ဇူလိုင်-၂၃၊၂၀၂၅။ဇေအောင်/People’s Spring
စစ်ကိုင်းတိုင်း၊ ရွှေဘိုမြို့နယ်မှာဆိုင်ကယ်နဲ့ထွက်လာတဲ့စစ်သားတွေတိုက်ခိုက်ခံရပြီး ၄ ဦးခန့် သေဆုံးပြီး လက်နက်ခဲယမ်းတချို့ သိမ်းဆည်းခံလိုက်ရပါတယ်။
ဇူလိုင်(၂၂) ရက် မနက်၆နာရီခွဲခန့်ကရွှေဘိုမြို့နယ်၊ ညောင်ပင်သာစိုက်ပျိုးရေးကျောင်းမှာတပ်စွဲထားတဲ့ စစ်ကောင်စီစခန်းကနေ စစ်သားနဲ့ပျူ ၆ ဦးဟာ ဆိုင်ကယ် ၃ စီးနဲ့ ရွှေဘို-ရေဦးလမ်းပေါ် ထွက်လာစဥ်မှာ PDF တွေတိုက်ခိုက်ခဲ့တာပါ။
အဆိုပါတိုက်ခိုက်မှုမှာစစ်ကောင်စီတပ်ဘက်က ၄ ဦးခန့် သေဆုံးကြောင်းရွှေဘိုခရိုင်အမှတ်(၄)တပ်ရင်းရဲ့ တာဝန်ရှိသူက ပြောပါတယ်။
Public Service Announcement
“အဲဒီလမ်းက သူတို့သွားလာလှုပ်ရှားနေတဲ့ နေရာပါ။ တိုက်ပွဲကတော့ နာရီဝက်လောက်ပါပဲ”လို့ အထက်ပါတာဝန်ရှိသူက ပြောပါတယ်။
စစ်သားနဲ့ ပျူတွေဆီကနေ G-3သေနတ် တစ်လက်၊ ကျည်ဘောက် (၂)ခု၊ ကျည် (၁၆၈)တောင့် ၊ လက်ပစ်ဗုံး( ၁)လုံးနဲ့ ဆက်စပ်ပစ္စည်းတချို့ သိမ်းဆည်းရမိခဲ့တယ်လို့ ရွှေဘိုခရိုင်အမှတ်(၄)တပ်ရင်းကထုတ်ပြန်ပါတယ်။
ဒါ့အပြင် အခင်းဖြစ်နေရာကို စစ်ကူလာတဲ့ စစ်သားတွေကိုလည်း ဒရုန်းနဲ့ ဗုံးကြဲတိုက်ခိုက်ခဲ့ရာမှာ ၄ ဦးခန့် ထပ်မံထိခိုက်ဒဏ်ရာရရှိခဲ့တယ်လို့ ရွှေဘိုခရိုင်အမှတ်(၄)တပ်ရင်းက ရုပ်သံနဲ့တကွထုတ်ပြန်ပါတယ်။စစ်ကောင်စီတပ်ကထိခိုက်မှုအခြေအနေတွေကို လူထုနွေဦးက သီးခြားအတည်ပြုနိုင်တာ မရှိသေးပါဘူး။ဒါပေမယ့် ရုပ်သံမှတ်တမ်းမှာစစ်သားတချို့ ဒရုန်းနဲ့တိုက်ခိုက်ခံရပြီးထွက်ပြေးတာကိုတွေ့ရပါတယ် ။
ညောင်ပင်သာ စိုက်ပျိုးရေးကျောင်းမှာတပ်စွဲထားတဲ့ စစ်အုပ်စုဟာ ရွှေဘို-ရေဦးသွားတဲ့ ခရီးသည်တွေကို စစ်ဆေးဖမ်းဆီးငွေညှစ်တာတွေ ပြုလုပ်နေလို့ ကွင်းလမ်းတွေကနေတဆင့် ပတ်သွားနေရတယ်လို့ ဒေသခံတွေဆီကနေ သိရပါတယ်။
