ဇန်နဝါရီလ – ၁၈ ၊၂၀၂၆ ၊ နိုင်ပကောင်း/People’s Spring
အာဏာသိမ်းစစ်ကောင်စီကကျင်းပနေတဲ့ရွေးကောက်ပွဲကိုကရင်အမျိုး သားအစည်းအရုံး (KNU) ရဲ့အုပ်ချုပ်ရေးနယ်မြေ ဒူပလာယာခရိုင်(ကော့ကရိတ်)မှာလူထုက ဇန်နဝါရီလ ၉ ရက်မှာ ဆန့်ကျင် ကန့်ကွက်ကြောင်းချီတက်ဆန္ဒပြခဲ့တယ်လို့ KNU ဗဟိုက ထုတ်ပြန် ပါတယ်။
ဇန်နဝါရီ ၉ ရက်၊ မနက် ၉ နာရီ ကစပြီး ဒူပလာယာခရိုင်ထဲက လူထုက နေရာတွေ ခွဲပြီး တပြိုင်နက်တည်း ငြိမ်းချမ်းစွာဆန္ဒထုတ်ဖော်ခဲ့တယ်လို့ KNU က ဆိုပါတယ်။
KNU ဒူပလာယာခရိုင်မှာ ကော့ကရိတ်မြို့နယ်၊ ကျုံဒိုးမြို့နယ်၊ နို့တကောမြို့နယ်၊ ဝင်းရေးမြို့နယ် ဆိုပြီး မြို့နယ် ၄ ခု ရှိတာပါ။
Public Service Announcement
စစ်ကောင်စီရဲ့ ရွေးကောက်ပွဲကို ဆန့်ကျင်ကန့်ကွက်ကြောင်းဆန္ဒပြတာကိုတော့ ကော့ကရိတ်မြို့နယ်က ပြည်သူ ၂,၆၅၀ ဦးခန့်၊ ကျုံဒိုးမှာ ပြည်သူ ၄၀၀ ဦးဝန်းကျင်၊ ဝင်းရေးမှာ ပြည်သူ ၂,၀၀၀ ဦးခန့် ၊ နို့တကောမြို့နယ်မှာလည်း ပြည်သူ ၂,၀၀၀ ဦးဝန်းကျင် စုစုပေါင်း ပြည်သူဦးရေ ၇,၀၀၀ ခန့် ပါဝင်ခဲ့တာလို့ KNU က ဖော်ပြပါတယ်။
စစ်ကောင်စီက ပြုလုပ်တဲ့ရွေးကောက်ပွဲဟာ အတုအယောင်သာဖြစ်ပြီး ပြည်သူ့ဆန္ဒကိုကိုယ်စားမပြုတဲ့အပြင်စစ်မှန်တဲ့ ဒီမိုကရေစီရွေးကောက်ပွဲ မဟုတ်သလို နိုင်ငံတကာအသိအမှတ်မပြုတဲ့ ရွေးကောက်ပွဲဖြစ်တယ်လို့ KNU က ပြောပါတယ်။
ဒီဇင်ဘာလ ၂၈ ရက် ၊ ဇန်နဝါရီလ ၁၁ ရက် နဲ့ ဇန်နဝါရီလ ၂၅ ရက်တို့မှာ အပိုင်းခွဲပြီးကျင်းပတဲ့ စစ်ကောင်စီရဲ့ ရွေးကောက်ပွဲမှာ ကရင်ပြည်နယ်က မြို့နယ်တွေလည်းပါဝင်ပါတယ်။
ရွေးကောက်ပွဲအပိုင်း(၁)မှာ ပြည်နယ်မြို့တော် ဘားအံ ၊ မြဝတီ ၊သံတောင်ကြီးမြို့ ၊ ရွေးကောက်ပွဲအပိုင်း (၂) မှာ ဖာပွန်နဲ့လှိုင်းဘွဲ့ တို့မှာ ပါဝင်ခဲ့ပြီး လာမယ့် ဇန်နဝါရီလ ၂၅ ရက်မှာကျင်းပမယ့် အပိုင်း (၃) မှာတော့ ကော့ကရိတ်နဲ့ ကြာအင်းဆိပ်ကြီးမြို့နယ်တို့ပါဝင်မှာပါမှာ။
ကရင်ပြည်နယ်ကို မြို့နယ် ၇ ခုနဲ့ဖွဲ့စည်းထားတာကြောင့် စစ်ကောင်စီက မြို့နယ်အားလုံးမှာ ရွေးကောက်ပွဲ ပြုလုပ်နိုင်ခဲ့တာဖြစ်ပေမယ့် ပြည်နယ်ထဲက ရပ်ကွက် ၊ကျေးရွာတွေအားလုံးမှာ မဲပုံးထောင်နိုင်ခဲ့တာတော့မဟုတ်ပါဘူး။
ဓာတ်ပုံ – KNU
