ဇူလိုင်-၁၀၊၂၀၂၅။ဇော်ရမ်း/People’s Spring
အာဏာသိမ်းစစ်ကောင်စီက ဖမ်းဆီးထောင်ချခဲ့ပြီးနောက် လွတ်ငြိမ်းဖြင့် ပြန်လွတ်လာသော နိုင်ငံရေးအကျဉ်းသားဟောင်းရွှေညဝါဆရာတော်သည် ယနေ့ဇူလိုင်လ၁၀ရက် နံနက်ပိုင်း၌ပျံလွန်တော်မူသွားသည်။
ကာလရှည်ခံစားနေရသော နှလုံးနှင့်အသည်းရောဂါကိုကုသနေစဉ်ရန်ကုန်မြို့ အာရှတော်ဝင်ဆေးရုံ၌ နံနက်၂ နာရီ ၄၅ မိနစ်တွင်ပျံလွန်တော်မူခြင်းဟု သတင်းရရှိသည်။
“ထောင်ထဲက ဒဏ်ရာတွေကြောင့် ရောဂါပိုဆိုးပြီး ပျံလွန်တာပါ။ ဆရာတော်ဈာပနကို ကျင်းပရေး စီစဉ်နေကြပြီ” ဟု ရွှေညဝါဆရာတော်၏ ဒကာတစ်ဦးကပြောသည်။
Public Service Announcement
ပျံလွန်တော်မူချိန်၌ သက် တော်၆၀ ရှိပြီဖြစ်သည်။ဆရာတော်သည် မြန်မာ့လူ့အဖွဲ့အစည်းအတွင်း ဖြစ်ပေါ်နေသည့် ပြဿနာများ၊ မတရားမှုများအ
ပေါ် ဝေဖန်ထောက်ပြလေ့ရှိပြီး ငြိမ်းချမ်းရေးနှင့် တရားမျှတရေးကို အလေးထား ဟောကြား လေ့ရှိသည်။ ၁၉၈၈ ခုနှစ်က ၈ လေးလုံး အရေးတော်ပုံ၊ ၂၀၀၇ ခုနှစ်က ရွှေဝါရောင်တော်လှန်ရေးတို့၌ ပါဝင်ခဲ့ပြီး အာဏာရှင်ဆန့်ကျင်ရေးလှုပ်ရှားမှုအချို့တွင် လူထုအားဦးဆောင်ခဲ့သည်။
၂၀၂၁ခုနှစ် ဖေဖော်ဝါရီလ ၁ရက်စစ်တပ်အာဏာသိမ်းသည့်နေ့တွင် ဆရာတော်အား စစ်တပ်က ဖမ်းဆီးခဲ့သည်။ ပုဒ်မ ၅၀၅ (က) ဖြင့် ထောင် ၂ နှစ်ချခဲ့ပြီး ၂၀၂၂ နှစ်ကုန်ပိုင်းတွင် လွတ်ငြိမ်းချမ်းသာခွင့်ဖြင့်ပြန်လွတ်လာခဲ့သည်။
“ဆရာတော်က နှလုံး၊ အသည်း၊ ဆီးချိုရောဂါတွေရှိတယ်။ ထောင်ထဲမှာ တော်တော် ခံခဲ့ရတာ။ အခုလည်း ထောင်ထဲမှာ ရလာတဲ့ ဒဏ်ရာတွေနဲ့ ပိုဆိုးပြီး ပျံလွန်ရတာပါ”
ရွှေညဝါဆရာတော်သည်မတ် ၂၈ စစ်ကိုင်း ငလျင်ဒဏ်ကိုပြင်းထန်စွာခံစားခဲ့ရသော အင်းလေကန်ဒေသမှငလျင်ဘေးသင့်သူများကိုလည်း ကျန်းမာရေးမကောင်းသည့်ကြားမှ ပြီခဲ့သည့်မေလတွင်သွားရောက်ထောက်ပံ့ခဲ့သေးသည်။
ရွှေညဝါဆရာတော်ဟု လူသိများသည့် ဆရာတော်သည် မှော်ဘီမြို့နယ်ရှိ ရွှေညဝါဓမ္မရတနာကျောင်းတိုက်၏ ပဓာနနာယကဆရာတော်ဖြစ်သည်။ စစ်အစိုးရလက်ထက်၂၀၁၁ ခုနှစ်ကဆရာတော်အား တရားဟောခွင့် တနှစ်ပိတ်ခဲ့ဖူးသည်။ ၂၀၁၅ ခုနှစ်တွင်လည်း သံဃာမဟာနာယကအဖွဲ့က စစ်အစိုးရအလိုကျ တရားဟောခွင့် ရာသက်ပန်ပိတ်ပင်ခဲ့သည်။ အာဏာသိမ်းစစ်ကောင်စီက ဖမ်းဆီးပြီးလွတ်ငြိမ်းဖြင့် ပြန်လွတ်လာပြီးနောက်ပိုင်း ၂၀၂၄ ခုနှစ်မှစ၍ ကျန်းမာရေးဆိုးရွားကာ ပျံလွန်တော်မူခြင်းဖြစ်သည်။
ဆရာတော်၏ ရုပ်ကလာပ်ကို ယနေ့နံနက်ပိုင်း၌ မှော်ဘီမြို့နယ်ရှိ ရွှေညဝါဓမ္မရတနာကျောင်းတိုက်သို့ ပို့ဆောင်နေသည်။
” အင်မတန်ပင်ပမ်းနွမ်းနယ်နေပြီမို့
ရွှေလသာဝင်းပတဲ့ဘုံဌာနမှာ
ချမ်းမြေ့ကြည်ဖြူစွာ
အနားယူဖို့ ကြွနှင့်ပေးဦးတော့
ရွှေညဝါဆရာတော်ရေ
ရွှေလသာမှာပါ
ရွှေလဝင်းပ သာယာနေမှာပါ”ဟု ငြိမ်းချမ်းရေးအကျိုးတော်ဆောင် ဝါရှောင်ဆရာတော်က လူမှုကွန်ရက်တွင် ရေသားထားသည်။
ရွှေညဝါဆရာတော်ပျံလွန်သွားသည့် ဇူလိုင် ၁၀ ရက်မနက်ပိုင်းမှာပင် နာမည်ကျော်စာရေးဆရာ ဆရာမောင်သာချို ကွယ်လွန်သွားခဲ့သည်။
ဆရာမောင်သာချို နှင့် ရွှေညဝါဆရာတော်တို့သည်စစ်တပ်အာဏာသိမ်းသည့်နေ့ ၂၀၂၁ ဖေဖော်ဝါရီ ၁ရက်နေ့ကတည်းကဖမ်းဆီးခံရပြီးထောင်ကျခဲ့သည်။ထိုနောက် ၂၀၂၂ နိုဝင်ဘာ ၁၇ရက်မှာ ထောင်ကတစ်ရက်တည်း ပြန်လွတ်လာကြခြင်းသည်။ ထောင်ကလွတ်လာသော်လည်းထောင်ကပါလာသောရောဂါများကို လပေါင်းများစွ ကုသမှုခံယူနေရင်း တစ်ရက်တည်းအတူ ကွယ်လွန်ခဲ့ကြခြင်း ဖြစ်သည်။
