စက်တင်ဘာ−၃၊ ၂၀၂၅။ ထားမြတ်/People’s Spring
အာဏာသိမ်းစစ်ကောင်စီ ကြိုးပမ်းနေသည့် ရွေးကောက်ပွဲအပေါ် မည်သည့် ပူးပေါင်းဆောင်ရွက်မှုမျိုး လုပ်ဆောင်သည့်ဖြစ်စေ အရေးယူမည်ဖြစ်ကြောင်း ပြည်သူ့ကာကွယ်ရေးတပ်မတော်(PDF) အထူးတိုင်းစစ်ဌာန ကွပ်ကဲရေးမှူး ရဲဘော်အောင်စံရှားက သတိပေး ပြောကြားလိုက်သည်။
ကရင်၊ မွန်၊ တနင်္သာရီ ဒေသအချို့နှင့် ပဲခူးတိုင်း နယ်မြေအချို့၌ ကရင်အမျိုးသားလွတ်မြောက်ရေးတပ်မတော်(KNU/KNLA)တပ်များ၊ အခြားမဟာမိတ်များဖြင့် စစ်ရေးဖော်ဆောင်နေသည့် အထူးတိုင်း စစ်ဌာန မိတ်ဆက်ခြင်းကဏ္ဍတွင် တိုင်းစစ်ဌာန လှုပ်ရှားနယ်မြေအတွင်း စစ်ကောင်စီ၏ ရွေးကောက်ပွဲ လုံး၀ ပြုလုပ်ခွင့်မရနိုင်ကြောင်း အသိပေးခဲ့သည်။
” စစ်ကော်မရှင်ရဲ့ ရွေးကောက်ပွဲဆိုတာက အတုအယောင်ရွေးကောက်ပွဲ၊ တရားမဝင်တဲ့ရွေးကောက်ပွဲဆိုတာလည်း အားလုံးသိထားဖို့လိုတယ်။ ပြီးတော့ ဒီရွေးကောက်ပွဲမှာ ပူးပေါင်းပါဝင်လိုက်ခြင်းအားဖြင့် ကိုယ့် ရဲ့ ဥပမာ မဲပေးလိုက်တယ်ဆိုရင် အဲဒီမဲက ကိုယ့်ဓားနဲ့ ကိုယ့်ပြန်ထိုးသလိုပဲပေါ့။ ကိုယ့်ဘ၀တွေပိုပြီးတော့ နစ်မြောသွားတယ်။ဒီဟာကိုလည်း ပြည်သူလူထုအားလုံး သိစေချင်တယ်ပေါ့ဗျာ။ နောက် တော်လှန်ရေးတပ်ဖွဲ့တွေအနေနဲ့ဆိုရင် ကျနော်တို့ စိုးမိုးထိန်းချုပ်ထားတဲ့နယ်မြေတွေမှာ စစ်ကော်မရှင်ရဲ့ ရွေးကောက်ပွဲနဲ့ ပတ်သက်လို့ရှိရင် ဘယ် ပူးပေါင်းဆောင်ရွက်မှုမျိုးမဆိုကျနော်တို့ အရေးယူဆောင်ရွက်သွားမှာ ဖြစ်တယ်။ ဒီဟာကိုလည်း ပြောလိုပါတယ်” ဟု ရဲဘော်အောင်စံရှား က ပြောကြားသည်။
Public Service Announcement
ရွေးကောက်ပွဲ အကြောင်းပြု၍ နယ်မြေချဲ့ထွင်သည့် ထိုးစစ်များကိုလည်း နယ်မြေ လုံး၀ မဆုံးရှုံးစေရေး၊ ပြည်သူလူထု လုံခြုံရေးနှင့် အကာအကွယ်ပေးရေးကို ဦးစားပေးသွားမည်ဖြစ်ကြောင်းအထူးတိုင်းစစ်ဌာနက ယနေ့ ထုတ်ပြန်ခဲ့သည်။
ပြည်သူလူထု ဆန္ဒနှင့်အညီ စစ်အာဏာရှင်စနစ် အပြီးတိုင် ချုပ်ငြိမ်း၍ ဖက်ဒရယ်ဒီမိုကရေစီ နိုင်ငံတော်သစ် ပေါ်ပေါက်သည်အထိ ဆက်လက်တိုက်ပွဲဝင်သွားမည်ဖြစ်ကြောင်းအထူးတိုင်းစစ်ဌာန ကွပ်ကဲရေးမှူးက အသိပေးထားသည်။
