မေ-၂၂၊၂၀၂၅။ဇော်ရမ်း/People’s Spring
ဒီပဲယင်းမြို့နယ်၊ အိုးတိန်တွင်းကျေးရွာစာသင်ကျောင်းကို စစ်ကောင်စီကဗုံးကြဲတိုက်ခိုက်မှုတွင် ထိခိုက်ဒဏ်ရာရရှိသူများ၏ စိတ်ဒဏ်ရာကုစားရေးအတွက်အမျိုးသားညီညွတ်ရေးအစိုးရ(NUG)ဘေးအန္တရာယ်ဆိုင်ရာစီမံခန့်ခွဲရေးဝန်ကြီးဌာန(MOHADM) နှင့် ပညာရှင်များက နှစ်သိမ့်ဆွေးနွေးပေးခဲ့ကြသည်။
အိုးတိန်တွင်းကျေးရွာစာသင်ကျောင်းအား စစ်ကောင်စီက လေကြောင်းမှဗုံးကြဲတိုက်ခိုက်ခဲ့ခြင်းကြောင့် ဆရာမ(၂) ဦး၊ ကျောင်းသား၊ကျောင်းသူ (၂၂)ဦး သေဆုံးပြီး ထိခိုက်ဒဏ်ရာရရှိသည့် ကျောင်းသား၊ ကျောင်းသူနှင့်ဆရာ၊ ဆရာမ စုစုပေါင်း (၁၀၅) ဦးခန့်ရှိသည်ဟု MOHADMက ယနေ့ မေလ ၂၁ရက်၌ သတင်းထုတ်ပြန်သည်။
ကျူးလွန်ခံရသည့်မိသားစုများနှင့်အရွယ်မရောက်သေးသည့်ကလေးငယ်များကို နှစ်သိမ့်ဆွေးနွေးခြင်းနှင့် စိတ်ခွန်အားပေးခြင်းကို ဒီပဲယင်း မြို့နယ်ပြည်သူ့အုပ်ချုပ်ရေးအဖွဲ့မှတာဝန်ရှိသူများနှင့်ပူးပေါင်းလုပ်ကိုင်ခဲ့သည်ဟု အသိပေးသည်။
Public Service Announcement
“ဆင်ခြင်ဉာဏ်ကင်းမဲ့သည့်အကြမ်းဖက်စစ်တပ်နှင့်၎င်း၏ လက်ပါးစေများကြောင့် အပြစ်မဲ့ကလေးငယ်များနှင့် ရွာသူရွာသားများမှာ အတိုင်းအဆမဲ့ထိခိုက်ခံစားကြရသည်”ဟု ထုတ်ပြန်ချက်၌ဖော်ပြထားသည်။
အွန်လိုင်းမှတဆင့် ပြုလုပ်သည့် နှစ်သိမ့်ဆွေးနွေးမှုကို MOHADM ပြည်ထောင်စုဝန်ကြီး၊ ဒုတိယဝန်ကြီးနှင့်တာဝန်ရှိသူများ၊ကလေးစိတ်ပညာဆိုင်ရာကျွမ်းကျင်ဆရာဝန်များနှင့် ပညာရှင်များ တက်ရောက်ခဲ့ကြပြီး ထိခိုက်ခံစားရသည့် မိသားစုဝင်များ၊ ကလေးသူငယ်များနှင့် ဆရာ/မများကို နှစ်သိမ့်ဆွေးနွေးခြင်း၊ စိတ်ခွန်အားပေးခြင်းနှင့် စိတ်ဖိစီးမှုများနှင့်ထိတ်လန့်ကြောက်ရွံ့မှုများလျော့ပါးစေရန် ပြုလုပ်ရမည့်နည်းလမ်းများကို မျှဝေပေးခဲ့သည်ဟု သတင်းထုတ်ပြန်ထားသည်။
“စိတ်ဒဏ်ရာတွေကြီးကြီးမားမားရထားကြတယ်။ သူတို့ကိုတော်တော်လေးဂရုစိုက်ထားရတယ်။ ကုစားဖို့မလွယ်ပေမယ့် အားလုံးဝိုင်းပြီးကြိုးစားနေကြပါတယ်”ဟုဒီပဲယင်းမြို့ဒေသခံတဦးကပြောသည်။
ထို့အပြင်စစ်ကောင်စီ၏အကြမ်းဖက်တိုက်ခိုက်မှုအတွက်တရားမျှတမှု ပြန်လည်ရရှိစေရေးအတွက် မှတ်တမ်းအထောက်အထားများရယူစုဆောင်းနေသည်ဟုလည်း MOHADMက အသိပေးထားသည်။
လေကြောင်းကဗုံးကြဲတိုက်ခိုက်မှုကြောင့်သေဆုံး၊ ဒဏ်ရာရသူများအတွက် လူသားစာနာဝန်ကြီးဌာနကထောက်ပံ့ငွေကျပ် ၁၀၅သိန်း၊ မြို့နယ်အုပ်ချုပ်ရေးအဖွဲ့များနှင့် အလှူရှင်များကလှူဒါန်းငွေကျပ် သိန်း၁၃၀၊ စုစုပေါင်း ငွေကျပ်၂၃၅သိန်းကိုထိခိုက်ခံစားရသည့် မိသားစုဝင်များထံသို့ ပေးအပ်ထောက်ပံ့ခဲ့ကြောင်းလည်းသတင်းရရှိသည်။
အိုးတိန်တွင်းကျေးရွာစာသင်ကျောင်းကိုမေလ ၁၂ရက် နံနက် ၉နာရီ၃၅ မိနစ်အချိန်ခန့်တွင်စစ်တပ်က ဗုံးကြဲခဲ့ခြင်းဖြစ်သည်။တိုက်ခိုက်မှုအား ကျူးလွန်သူ၊ စေခိုင်းသူ၊ အားပေးသူ၊ ပုံဖျက်သူ မည်သူကိုမဆို ပြတ်ပြတ်သားသား သတ်မှတ်သွားမည်ဖြစ်ပြီး တိုင်းပြည်၏ အနာဂါတ်မျိုးဆက်ကလေးငယ်များကို ဦးတည်တိုက်ခိုက်သော စစ်ကောင်စီအား တတ်နိုင်သည့်ဖက်မှတွန်းလှန်တိုက်ခိုက်ပေးကြရန် ရွှေဘိုခရိုင် အမှတ် (၁၂) တပ်ရင်းက တိုက်တွန်းထားသည်။
