ဇွန်-၂၂၊၂၀၂၅။ထားမြတ်/People’s Spring
ကရင်အမျိုးသားအစည်းအရုံး(KNU)တပ်မဟာ(၆)နယ်မြေ ၊မြန်မာ-ထိုင်းနယ်စပ် လက်ကျန် စခန်းလေးခုအနက် ထိကပလယ်(ထိကပလာ) စစ်တပ်စခန်းကို ယနေ့ညနေပိုင်းတွင်သိမ်းပိုက်ရရှိပြီဖြစ်ကြောင်း KNU သတင်းရင်းမြစ်က ပြောသည်။
ထိကပလယ်တပ်စခန်းကို တော်လှန်ရေးတပ်များကတက်၍သိမ်းနိုင်ခဲ့ခြင်းဖြစ်ပြီး စစ်သားများမှာ ထွက်ပြေးသွားသည်ဟုလည်း KNU သတင်းရင်းမြစ်က ပြောသည်။
“သူများတက်ရှင်းတော့ သူတို့ ပြေးသွားတာပေါ့။ ကျနော်တို့လူတွေကစခန်းတက်သိမ်းလို့ရပြီ” ဟု သတင်းရင်းမြစ်က ပြောသည်။
Public Service Announcement
ထိကပလယ် တပ်စခန်းကျပြီဖြစ်၍ မြဝတီမြို့တောင်ဘက် နယ်စပ်တွင် ဥကရစ်ထစခန်း၊ ဝေါ်လေ ဗျူဟာ နှင့် တိသဲလယ်ကာကင်းစခန်းတို့သာ ကျန်တော့သည်။ ကျန်စခန်းများ ကိုလည်း မကြာမီ သိမ်းပိုက်နိုင်မည့်အလားအလာရှိသည်ဟု၎င်းကဆက်ပြောသည်။
အခြားစစ်ရေးသတင်းရင်းမြစ်တဦးကလည်း
“စကစတွေက စခန်းကနေ ဆုတ်ပြေးသွားတာ။ ထိုင်းဘက်ကိုပေါ့။ တော်လှန်ရေးအဖွဲ့တွေကတော့ စခန်းရသွားပြီ။ ပြေးတဲ့ စကစတွေ ဒါပေမယ့် ထိုင်းဘက်တော့မရောက်သေးဘူး။ တော်လှန်ရေးအဖွဲ့တွေက လိုက်ရှင်းနေတယ်။ မီလောက်မှာပါ။ ဒါပေမယ့် စကစတွေကလည်း လမ်းတလျှောက် မိုင်းတွေထားခဲ့တယ်ကြားတယ်။ သူတို့ကို ထိုင်းဘက်ကလည်းကြိုစောင့်နေတယ် သိရတယ်။ သူတို့မှာဒဏ်ရာရသူတွေလည်းပါတော့ သိပ်မရောက်နိုင်ဘူး။ ခုထိတော့ ရောက်တယ်မကြားသေးဘူး”ဟု စခန်းသိမ်းတိုက်ပွဲအကြောင်းပြောသည်။
တတိယမြောက်ကရင်သတင်းရင်းမြစ်တဦးကလည်း ထိကလပယ် စစ်ကောင်စီတပ်စခန်း သိမ်းပိုက်နိုင်မှုကို အတည်ပြုသည်။ ထိုအပြင် မဆုတ်တမ်းခံစစ် ထိကပလယ် စစ်ဆင်ရေးခြေကုတ်စခန်း ဆိုင်းဘုတ်ပါ စစ်ကောင်စီတပ်စခန်း မှတ်တမ်းဓာတ်ပုံကိုလည်း သတင်းရင်းမြစ်က လူမှုကွန်ရက်၌ ဖော်ပြခဲ့သည်။
KNLA ဦးဆောင်သည့် တော်လှန်ရေးပူးပေါင်းတပ်ဖွဲ့သည် မေလ ၂၃ ရက်တွင် တပ်မဟာ
(၆)နယ်မြေ ကရင်ပြည်နယ် မြ၀တီမြို့နယ် မြန်မာ-ထိုင်းနယ်စပ်ရှိ စစ်ကောင်စီ၏ ဘလယ်ဒိုတပ်စခန်း ၊ မေလ ၂၈ရက်တွင် ကနဲလေးတပ်စခန်း၊ မေလ ၂၉ရက်တွင် ရွှေအေးမြိုင် တပ်စခန်း၊ မေလ ၃၀ရက်တွင် ဘုရင့်နောင်စခန်းနှင့် မော်ခီးစခန်း ၊ ဇွန်လ ၃ရက်တွင် သေ့ဘောဘိုး တပ်စခန်းများကို ဆက်တိုက်သိမ်းပိုက်ခဲ့သည်။
ယင်းစခန်းများအနက် ဘလယ်ဒို၊ ကနဲလေး နှင့် သေ့ဘောဘိုး တပ်စခန်းများမှလက်နက်ခဲယမ်း အများအပြားသိမ်းပိုက်ရရှိသည်။ စခန်းသိမ်းတိုက်ပွဲအတွင်း စစ်ကောင်စီတပ်အထိနာခဲ့သည်။
