မေ ၇၊၂၀၂၅။သက်ဝေ/People’s Spring
ထိုင်း − မြန်မာနယ်စပ် ကရင်အမျိုးသားအစည်းအရုံး(KNU) ထားဝယ်ခရိုင် တပ်မဟာ(၄) နယ်မြေထီးခီးဒေသရှိ စစ်ကောင်စီတပ်စခန်းကို KNUပူးပေါင်းတပ်က ထိုးစစ်ဆင်တိုက်ခိုက်ရာ ယခု ရက်ပိုင်းအတွင်း စစ်ကောင်စီတပ်နှင့် ရဲများ ထိုင်းနိုင်ငံအတွင်း ထွက်ပြေးသွားကြောင်း ကရင်သတင်းရင်းမြစ်က ပြောသည်။
ဧပြီ တတိယပတ်တွင် ထီးခီးဒေသနှင့်ဆက်စပ်နေသည့် ထီးထဗျူဟာစခန်းတိုက်ခိုက်သိမ်းပိုက်ခဲ့သည့် KNU လက်အောက်ခံ ကရင်အမျိုးသားလွတ်မြောက်ရေးတပ်မတော်(KNLA)၊ ကရင်အမျိုးသားကာကွယ်ရေးတပ်(KNDO)နှင့် PDF ပူးပေါင်းတပ်များသည် နယ်စပ်ကုန်သွယ်ရေးစခန်းဖြစ်သည့် ထီးခီး စစ်ကောင်စီစခန်းကို ဆက်လက်ထိုးစစ်ဆင်ခြင်းဖြစ်သည်။
တိုက်ပွဲပြင်းထန်နေပြီး ယခုမေလဆန်းတွင် စစ်ကောင်စီတပ်သားနှင့် ရဲများ အင်အား၄၀ခန့်မှာ ထိုင်းနိုင်ငံအတွင်း ထွက်ပြေးသွားကြောင်း ကရင်သတင်းရင်းမြစ်က ပြောသည်။
Public Service Announcement
” ရန်သူ ထွက်ပြေးများတယ်။ တိုက်နေဆဲ။ သူတို့ မခံနိုင်လို့ ထိုင်းဘက်ထွက်ပြေး။ ရဲ၁၀ဦး ထိုင်းဘက်ထွက်ပြေး။ ၃၀ဦးက စကစ စစ်သား ထိုင်းဘက်ထွက်ပြေး”ဟု ကရင်အမျိုးသားလွတ်မြောက်ရေးတပ်မတော်(KNLA)နှင့်နီးစပ်မှု ရှိသည့် ကရင်သတင်းရင်းမြစ်က ပြောသည်။
ကရင်ဒေသ စစ်ရေးသတင်းများ ပုံမှန်ဖော်ပြနေသည့် သတင်းရင်းမြစ်အချို့ကလည်း ထီးခီးစခန်းကို KNUတပ်မဟာ(၄)နှင့် ပူးပေါင်းအဖွဲ့က ပြင်းပြင်းထန်ထန် ထိုးစစ်ဆင်နေပြီး ရဲ ၉ဦးအပါအဝင် စစ်ကောင်စီတပ်ဖွဲ့ဝင် ၃၀ကျော် လက်နက်များယူပြီး ထိုင်းနိုင်ငံအတွင်းသို့ ထွက်ပြေးသွားဟု လူမှုကွန်ရက်တွင် ရေးသားထားသည်။
နယ်စပ်ဒေသရှိ စစ်ကောင်စီတပ်စခန်းများကို KNU ပူးပေါင်းတပ်များက တိုက်ခိုက်စဉ် စစ်ကောင်စီတပ်သားများ ထိုင်းနိုင်ငံအတွင်းသို့ ထွက်ပြေးသည့် ဖြစ်စဉ်များ ယခင်ကလည်း ရှိခဲ့သည်။
ထားဝယ်ခရိုင်အတွင်းရှိ တော်လှန်ရေးသတင်းရင်းမြစ်တစ်ဦးကလည်း ထီးခီးဒေသတိုက်ပွဲအတွင်း စစ်ကောင်စီတပ်များ ထွက်ပြေးသည့် သတင်းကြားသိရဟု ပြောသည်။
တိုက်ပွဲမပြီးသေးဟု တော်လှန်ရေးတပ်ဖွဲ့ သတင်းရင်းမြစ်တစ်ဦးက ပြောပြပြီး တိုက်ပွဲ ပြီးပါက သတင်းထုတ်ပြန်လိမ့်မည်ဟု ဆိုသည်။
ထီးခီးဒေသအပါအဝင် ဒေသအခြေအနေများ မေးမြန်းရန် ကရင်အမျိုးသားအစည်းအရုံး(KNU) ထားဝယ်ခရိုင် အတွင်းရေးမှူး ပဒိုစောအယ်နားထံ ဆက်သွယ်မေးမြန်းထားဆဲဖြစ်သည်။
