သြဂုတ် – ၄ ၊ ၂၀၂၅ ၊ နိုင်ပကောင်း/People’s Spring
ကရင်ပြည်နယ်မှာ ရေကြီးရေလျှံဖြစ်ပွားတဲ့ နှစ်ပတ်တာ ကာလအတွင်း ပြည်သူလေး ဦး အသက်ဆုံးရှုံးခဲ့ရပြီး မိုင်းနင်းမိတာနဲ့ သစ်ပင်လဲတာကြောင့် ကလေးတစ်ဦးအပါအဝင် နှစ်ဦး ထိခိုက်ဒဏ်ရာရရှိခဲ့ကြတယ်လို့ လူမှုကယ်ဆယ်ရေးအဖွဲ့ဆီကနေ သိရပါတယ်။
ဇူလိုင်လ ၂၄ ရက်ကစတင်ပြီး ကရင်ပြည်နယ်အတွင်းရေကြီး ရေလျှံမှုတွေဖြစ်ပွားရာမှာ လူသေဆုံးမှုနဲ့ ထိခိုက်ဒဏ်ရာရရှိမှုတွေဟာမြို့တော် ဘားအံမြို့ ၊ ကော့ကရိတ်မြို့ ၊ လှိုင်းဘွဲ့မြို့နယ်တွေ မှာ ရှိခဲ့တာပါ။
မိုးကြီးပြီး နောက်ဆက်တွဲအနေနဲ့ တောင်ကျရေစီးတာ ၊ မြစ်ရေကြီးတာတွေကြောင့်ကရင်ပြည်နယ်မြို့တော်ဘားအံမြို့၊နယ်စပ်ကုန်သွယ်ရေးမြဝတီ ၊ လှိုင်းဘွဲ့၊ ပိုင်ကျုံ၊ ကျိုက်ဒုံ၊ ကမမောင်း၊ ကော့ကရိတ် စတဲ့ မြို့တွေမှာ ရေကြီးခဲ့တာပါ ။ ဒါအပြင် လေပြင်းတိုက်ခတ်တာ၊ မြေပြိုတာတွေလည်း ဖြစ်ပျက်ခဲ့ပါတယ်။
Public Service Announcement
သဘာဝဘေးကိုရင်ဆိုင်နေရချိန် ဇူလိုင်လ ၂၄ ရက်က ကော့ကရိတ်မြို့နယ် နဘူး-နောင်တပွဲလမ်းမှာ ဆိုင်ကယ်နဲ့ဖြတ်သန်းသွားလာခဲ့တဲ့ ကော့ကရိတ်မြို့က စစ်ဘေးရှောင်အမျိုးသားတစ်ဦးဟာ ရေစီးနဲ့မျောပါသွားပြီး သေဆုံးသွားခဲ့ပါတယ်။
ဘားအံမြို့နယ် မင်းဇီနဲ့ ပေါ့ထော်ရွာကြားမှာလည်း ဇူလိုင် ၂၉ ရက်က အမျိုးသား ခြောက်ဦး လိုက်ပါလာတဲ့ လှေနှစ်စီး နစ်မြုပ်သွားခဲ့ရာ ငါး ဦးကို ကယ်ဆယ်နိုင်ခဲ့ပေမယ့် တစ်ဦးကတော့ ရေနစ်သေဆုံးသွားခဲ့တယ်လို့ လူမှုကယ်ဆယ်ရေးအဖွဲ့က သတင်းထုတ်ပြန်ထားပါတယ်။
ဇူလိုင် ၃၁ ရက်မှာဆိုရင် ဘားအံမြို့၊ အမှတ် ၂ ရပ်ကွက်၊ ရေပေါ်စျေးအနောက်မှာ အမျိုးသမီးတစ်ဦးနဲ့ အမျိုးသားနှစ်ဦး စုစုပေါင်း သုံးဦး လိုက်ပါလာတဲ့ လှေတစ်စီးဟာ တိမ်းမှောက်သွားခဲ့ပါတယ်။
အဲဒီဖြစ်စဉ်မှာ နှစ်ဦးကို ကယ်ဆယ်နိုင်ခဲ့ပေမယ့် ကျန်တဲ့ အမျိုးသားတစ်ဦး သေဆုံးသွားခဲ့တယ်လို့ လူမှုကယ်ဆယ်ရေးအဖွဲ့က အသိပေးပါတယ်။
ဒါ့အပြင် မနေ့ ဩဂုတ်လ၃ ရက်က ရေကြီးရေလျှံခဲ့တဲ့ ဘားအံမြို့ အမှတ် ၁ ရပ်ကွက်၊ လှာကမြင်လမ်းထောင့်နဲ့ ရွှေနှင်းဆီ ၇ လမ်းထောင့်မှာ အမျိုး သားတစ်ဦး ရေနစ်မြုပ်သေဆုံးသွားခဲ့တယ်လို့ လူမှုကယ်ဆယ်ရေးအဖွဲ့ထံက သိရပါတယ်။
ဒါတွေက ရေကြီးမှုကြောင့်သေဆုံးခဲ့တဲ့ဖြစ်ရပ်တွေဖြစ်ပြီး လှိုင်းဘွဲ့မှာတော့ ရေကြီးနေချိန် မိုင်းနင်းမိပြီး အမျိုးသားတစ်ဦး ထိခိုက်ဒဏ်ရာရခဲ့တဲ့ဖြစ်စဉ်ဖြစ်ခဲ့ပါသေးတယ်။
မြဝတီမှာလည်း သစ်ပင်လဲကျလို့ ကလေးတစ်ဦး ထိခိုက်ခဲ့ရပါတယ်။
လက်ရှိမှာတော့ ဘားအံမြို့ပေါ်မှာ သံလွင်မြစ်ရေ ပြန်လည်ကျဆင်းသွားခဲပေမယ့် အနိမ့်ပိုင်းရပ်ကွက်တချို့မှာ ရေရှိနေသေးပြီး ယာယီရေဘေးရှောင်ကယ်ဆယ်ရေးစခန်းမှာ လူဦးရေ တစ်သောင်း ခန့်ရောက်ရှိခိုလှုံနေပါတယ်။
