မေ – ၁၉ ၊၂၀၂၅ ၊ နိုင်ပကောင်း/People’s Spring
ကရင်ပြည်နယ်၊ ဖာပွန်ခရိုင် ၊ လူသောမြို့နယ်ထဲက စစ်ကောင်စီတပ်ရဲ့ လယ်မူပလောတပ်စခန်း ကို KNU တပ်မဟာ (၅) က ဝန်းရံပိတ်ဆို့ထားပြီး စတင်တိုက်ခိုက်နေပြီလို့ တပ်မဟာ (၅) ပြောရေးဆိုခွင့်ရှိသူ ဗိုလ်မှုးကြီးစောကလယ်ဒိုက ပြောပါတယ်။
ဖာပွန်မြို့နယ် မြောက်ဘက် မှာရှိတဲ့ ဒေသအခေါ် ထော်မူပလဲမဲ စခန်း( လယ်မူပလော ) ကို KNU တပ်မဟာ (၅) ဦးဆောင်တဲ့ပူးပေါင်းတပ်က အခု မေလ ၁၀ ရက်က စတင်ပြီး ဝန်းရံပိတ်ဆို့ထားတာပါ။
လက်ရှိမှာတော့စခန်း ကို စနိုက်ပါ၊ဒရုန်း၊ လက်နက်ကြီးနဲ့ပစ်ခတ်နေတယ်လို့ ဗိုလ်မှုးကြီးစောကလယ်ဒိုက အသိပေးပါတယ်။
Public Service Announcement
“တက်တိုက်တာတော့ မရှိသေးပါဘူး၊ သူပစ်တော့ အပြန်အလှန်ပေါ့နော်၊ ဟိုဘက်ကလည်းပစ်တယ် ၊ဒီဘက်ကလည်းပဲ ပစ်တာာပေါ့” လို့ ဗိုလ်မှုးကြီးစောကလယ်ဒိုက ပြောပါတယ်။
နှစ်ဖက်အပြန်အလှန်ပစ်ခတ်တိုက်ခိုက်မှုအတွင်း ထိခိုက်သေဆုံးမှု ကိုတော့ တိတိကျကျ မသိရသေးဘူးလို့ဗိုလ်မှုးကြီးစောကလယ်ဒိုက ဆိုပါတယ်။
KNU တပ်မဟာ (၅) စစ်ရေးလှုပ်ရှားရာနယ်မြေဖာပွန်ဒေသမှာရှိတဲ့ တပ်စခန်းကို ဝန်းရံပိတ်ဆို့ထားပြီး အပြန်အလှန်ပစ်ခတ်မှုတွေရှိသလို ၊စစ်ကောင်စီတပ် ကလည်း မြေပြင်မှာပိတ်ဆို့ခံရချိန် လေကြောင်းသုံးပြီး တိုက်ခိုက်တယ်လို့သိရပါတယ်။
ပြီးခဲ့တဲ့ ဧပြီလအတွင်း ဖာပွန်ခရိုင်ထဲမှာ KNU တပ်မဟာ (၅) နဲ့ စစ်ကောင်စီတပ်ကြား တိုက်ပွဲပေါင်း ၁၄၀ ခန့် ဖြစ်ပွားခဲ့တယ်လို့ KNU ရဲ့စာရင်းတွေအရသိရပါတယ်။
