မြဝတီမြို့တောင်ဘက်ခြမ်းဆီ စစ်ကောင်စီတပ် စစ်ဦးတည်နေ

စက်တင်ဘာ – ၈ ၊၂၀၂၅ ၊နိုင်ပကောင်း/People’s Spring

ထိုင်း – မြန်မာ ကုန်သွယ်ရေးအာရှလမ်းမကြီးမှာစစ်ရေးအရ အရေးပါတဲ့ သင်္ဃန်းညီနောင်ဒေသကို ပြန်လည်ထိန်းချုပ်နိုင်သွားတဲ့ စစ်ကောင်စီတပ်ဟာ လက်လွှတ်ဆုံးရှုံးထားရတဲ့တပ်စခန်းတွေရှိရာမြဝတီမြို့တောင်ဘက်ခြမ်းဆီ စစ်ကြောင်းထိုးဖို့ စုဖွဲ့ ပြင်ဆင်မှု ပြုလုပ်နေတယ်လို့ ကရင်စစ်ရေးသတင်းရင်းမြစ်ကပြောပါတယ်။

စစ်ကောင်စီတပ်ရဲ့အောင်ဇေယျစစ်ကြောင်းဟာမြဝတီမြို့တောင်ဘက် ရှိ လေးကေ့ကော်၊ မယ်ဝါးခီး ၊ ပဟီးကလော် ၊လက်ခတ်တောင် စခန်းကုန်းနေရာတွေကိုပြန်လည်ထိန်းချုပ်နိုင်ဖို့ပြင်ဆင်နေတာလို့အဲဒီသတင်းရင်းမြစ်က ဆိုပါတယ်။

မြေပြင်ခြေလျင်တပ်နဲ့ စစ်ကြောင်းမထိုးခင် မနေ့ စက်တင်ဘာ ၇ ရက်ညနေပိုင်းမှာ လက်ခတ်တောင်ခြေကိုလက်နက်ကြီးနဲ့ပစ်ခတ်လာသလို ဒီနေ့ (စက်တင်ဘာ ၈ ရက် )မနက် ၈ နာရီဝန်းကျင်မှာရသေ့ဂူရွာကို ဗုံးကြဲလာတာရှိတယ်လို့ သတင်းရင်းမြစ်က အသိပေးပါတယ်။

Public Service Announcement

မြဝတီမြို့စစ်ရေးသတင်းရင်းမြစ်ကလည်း “(ဗုံးကြဲတာက)ရသေ့ဂူနဲ့ လေးကေ့ကော်ကြားထဲမှာ၊ထိခိုက်မှုတော့မရှိဘူး” လို့ ပြောပါတယ်။

Google Map ရဲ့ အကွာအဝေးပြသချက်အရ ရသေ့ဂူရွာဟာ လေးကေ့ကော်မြို့သစ် နဲ့ ဆိုရင် ၃ မိုင်ခန့်သာဝေးပါတယ်။

စစ်ကောင်စီတပ်ဟာလေးကေ့ကော်ဝန်းကျင်တဝိုက်ကို လက်နက်ကြီး၊ ဒရုန်းနဲ့ တိုက်ခိုက်တာတွေရှိလာပြီးနောက်မြေပြင်ကနေ စစ်ကြောင်းထိုးလာမှာစိုးရိမ်တာကြောင့် ဒေသခံတွေဘေးလွတ်ရာဆီ စတင်တိမ်းရှောင်နေကြပြီလို့သိရပါတယ်။

အဲဒီလို စစ်ဘေးရှောင်နေရတဲ့ ပြည်သူတွေအတွက် လတ်တလောမှာ စားနပ်ရိက္ခာ၊ သောက်ရေနဲ့ အမိုးအကာတွေ အရေးပေါ်လိုအပ်နေတယ်လို့ စစ်ရှောင်ကူညီပေးနေသူတွေကအသိပေးပါတယ်။

လက်ရှိမှာစစ်ကောင်စီ ရဲ့အောင်ဇေယျစစ်ကြောင်းဟာမြဝတီမြို့အနီးကမယ်ထော်သလေး၊ မဲကနယ်ကျေးရွာတွေဘက်ကို ရောက်ရှိလာနေပြီး အဲ့ဒီတဆင့် လက်ခတ်တောင်ခြေ နဲ့ လေးကေကော်မြို့သစ်ထဲကို စစ်ကြောင်းထိုးဝင်ရောက်ဖို့ ပြင်ဆင်နေတာလို့ မြဝတီမြို့ခံ စစ်ရေးသတင်းရင်းမြစ်က ပြောပါတယ်။

အာဏာသိမ်းစစ်ကောင်စီတပ်ဟာ စက်တင်ဘာ ၆ ရက် က သင်္ဃန်းညီနောင်တပ်နယ်တစ်ခုလုံးကို ပြန်လည်ရရှိပြီးနောက် အာရှလမ်းမကြီးကို ထိန်းချုပ်နိုင်သွားပြီလို့ ကြေညာခဲ့ပါတယ်။

သင်္ဃန်းညီနောင်တပ်နယ်ဟာ မြဝတီမြို့ရဲ့ ဝင်ပေါက် ဖြစ်ပြီး တိုက်ခိုက်ရေး ခြေမြန်တပ်ရင်း သုံးရင်းနဲ့ အခြေချစစ်ဗျုဟာတစ်ခုကို စစ်ကောင်စီတပ်က တပ်တည်ထားတာပါ။

မြဝတီမှာတော့ မြို့စောင့်တပ်ဖြစ်တဲ့ အမှတ် (၂၇၅) ခြေမြန်တပ်ရင်းရှိပါတယ်။

သင်္ဃန်းညီနောင်ကိုသိမ်းပြီးနောက်မှာစစ်ကောင်စီတပ်ရဲ့စစ်ဦးဟာမြဝတီမြို့တောင်ဘက်မှာ လက်လွှတ်ခဲ့ရတဲ့ တပ်စခန်းတွေဘက်ဆီဦးတည်လာတာပါ။

မြဝတီမြို့တောင်ဘက်ထိုင်း – မြန်မာ နယ်စပ်တလျောက်ကတပ်စခန်းအများစုကို KNU နဲ့ ပူးပေါင်းတပ်တွေက ပြီးခဲ့တဲ့ လပိုင်းတွေအတွင်း တိုက်ခိုက်သိမ်းယူရာမှာ စစ်ကောင်စီတပ်ဖွဲ့ဝင်တွေဟာ စခန်းစွန့်ပြီး နယ်စပ်မျည်းကို ဖြတ်ကာ ထိုင်းဘက်ခြမ်းထဲ ဝင်ပြေးခဲ့ကြရတာပါ။