွက် သတိထား တင်ဆက်ပေးရန် ပန်ကြားထားသည်။
Public Service Announcement
ထိုအပြင် မိဘပြည်သူလူထုများအနေဖြင့် အာဏာသိမ်း အကြမ်းဖက် စစ်ကောင်စီတပ်မှ ပစ်မှတ်ထား တိုက်ခိုက်ခံရနိုင်သော အဆောက်အဦးများ အဝေးတွင် နေထိုင်ရန်လည်းဖော်ပြထားသည်။
တိုက်ပွဲဖြစ်ပွားရာ ဒေသများ အတွင်းသို အရေးပေါ် အကြောင်းကိစ္စမရှိဘဲ သွားလာခြင်းမပြုရန်လည်း KNUကအသိပေးသည်။
KNU နှင့် စစ်ကောင်စီတို့သည် ယခုရက်ပိုင်းအတွင်း ကျုံဒိုး၊ ကော့ကရိတ် ၊ဖားပွန် ၊ တနသာ်ရီတိုင်းစသည်တို့၌ တိုက်ပွဲဖြစ်ပွားလျက်ရှိရာ စစ်ကောင်စီတပ်က လေကြောင်း တိုက်ခိုက်မှုများ ဆက်တိုက်ပြုလုပ်နေ၍ ပြည်သူ သေဆုံးထိခိုက်မှုများရှိနေသည်။
