ဇွန်-၁၂၊၂၀၂၅။စိုင်းနန်/People’s Spring
MNDAA ဆုတ်ခွာသွားပြီး စစ်ကောင်စီတပ်ပြန်ဝင်လာသည့် လားရှိုးမြို့တွင် ဓားပြတိုက်လုယက်မှုများမကြာခဏဖြစ်ပွားနေရာ ယနေ့(ဇွန်လ၁၂ ရက်) နေ့ခင်းပိုင်းတွင် မြို့လယ်ရှိ ဖုန်းဆိုင်တစ်ဆိုင် ဓားပြတိုက်မှုထပ်မံဖြစ်ပွားသည်။
မွန်းလွဲ ၂နာရီခွဲခန့်တွင် လားရှိုးမြို့၊ မန်ဆူကျောင်းရှေ့ရှိ ဖုန်းဆိုင်ကို အိမ်စီးကားဖြင့်လာရောက်သူငါဦးက သေနတ်ပြ၍ ဓားပြတိုက်ပြီး အိုင်ဖုန်းအချို့အပါအဝင် ဖုန်းအများအပြား ယူဆောင်သွားသည်ဟု မြို့ခံတစ်ဦးကပြောသည်။
“လွယ်လွယ်လေးပဲ တိုက်သွားတာ။စစ်ကောင်စီက သူတို့တောင် နေရာမချနိုင်သေးတာ ကျန်တာ ဘာမှမလုပ်နိုင်သေးဘူး။ ခိုးဆိုးလုယက်တွေ ပေါမှပေါပဲ”ဟုဒေသခံမျိုးသမီးတစ်ဦးကပြောသည်။
Public Service Announcement
အထက်ပါဓားပြတိုက်လုယက်မှုတွင် ဖုန်းအားလုံးဆုံးရှုံးခဲ့ပြီး ဆိုင်ရှင်နှင့်ဝန်ထမ်းများ ထိခိုက်မှုမရှိခဲ့ကြောင်း ဆိုင်ပိုင်ရှင်က လူမှုကွန်ရက်မှတစ်ဆင့် အသိပေးထားသည်။
“ကျနော့ဆိုင်ဓါးပြတိုက်ခံလိုက်ရပါတယ်။iPhoneပါကင် second အကုန်ပါသွားပါတယ်။ပိုက်ဆံတွေလဲ ပါသွားပါတယ်”ဟု ဆိုင်ရှင်က ရေးသားထားသည်။
အရှေ့မြောက်တိုင်းစစ်ဌာနချုပ်(ရမခ)အပါအဝင် လားရှိုးမြို့ကို MNDAA နှင့် ပူးပေါင်းတပ်များက၂၀၂၄ သြဂုတ်လဆန်းတွင် သိမ်းပိုက်ထိန်းချုပ်ခဲ့ပြီး အထူးဒေသ(၁)အဖြစ် ထည့်သွင်းသတ်မှတ် အုပ်ချုပ်နေစဉ် တရုတ်၏ ဖိအားကြောင့် စစ်ကောင်စီထံ ပြန်လွှဲပေးလိုက်သည်။ မြို့ပေါ်ရပ်ကွက် ၁၂ခုကိုသာ MNDAA က ပြန်ပေးခြင်းဖြစ်ပြီး ဧပြီလ ၁၉ရက်မှစ၍လားရှိုးမြို့သို့ စစ်ကောင်စီတပ် ပြန်ဝင်လာခဲ့သည်။ လဝကဌာန၊ ဆေးရုံ၊ပညာရေးရုံးတို့ဖွင့်လှစ်ထားပြီး အုပ်ချုပ်ရေး ယန္တရားလည်ပတ်အောင် စစ်ကောင်စီကကြိုးစားနေသည်။
သို့သော်စစ်ကောင်စီသည်လားရှိုးမြို့ကိုမအုပ်ချုပ်နိုင်သေးဘဲ တရားဥပဒေစိုးမိုးမှုမရှိသည့်အခြေအနေဖြစ်နေသည်ဟု မြို့ခံအချို့ကပြောသည်။
စစ်ကောင်စီပြန်ဝင်လာသည့် ဧပြီလ ၂၀ ရက်နောက်ပိုင်း ဓားပြတိုက်မှု ၁၅ မှုထက်မနည်းဖြစ်ခဲ့ပြီး တရားခံဖမ်းမိခြင်းမရှိသလိုတိုင်စရာနေရာလည်းမရှိကြောင်း မြို့ခံများကပြောသည်။
လားရှိုးမြို့တွင် နေ့ခင်းပိုင်းများ၌ပါ ဓားပြတိုက်မှုများဖြစ်ပွားနေ၍ သတိပြုနေထိုင်ကြရန် စစ်တပ်ထောက်ခံသူများကိုယ်တိုင် သတိပေးနေကြသည်။
