သြဂုတ်-၁၉၊ ၂၀၂၅။ရဲခေါင်/People’s Spring
လေကြောင်းတိုက်ခိုက်မှုကြောင့် ပြည်သူ ၃၀ကျော်သေဆုံးခဲ့ရသည့် ကရင်နီပြည်နယ်၊ မော်ချီးဒေသကို စစ်ကောင်စီက ယနေ့(သြဂုတ် ၁၉ရက်) နံနက် ၆နာရီခန့်တွင် ထပ်မံလေကြောင်းတိုက်ခိုက်ခဲ့သည်ဟု အဆိုပါ ဒေသခံများနှင့် တာဝန်ရှိသူအချို့က လူထုနွေဦးသို့ ပြောသည်။
ပြီးခဲ့သည့် နှစ်ရက် သြဂုတ် ၁၇ရက်က လေကြောင်းတိုက်ခိုက်မှုကြောင့် ဒေသခံပြည်သူ ၃၀ကျော်သေဆုံးခဲ့ရသည့် မော်ချီးဒေသ လိုခါးလိုကျေးရွာကို စစ်ကောင်စီက ယနေ့နံနက်တွင် Y12လေယာဉ်ဖြင့် ထပ်မံဗုံးကြဲတိုက်ခိုက်ရာ ပြည်သူ သုံးဦးထိခိုက်ခဲ့သည်ဟု ဆိုသည်။
“၆ နာရီ ၁၀မိနစ်။မော်ချီး လိုခါးလိုရွာ။Y 12နဲ့ ဗုံးကြဲတာ။”ဟု ကရင်နီပြည်ကြားကာလအုပ် ချုပ်ရေးကောင်စီ(IEC)တွဲဖက်အတွင်းရေးမှူး ဦးဗညားက ပြောသည်။
Public Service Announcement
သတ္တုတူးဖော်ရေးလုပ်နေသည့် ဒေသခံနှင့် ရွှေ့ ပြောင်းလုပ်သားများစွာရှိနေသည့် မော်ချီးဒေသတွင် တိုက်ပွဲလုံးဝမရှိသော်လည်း စစ်ကောင်စီက ၂၀၂၅ မတ်လနောက်ပိုင်းကစ၍ တစ်လအနည်းဆုံးနှစ်ကြိမ်ဗုံးကြဲနေခြင်းဖြစ်ကြောင်း အသိပေးသည်။
“လိုခါးလိုရွာ နှစ်လုံး၊ကျောက်ကြားဖက် သုံးလုံးပေါင်း ငါးလုံး”ဟု ယနေ့နံနက်ပိုင်း မော်ချီးဒေသဗုံးကြဲခံရသည့်ဖြစ်စဥ်သိရှိသူတစ်ဦးက ပြောသည်။
သြဂုတ် ၁၇ ရက်က မော်ချီးဒေသ လိုခါးလိုကျေးရွာရှိ ပြည်သူ့ ဆေးရုံနှင့် (၁၆)ကုန်းရပ်ကွက်ကို စစ်ကောင်စီက လေကြောင်းမှ ဗုံးကြဲခဲ့ရာ ဒေသခံပြည်သူ ၃၂ ဦး သေဆုံးပြီး ငါးဦးဒဏ်ရာရရှိထားသည်။
တရားမဝင်အာဏာသိမ်းစစ်တပ်၏ အပြစ်မဲ့ပြည်သူများအပေါ် ညှာတာမှုကင်းမဲ့စွာ လေကြောင်းဖြင့် ဗုံးကြဲတိုက်ခိုက်မှုများနှင့် လက်နက်ကြီးများဖြင့် ပစ်ခတ်တိုက်ခိုက်မှုများကို တုံ့ပြန်နိုင်ရေးအတွက် ပြည်သူများ၊ တော်လှန်ရေးအင်အားစုများနှင့်အတူ ပူးပေါင်းဆောင်ရွက်သွားမည်ဟု ကရင်နီပြည် ကြားကာလအုပ်ချုပ်ရေးကောင်စီ(IEC)က ဩဂုတ်၁၈ရက်တွင် ထုတ်ပြန်ထားသည်။
ထို့အပြင် ကုလသမဂ္ဂနှင့် အာဆီယံအပါအဝင် နိုင်ငံတကာအစိုးရများအနေဖြင့်လည်း တရားမဝင် အာဏာသိမ်းစစ်တပ်၏ ကြီးလေးသည့် စစ်ရာဇဝတ်မှုကျူးလွန်နေမှုများ အပေါ်ထိရောက်စွာ အရေးယူနိုင်ရေး IEC က တိုက်တွန်းသည်။
