နိုဝင်ဘာ-၅၊ ၂၀၂၅။ ထားမြတ်/People’s Spring
ပြည်သူ့ကာကွယ်ရေးတပ်မတော်(PDF) ရဲဘော်တွေအနေနဲ့ ရှေ့ဆက်လျှောက်လှမ်းရမယ့် တော်လန်ရေးလမ်းခရီးမှာ စိန်ခေါ်မှုတွေကိုသတ္တိရှိစွာ ရင်ဆိုင်နိုင်ဖို့ ၊စည်းလုံးညီညွတ်မှုကို ထိန်းသိမ်းနိုင်ဖို့နဲ့ ပြည်သူ့အကျိုးကို ရှေ့တန်းတင် ဆောင်ရွက်နိုင်ဖို့ အခိုင်အမာ ယုံကြည်မျှော်လင့်ကြောင်း PDF ကောလင်းခရိုင် ကွပ်ကဲရေးမှူးက ပြောကြားပါတယ်။
ကောလင်းခရိုင်အမှတ်(၂) တပ်ရင်း လေ့ကျင့်စုဖွဲ့မှု သင်တန်း အပတ်စဉ် (၁၀)သင်တန်းဆင်းပွဲကိုနိုဝင်ဘာလဆန်းမှာ ကျင်းပခဲ့ရာ အမျိုးသားညီညွတ်ရေးအစိုးရ(NUG)၊ ကာကွယ်ရေးဝန်ကြီးဌာန အမှတ်(၁) စစ်ဒေသ ကောလင်းခရိုင်ကွပ်ကဲရေးမှူးက ဂုဏ်ပြုသဝဏ်လွှာပေးပို့ခဲ့ရာ တာဝန်ရှိသူက သင်တန်းဆင်းပွဲမှာ ဖတ်ကြားခဲ့တာပါ။
အခုသင်တန်းကာလအတွင်းမှာ ရဲဘော်တွေဟာ ဖက်ဒရယ်ဒီမိုကရေစီစနစ် တည်ဆောက်ရေးရဲ့ အရေးပါမှုကို သိရှိစေဖို့၊ ခေတ်မီစစ်ရေးဗျူဟာတွေ၊ လက်နက်အမျိုးအစားလိုက်ကိုင်တွယ်မှုတွေ၊ မြို့ပြနဲ့ကျေးလက်တိုက်ပွဲဝင်နည်းတွေနဲ့ ပြည်သူ့အကာအကွယ်ပေးရေးဆိုင်ရာတွေကို သင်ကြားပေးခဲ့တာလို့ဆိုပါတယ်။
Public Service Announcement
ခက်ခဲစွာရရှိတဲ့ အသိပညာနဲ့ စွမ်းရည်တွေဟာ တော်လှန်ရေးအတွက် အလွန်အရေးပါတယ်လို့ ကောလင်းခရိုင်ကွပ်ကဲရေးမှူးက ပြောကြားပြီး သင်တန်းဆင်းရဲဘော်တွေဟာ NUGရဲ့ ကာကွယ်ရေးမူဝါဒနဲ့အညီ PDF ရဲ့သစ္စာလေးပါးကို အခြေခံ၍ စစ်သည်ကျင့်ဝတ်နဲ့အညီ လိုက်နာကျင့်သုံးမယ့် ရဲဘော်ကောင်းတွေဖြစ်မယ်လို့ ယုံကြည်ကြောင်းကွပ်ကဲရေးမှူးက ပြောကြားပါတယ်။
အခုလို သင်တန်းဆင်းခြင်းဟာ ပြည်သူအားလုံး လုံခြုံရေးပိုမိုတိုးတက်စေဖို့နဲ့ စစ်ကောင်စီရဲ့ အကြမ်းဖက်မှု တွေကိုတွန်းလှန်နိုင်ဖို့ အင်အားသစ်တခုထပ်မံ တိုးပွားလာခြင်းဖြစ်ကြောင်းလည်း ကွပ်ကဲရေးမှူးက ပြောပါတယ်။
ခရိုင်အဆင့် အုပ်ချုပ်ရေးနဲ့စစ်ရေးဆိုင်ရာ လုပ်ငန်းတွေမှာရဲဘော်တွေရဲ့ ကျွမ်းကျင်မှုတွေကို အပြည့်အ၀ အသုံးပြုသွားပြီး တာဝန်ယူဆောင်ရွက်မယ်လို့ ပြောပါတယ်။
မကြာမီကာလအတွင်း ဖက်ဒရယ်ဒီမိုကရေစီ ပေါ်ပေါက်ရေးအတွက် ရဲဘော်တွေရဲ့ အားထုတ်ကြိုးပမ်းမှုတွေနဲ့ အသီးအပွင့်တွေရရှိနိုင်စေဖို့ ဆုတောင်းမေတ္တာပို့သကြောင်းလည်း ကောလင်းခရိုင်ကွပ်ကဲရေးမှူးရဲ့ သဝဏ်လွှာမှာဖော်ပြထားပါတယ်။
