သြဂုတ်-၁၄၊ ၂၀၂၅။ ဇော်ရမ်း/People’s Spring
အာရက္ခတပ်တော်(AA)ထိန်းချုပ်ထားသော တောင်ကုတ်နှင့် မအီမြို့တို့ကို စစ်ကောင်စီက ဩဂုတ် ၄ရက်တွင် လေကြောင်းမှ ဗုံးကြဲပြီးနောက် ယမန်နေ့ကလည်း နောက်တကြိမ် ဗုံးကြဲခဲ့သည်။
တောင်ကုတ်မြို့နယ်တောင်ပိုင်းတစ်နေရာကို ဩဂုတ် ၁၃ ရက် ညနေ ၅ နာရီခန့်တွင် ဂျက်ဖိုက်တာဖြင့် ဗုံးကြဲပြီး တောင်ကုတ်နှင့် ဆက်စပ်နေသော မအီမြို့ကိုပါ ဗုံးကြဲသွားသည်ဟု ဒေသခံတစ်ဦးကပြောသည်။
“ဩဂုတ်လဆန်းကတည်းက လေကြောင်းကနေ ခြိမ်းခြောက်လာတာပါ။ ရခိုင်က မြို့တွေ ပိုပြီး သတိထားနေကြရတယ်။ တောင်ကုတ်နဲ့ မအီကတော့ တကြောတည်းဖြစ်တယ်။ မနေ့က တောင်ကုတ်မှာတော့ ဒေသခံ အထိခိုက်ရှိတယ်”ဟု စစ်ဘေးရှောင်နေရသော တောင်ကုတ်မြို့ခံတစ်ဦးက ပြောသည်။
Public Service Announcement
မအီမြို့တွင် လုံးတော်ပေါက်ရွာကို ဗုံးကြဲခြင်းဖြစ်ပြီး ထိခိုက်ပျက်စီးမှုရှိသော်လည်းအသေးစိတ်မသိရသေးပေ။ စစ်ကောင်စီသည် ဩဂုတ် ၄ရက်နေ့ကလည်း တောင်ကုတ်နှင့် မအီမြို့နယ်စပ်တစ်နေရာကို ဗုံးကြဲခဲ့သည်။
စစ်ကောင်စီသည် ပင်လယ်ကမ်းရိုးတန်းမြို့နယ်များဖြစ်သည့် ဂွမြို့၊ သံတွဲမြို့တို့ကို ပြီးခဲ့သည့် ဇွန်လမှစ၍ လက်နက်ကြီးများပစ်ခတ်နေပြီး ယခုရက်ပိုင်း၌ ကျောက်ဖြူမြို့နှင့် ရသေ့တောင်၊ ပုဏ္ဏားကျွန်းမြို့နယ်တို့ကို လေကြောင်းမှ ဗုံးကြဲခြင်း၊ လက်နက်ကြီးဖြင့် ပစ်ခတ်ခြင်းများ ပြုလုပ်ခဲ့သည်။
AAသည် ရခိုင်ပြည်နယ်၌ ကျောက်ဖြူ၊ စစ်တွေနှင့် မာန်အောင်မှလွဲ၍ ကျန်မြို့များကို သိမ်းယူထားပြီး စစ်ရေးရည်မှန်းချက်များအတိုင်း ဆက်လက်တိုက်ခိုက်သွားမည်ဖြစ်ကြောင်းဩဂုတ် ၁၁ရက်က ပြုလုပ်သည့် သတင်းစာရှင်းလင်းပွဲ၌ ထုတ်ဖော်ပြောကြားထားသည်။
