စက်တင်ဘာ – ၃၀ ၊၂၀၂၅ ၊ဆိုင်းမင်း/People’s Spring
မန္တလေးတိုင်း၊ ပြင်ဦးလွင်မြို့နယ်ထဲက ၈ ထပ်ရေတံခွန်မှာ ပြုတ်ကျပြီးပျောက်ဆုံးနေတဲ့ အမျိုးသမီးနှစ်ဦးအနက် အမေရိကန်နိုင်ငံသူရဲ့ ရုပ်အလောင်းကိုဒီနေ့ (စက်တင်ဘာလ ၃၀ ရက် )မှာပြန်တွေ့ပြီလို့ မြန်မာနိုင်ငံ လူမှုကယ်ဆယ်ရေးအဖွဲ့ (မန္တလေး) တိုင်းက ထုတ်ပြန်လာပါတယ်။
ဒီမနက် ၁၁ နာရီအချိန်က ရေတံခွန်ရဲ့ ၃ ထပ်အဆင့်မှာ ရှာတွေ့တာပါ။
ရှာတွေတဲ့ အမျိုးသမီးရုပ်အလောင်းဟာ အမေရိကန် နိုင်ငံသူဖြစ်ပြီး အသက် ၂၅ နှစ်အရွယ်ရှိပြီလို့သိရပါတယ်။ ရုပ်အလောင်းကိုတော့ ပြင်ဦးလွင် ဆေးရုံဆီပို့ဆောင်ထားပါတယ်။
Public Service Announcement
“အထက်မှာမိုးများနေတော့ ရေစီးသန်နေတယ် ၊ ကျန်တဲ့တစ်ဦးကိုထပ်ရှာနေပါတယ်”လို့ ရှာဖွေကယ်ဆယ်ရေးမှာ ပါဝင်သူတစ်ဦးကပြောပါတယ်။
ဒီမနက်မှာရုပ်အလောင်းရှာတွေ့တဲ့အမေရိကန် နိုင်ငံသူဟာကိုယ်ပိုင် ကျောင်းတစ်ခုက ဆရာမဖြစ်တယ်လို့သိရပါတယ်။ ကျန်ရှိနေတဲ့နောက်ထပ် အမျိုးသမီးကိုတော့ဆက်လက်ရှာဖွေနေဆဲပါ။
မန္တလေးတိုင်း၊ ပြင်ဦးလွင်မြို့နယ်ထဲက ၈ ထပ်ရေတံခွန်မှာမနေ့ (စက်တင် ဘာလ ၂၉ ရက်) နေ့ခင်းပိုင်း ၃ နာရီအချိန်ကတောင်ကျရေတရှိန်ထိုး ထိုးဆင်းကျလာတာကြောင့် ရေကစားနေသူတွေ ရေစီးနဲ့ မျောပါ ပြီးပြုတ်ကျခဲ့တာပါ။
ရေတံခွန်မှာလာရောက်ရေကစားတဲ့ ကိုယ်ပိုင်ကျောင်းတစ်ခုက နိုင်ငံခြား သား ၊ ဆရာ ၊ ဆရာမတွေ ပါဝင်ပြီး အမျိုးသား ၊ အမျိုးသမီး ငါးဦး ရေစီးနဲ့မျောပါ ပြုတ်ကျသွားတာလို့ စေတနာမွန်လူမှုကူညီရေးအသင်း( အုန်းချော)က ထုတ်ပြန်ထားပါတယ်။
အဲဒီ ငါး ဦးမှာရှရှားနိုင်ငံသားအမျိုးသားဟာခြေထောက်ကျိုးသွားပေမယ့် အသက်ရှင်လျက်ကယ်ဆယ်နိုင်ခဲ့တယ်လို့သိရပါတယ်။
ကျန် တဲ့ လေးဦး ကတော့အမျိုးသမီးတွေဖြစ်ပြီး အခင်းဖြစ်တဲ့ နေ့မှာ အမျိုးသမီး နှစ်ဦးကို ရေတံခွန်ရဲ့ ၃ ဆင့်မှာ သေဆုံးလျှက် ပြန်တွေ့ရပြီးကျန် နှစ်ဦးကို ဒီနေ့မှာ ဆက်လက်ရှာဖွေခဲ့တာပါ။
၈ ထပ်ရေတံခွန်က မန္တလေးတိုင်း ပုသိမ်ကြီးမြို့နယ် နဲ့ ပြင်ဦးလွင်မြို့နယ်အစပ်မှာရှိပြီး မန္တလေးကဒေသခံအများစုသွားရောက်လည်ပတ်လေ့ရှိတဲ့နေရာတစ်ခုလည်းဖြစ်ပါတယ်။
