ဖေဖော်ဝါရီ-၁၁၊ ၂၀၂၆။ ထားမြတ်/People’s Spring
ကရင်အမျိုးသားခေါင်း ဆောင်တွေနဲ့ ရဲဘော် တွေရဲ့ ပေးဆပ်မှု၊ အနစ်နာခံမှုတွေနဲ့ အင်တိုက်အားတိုက် ပူးပေါင်းပါဝင် တိုက်ပွဲ ဝင်နေမှုတို့ဟာ နွေဦးတော်လှန်ရေး အောင်မြင်မှုအတွက် အဓိကကျတဲ့ မဏ္ဍိုင်ကြီးတစ်ခု ဖြစ်တယ်လို့ အမျိုးသားညီညွတ်ရေးအစိုးရ(NUG) က ဒီကနေ့ ကျရောက်တဲ့ (၇၈)နှစ်မြောက် ကရင်အမျိုးသားနေ့သို့ သဝဏ်လွှာပေးပို့ ပြောကြားလိုက်ပါတယ်။
NUG အနေနဲ့လည်း ကရင်အမျိုးသားထုတရပ်လုံးနဲ့ လက်တွဲပြီး အာဏာရှင်စနစ်မှန်သမျှ ချုပ်ငြိမ်းရေး၊ အမျိုးသားတန်းတူရေးနဲ့ ကိုယ်ပိုင်ပြဋ္ဌာန်းခွင့် အခွင့်အရေးတွေ အပြည့်အဝ အာမခံချက်ရှိတဲ့ ဖက်ဒရယ်ဒီမိုကရေစီပြည်ထောင်စု တည်ဆောက်ဖို့ သန္နိဋ္ဌာန်ပြုကြောင်း ဖော်ပြပါတယ်။
ကရင်တိုင်းသားတို့ဟာ မြန်မာနိုင်ငံ လွတ်လပ်ရေးကြိုးပမ်းမှု သမိုင်းတစ်လျှောက်မှာလည်းကောင်း၊ လွတ်လပ်ရေးရပြီးနောက်ပိုင်းအမျိုးသားရေးမျှော်မှန်းချက်တွေနဲ့ တန်းတူညီမျှရေး၊ ဖက်ဒရယ်ဒီမိုကရေစီပြည်ထောင်စု ပေါ်ထွန်းရေးအတွက် အသက်၊ သွေး၊ ချွေးများ ပေးဆပ်ပြီး ယနေ့အချိန်ထိ မဆုတ်မနစ်သော ဇွဲ၊ လုံ့လ၊ သတ္တိတို့ဖြင့် ရွပ်ရွပ်ချွံချွံ တော်လှန်နေကြတာဖြစ်ကြောင်း၊ အဲဒီလို ခိုင်မာတဲ့ တော်လှန်ရေးစိတ်ဓာတ်ကိုအစဉ်အမြဲ အလေးအနက် တန်ဖိုးထားမှတ်တမ်းတင်ကြောင်းလည်း သဝဏ်လွှာမှာ ပါရှိပါတယ်။
Public Service Announcement
အထူးသဖြင့် ယနေ့ ပြည်သူ့နွေဦးတော်လှန်ရေး အခင်းအကျင်းမှာ ကရင်အမျိုးသား အစည်းအရုံး (KNU)ရဲ့ နိုင်ငံရေးဦးဆောင်မှုနဲ့ အတူ ကရင်အမျိုးသား တော်လှန်ရေးတပ်ဖွဲ့တွေဟာ အာဏာရှင်စနစ် အမြစ်ပြတ်ရေးနဲ့ ဖက်ဒရယ်ဒီမိုကရေစီပြည်ထောင်စု တည်ဆောက်ရေးတို့မှာ အခြားသော တိုင်းရင်းသားညီနောင်တွေနဲ့အတူရှေ့တန်းမှ ဦးဆောင်ပါဝင်နေကြတာဖြစ်တယ်လို့ ဖော်ပြပါတယ်။
အဲဒီလို ဦးဆောင်ပါဝင်နေသလို တော်လှန်ရေး အင်အားစုများအကြား ဘုံသဘောတူညီချက်များ ချမှတ်နိုင်ရေးနဲ့ ဖက်ဒရယ်ယူနစ် တစ်ခုအဖြစ် “ ကော်သူးလေ” (Kawthoolei) ကို အကောင်အထည်ဖော်နိုင်မယ့် အခြေအနေသို့ ရောက်ရှိလာပြီ ဖြစ်ကြောင်း NUG ရဲ့ သဝဏ်လွှာမှာ ပါရှိပါတယ်။
NUGနဲ့ KNUတို့ဟာ အခြားသော တိုင်းရင်းသား တော်လှန်ရေးအဖွဲ့တွေဖြစ်တဲ့ ကချင်လွတ်လပ်ရေးအဖွဲ့(KIO)၊ ကရင်နီ အမျိုးသားတိုးတက်ရေးပါတီ(KNPP)၊ ချင်းအမျိုးသားတပ်ဦး(CNF) တို့နဲ့ ပူးပေါင်းပြီး တော်လှန်ရေးအောင်မြင်စွာ ဆင်နွှဲနိုင်ရေး ဆွေးနွေးနေကြတယ်လို့ ဆွေးနွေးမှုမှာပါဝင်တဲ့ KIO အဖွဲ့ ခေါင်းဆောင်တဦးဖြစ်သူ ဒုဗိုလ်ချုပ်ကြီး ဂွန်မော်က ပြီးခဲ့တဲ့ ရက်ပိုင်းမှာ အသိပေးထားပါတယ်။
KNUဥက္ကဋ္ဌ ပဒိုစောကွယ်ထူးဝင်းကလည်း စစ်အာဏာရှင်စနစ် ချုပ်ငြိမ်းရေးအတွက် တိုင်းရင်းသားလူမျိုးများအားလုံးအတူတကွ လက်တွဲပြီးအာဏာရှင်စနစ်ရဲ့ထောင့်တိုင်အားလုံးကို ဖြိချဖျက်ဆီးရမယ်လို့ ဒီကနေ့ ကရင်အမျိုးသားနေ့ မိန့်ခွန်းမှာ အလေးထားပြောကြားခဲ့ပါတယ်။
(ကေအဲန်ယူ မြိတ်ထားဝယ်ခရိုင်ဌာနချုပ်အတွင်း ကျင်းပပြုလုပ်သော (၇၈)နှစ်မြောက် ကရင် အမျိုးသားနေ့ ဂုဏ်ပြုပွဲအခမ်းအနား။ ဓာတ်ပုံ – KNU-MTD)
