ဖေဖော်ဝါရီ-၁၅၊ ၂၀၂၆။ထားမြတ်/People’s Spring
တနင်္သာရီတိုင်း၊ တနင်္သာရီမြို့နယ်၊သိန်ခွန်းကျေးရွာကို စစ်အင်အားဖြည့်တဲ့ အာဏာသိမ်းစစ်တပ် က ဒေသတွင်း ကျေးရွာတခုဖြစ်တဲ့ လယ်သယ်ရွာကို မီးရှို့ခဲ့တာကြောင့် အိမ်ခြေ ၁၀၀ ကျော် မီးလောင်ပျက်စီးခဲ့တယ်လို့ ကရင်အမျိုးသားအစည်းအရုံး(KNU) မြိတ်-ထားဝယ်ခရိုင် တာဝန်ရှိသူက ပြောပါတယ်။
ဖေဖော်ဝါရီ ၁၃ရက်မှာ တနင်္သာရီမြို့နယ်(တနောသရီမြို့နယ်)လယ်သယ်ရွာက ပြည်သူ့နေအိမ် ၁၀၀ ကျော်ကို စစ်တပ်က တိုက်ပွဲဖြစ်ပွားမှုမရှိဘဲ မီးရှို့ဖျက်ဆီးခဲ့တာလို့ မြိတ်ထားဝယ်ခရိုင်က ထုတ်ပြန်ထားပါတယ်။
“သူတို့ကပြည်သူတွေကို အဓိကအကြောက်တရားဖြစ်အောင်လုပ်တာပဲလေ။ပြည်သူတွေ တော်လှန်ရေးနဲ့ ပူးပေါင်းဆောင်ရွက်တဲ့အပိုင်းပဲဖြစ်ဖြစ် တော်လှန်ရေး လုပ်ဆောင်လို့မရဲအောင် အဲဒီလိုမျိုး အကြောက်တရားဖြစ်အောင် သူတို့လုပ်တာပဲဖြစ်တယ်။ အဲဒါက သူတို့ရဲ့ အာဏာတည်မြဲဖို့လုပ်တာလည်းဖြစ်တယ်။” လို့ KNU မြိတ်-ထားဝယ်ခရိုင် သတင်းရင်းမြစ်က ပြောပါတယ်။
Public Service Announcement
အခု လယ်သယ်ရွာကို မီးရှို့တဲ့ စစ်ကောင်စီတပ် စစ်ကြောင်းဟာ သိန်ခွန်းရွာကို စစ်အင်အားဖြည့်ဖို့လာတဲ့ စစ်ကြောင်းဖြစ်တယ်လို့ ပြောပြပါတယ်။
“သိန်ခွန်းဘက်ကို စစ်အင်အားဖြည့်တဲ့ စစ်ကြောင်းပေါ့” လို့ KNU မြိတ်ထားဝယ်ခရိုင်သတင်းရင်းမြစ်က ပြောပါတယ်။
စစ်ကောင်စီဟာ ၂၀၂၄ ဒီဇင်ဘာကတည်းက တနင်္သာရီ -မောတောင် လမ်းကြောင်း ထိန်းချုပ်နိုင်ရေး ထိုးစစ်ဆင်ခဲ့ရာတနင်္သာရီမြို့နယ် သိန်ခွန်းရွာကနေ ရှေ့မတိုးနိုင်ဘဲ သိန်ခွန်းရွာအနီးတ၀ိုက် တိုက်ပွဲဖြစ်နေတာ တနှစ်ကျော်ကြာပြီဖြစ်ပါတယ်။
လမ်ကြောင်းကို မထိန်းချုပ်နိုင်တဲ့အပြင် မြန်မာ-ထိုင်းနယ်စပ်မြို့ဖြစ်တဲ့ မောတောင်မြို့ကို KNU မြိတ်ထားဝယ်ခရိုင်ဦးဆောင်တဲ့ တော်လှန်ရေး ပူးပေါင်းတပ်က၂၀၂၅ ခုနှစ်နိုဝင်ဘာလလယ်မှာ တိုက်ခိုက်သိမ်းပိုက်ခဲ့ပါတယ်။
တိုက်ပွဲတွေမှာ အထိနာနဲ့စစ်တပ်ဟာ KNU မြိတ်ထားဝယ်ခရိုင်အတွင်း ကျေးရွာတွေက ပြည်သူလူထုနေအိမ်တွေကို အရင်ကလည်း မီးရှို့ဖျက်ဆီးမှုတွေလုပ်ဆောင်တာ၊ အရပ်သား နေထိုင်ရာတွေကို လေကြောင်းတိုက်ခိုက်တာ၊လက်နက်ကြီး၊ ဒရုန်းတွေနဲ့ တိုက်ခိုက်တာတွေလည်း လုပ်ဆောင်ခဲ့လို့ပြည်သူသေဆုံးထိခိုက်မှုတွေလည်းရှိခဲ့ပါတယ်။
