ဖေဖော်ဝါရီ-၁၁၊၂၀၂၆။မိုမို/People’s Spring
မွန်ပြည်နယ်၊ ကျိုက်ထိုမြို့နယ် စစ်တောင်းမြစ်အရှေ့ခြမ်းမှာ စစ်ကြောင်းထိုးလာတဲ့ စစ်တပ်နဲ့ တိုက်ပွဲဖြစ်နေတယ်လို့ ဒေသတွင်း ကာကွယ်ရေးတပ်ဖွဲ့ဝင်တချို့က လူထုနွေဦးကို ပြောပါတယ်။
စစ်တပ်ဟာ တပ်ရင်းသုံးခုလောက်သုံးပြီး ကျိုက်ထိုမြို့နယ်၊သိမ်ဇရပ်မြို့ အထက်ပိုင်းက ကျေးရွာတွေကို အခု ဖေဖော်ဝါရီ ၈ရက်ကစတင် စစ်ကြောင်းထိုးနေတာလို့ ဆိုပါတယ်။
“ခရွဲ၊မုက္ခမော့ကို ထိုးနေတာ၊နယ်မြေစိုးမိုးရေးပဲ။လေလောဆယ် ကိုယ့်ဘက်က သုံးယောက်ကျတယ်”လို့ ကျိုက်ထိုအခြေစိုက်ရဲဘော်တစ်ဦးက ပြောပါတယ်။
Public Service Announcement
စစ်တပ်စစ်ကြောင်းထိုးတာအပြင် သိမ်ဇရပ်မြို့အခြေစိုက်စစ်တပ်ရဲ့ ခမရ(၂၀၇)တပ်ရင်းနဲ့ အမြောက်တပ်(၃၁၀) တပ်တွေကနေ လက်နက်ကြီးနဲ့ ပစ်ခတ်တာတွေရှိနေတယ်လို့ သိရပါတယ်။
ပြီးခဲ့တဲ့ ဇန်နဝါရီကတည်းက သိမ်ဇရပ်မြို့နဲ့အနီးကို ဘီးလင်းမြို့အခြေစိုက် တပ်မ(၄၄)လက် အောက်ခံ ခမရ (၃)တပ်ရင်းက စစ်ကြောင်းထိုးအင်အားဖြည့်ခဲ့တာရှိတယ်လို့လည်း စစ်ရေးသတင်းရင်းမြစ်က ပြောပါတယ်။
စစ်တပ်ရဲ့အရှေ့တောင်တိုင်းစစ်ဌာနချုပ် နယ်မြေ ဖြစ်တဲ့ ကျိုက်ထိုမြို့မှာ တပ်မ(၄၄)အခြေစိုက်ပြီး ကျိုက်ထို၊ဘီးလင်း၊သထုံနဲ့ မော်လမြိုင်မြို့နယ်တွေမှာ လက်အောက်ခံ တပ်ရင်းတွေ ရှိပါတယ်။
အခု ကျိုက်ထိုမြို့နယ်မှာ စစ်တပ်စစ်ကြောင်းထိုးနေတဲ့ စစ်တောင်းမြစ်အရှေ့ဘက်ခြမ်း နဲ့ အနောက်ဘက်ခြမ်းတွေဟာ စစ်ရေးအရ အရေးပါတဲ့ ဒေသတွေဖြစ်ပြီး နယ်မြေအသားစီးရဖို့ ပြီးခဲ့နှစ်တွေကတည်းက နှစ်ဖက်တိုက်ပွဲတွေ ဖြစ်ခဲ့ပါတယ်။
စစ်တောင်းမြစ်ဝှမ်းထိန်းချုပ်နိုင်ရေးအတွက် ကြိုးစားနေတယ်လို့ တော်လှန်ရေးအင်အားစုတွေဘက်က ထုတ်ပြန်ထားပြီး စစ်တပ်အထိုင်စခန်းတွေကို သိမ်းပိုက်ခဲ့တာရှိပါတယ်။
